В новом детском саду открыли музей

З адкрыццём новай дашкольнай установы ў адміністрацыі і выхавальніц дзіцячага садка ўзнікла задумка арганізаваць тут этнаграфічны куток.

– Мы пачалі збіраць экспанаты для нашага музейнага кутка, – расказвае намеснік загадчыка ясляў-сада №1 Галіна Восарава. – І дзеці, і дарослыя ўключыліся ў пошукавую работу. Пакрысе, дзякуючы работніку дашкольнай установы Мікалаю Уладзіміравічу Герману, выхавальніцам, дзецям і іх бацькам, у нас з'явіліся збаны, ткацкія прылады, цапы, жорны, барана, прас, патэфон, дзіцячая люлька, драўляныя граблі, ручнікі і шэраг іншых экспанатаў.

Калі старых рэчаў набралася шмат, выхавальніцы ўзяліся за стварэнне этнаграфічнага кутка, які размясціўся ў фае і атрымаў назву «А ці не злазіць на гарышча?».

Першымі наведвальнікамі выставы, вядома, сталі выхаванцы дзіцячага садка, потым яе наведалі бацькі і госці. Сёння хлопчыкі і дзяўчынкі пры дапамозе выхавальніц праводзяць тут экскурсіі для сваіх аднагодкаў і бацькоў. І мараць пра адкрыццё музейнага пакоя з відэасалонам, каб наведвальнікі музея маглі атрымаць поўнае ўяўленне пра жыццё і побыт сваіх продкаў.

Побач з этнаграфічным кутком арганізавана выстава «Крылы льняныя – ручнікі» – больш за дваццаць саматканых і вышываных ручнікоў размясцілася тут. На некаторых нават пазначаны год – і гэта яшчэ адна нагода для даследавання старых рэчаў, якія некалі належалі прабабулям і прадзядулям сённяшніх выхаванцаў садка. Дашкаляты ўжо могуць расказаць дарослым шмат цікавых фактаў пра ткацтва і вышыўку ручнікоў.

– На жаль, сёння чалавек прапануе ручніку незайздросную долю, хоць у даўнія часы ён быў абярэгам сям'і. І  таму мы з дзецьмі хочам, каб ручнік стаў не толькі музейным экспанатам, але і каб людзі заўважылі яго сярод сучасных вырабаў і каб ён стаў рэліквіяй, якая будзе перадавацца з пакалення ў пакаленне, – расказвае Галіна Андрэеўна Восарава. – Мы збіраемся наладжваць этнаграфічныя экспедыцыі і будзем працягваць збіраць старыя рэчы, якія вельмі часта пыляцца на гарышчах вясковых хат.

Верыцца, што ў хуткім часе ў яслях-садку №1 з'явіцца сапраўдны этнаграфічны музей, які стане гонарам не толькі гэтай дашкольнай установы, але і ўсяго раёна.