Па аператыўных зводках міліцыі: куды знікла лодка, заправіліся... ды не там, хто сцягнуў банкаўскую картку
ПАД’ЕЛА ЗА ЧУЖУЮ КАРТКУ
22 верасня супраць жыхаркі райцэнтра 1980 года нараджэння была ўзбуджана крымінальная справа.
Гэта жанчына 20 верасня вырашыла “пагуляць” за кошт супрацоўніцы фермерскай гаспадаркі “Астравецкая”, а менавіта выкарыстала ў сваіх мэтах згубленую той картку, зняла чужыя грошы ў банкамаце і купіла на гэтыя грошы прадукты ў магазіне.
А ДВА КОЛЫ – ЛЕПШ
Восень у гэтым годзе выдалася даволі цёплая і многія жыхары не спяшаюцца перасесці з веласіпедаў у аўтамабілі. Злодзеі таксама не супраць здаровага ладу жыцця і эканоміі паліва – асабліва на дармаўшчынку.
З 12 па 15 верасня зладзюга залез у хлеў пенсіянера ў Варнянах і ўкраў адтуль дарожны веласіпед.
Міліцыяй вядзецца следства.
А 2 кастрычніка супраць непрацуючага мужчыны 1958 года нараджэння была ўзбуджана крымінальная справа за падобную “работу” – ён 30 верасня каля 15.00 паўторна здзейсніў крадзеж дарожнага веласіпеда жыхара Астраўца 1989 года нараджэння.
МЫ НА ЛОДАЧЦЫ КАТАЛІСЯ…
Лодка – рэч добрая і для многіх рыбакоў незаменная. Запатрабавана яна і ў некаторых злачынцаў Астравеччыны.
З 16 па 25 верасня з берага возера Губеза каля вёскі Вараб’і Астравецкага раёна пры невысветленных абставінах знікла пластыкавая лодка жыхара Мінска.
Хто вырашыў “сплыць” на ёй і куды – высвятляе міліцыя.
НЕ “ВЫГНАЎ”…
Не паспеў яшчэ ўзяцца за справу непрацуючы жыхар вёскі Гінкішкі 1975 года нараджэння, як да яго ўжо завіталі супрацоўнікі міліцыі.
22 верасня ў 18.10 участковым інспектарам Астравецкага РАУС у двары дома непрацуючага мужчыны быў знойдзены самагоны апарат і 500 літраў брагі. Мужчына атрымаў за сваю дзейнасць адміністрацыйны пратакол, а брага і апарат былі знішчаны.
НАБІТЫ ПАД ЗАВЯЗКУ
28 жніўня ў 12 гадзін каля вёскі Клюшчаны Астравецкага раёна супрацоўнікі аддзела бяспецы па эканамічных злачынствах сумесна з ваеннаслужачымі ваеннай часці 2044 спынілі аўтамабіль “Вольва V50”, за рулём якога знаходзіўся жыхар Астраўца 1971 года нараджэння.
Пры аглядзе машыны супрацоўнікамі дзяржаўных органаў былі знойдзены і канфіскаваны 2500 пачак цыгарэт “Мінск-кэпітал” і 6500 пачак “Мінск супер слім” агульным коштам 26 мільёнаў 175 тысяч рублёў з акцызнымі маркамі Рэспублікі Беларусь.
УРОК НЕ ЗАСВОЕНЫ
30 верасня Астравецкім РАУС узбуджана крымінальная справа ў адносінах да раней судзімага жыхара Астраўца 1980 года нараджэння.
Мужчына абвінавачваецца ў тым, што здзейсніў паўторны крадзеж, на гэты раз 760 тысяч рублёў, з сумачкі работніцы СВК імя Гашкевіча.
ЗАПРАВІЛІСЯ, ДЫ НЕ ТЫМ
Некаторыя аўтааматары нашага раёна ў хуткім часе пяройдуць у рады пешаходаў.
20 верасня ў 0.40 на вуліцы Валадарскага жэзл аўтаінспектара спыніў “палёт” п’янага непрацуючага жыхара Астраўца 1973 года нараджэння.
26 верасня ў 17.20 сваю вандроўку за рулём быў вымушаны прыпыніць нецвярозы жыхар вёскі Чэхі 1969 года нараджэння.
У гэты ж дзень у 19.30 быў спынены нецвярозым на матаролеры жыхар вёскі Малі 1988 года нараджэння.
А 23 верасня ў парадку паскоранай вытворчасці ўзбуджана крымінальная справа супраць жыхара вёскі Ізабеліна, які паўторна вырашыў пакатацца “пад шафэ” па сваёй вёсцы 10 верасня каля 22.00.
Антон ЧЫК.