Паштальёны напярэдадні прафесійнага свята атрымалі падзякі ад "раёнкі"
07:31 / 09.10.2019
Напярэдадні Сусветнага дня пошты рэдакцыя раённай газеты падзякавала лепшым паштальёнам за працу і правядзенне падпісной кампаніі на «Астравецкую праўду».
Паштальён аддзялення паштовай сувязі «Гудагай» Людміла Даніла ў прафесіі ўжо 13 гадоў, сем з іх – на гудагайскім участку.
– Пасля дэкрэтнага адпачынку трэба было шукаць работу. Так атрымалася, што прыйшла на пошту, каб паставіць штамп у даведцы, а тагачасны яе кіраўнік Ірына Тальчук прапанавала мне работу. Першыя гады працавала ў паштовым аддзяленні «Дравянікі», а калі яго рэарганізавалі, перайшла ў Гудагай, – расказвае Людміла Рыгораўна.
На абслугоўванні паштальёна 16 вёсак Гудагайскага сельсавета і частка самога пасёлка.
– Развозім з вадзіцелем карэспандэнцыю па вёсках на аўтамабілі. Дастаўляем газеты, часопісы, пісьмы і розныя тавары – людзі з задавальненнем набываюць прадукты, – расказвае паштальён. – За гады працы кліенты мне сталі як родныя. Бывае, пошта прыпазняецца, стаяць мае бабулькі, чакаюць. Альбо бачыш сляды каля паштовай скрынкі – значыць, не раз ужо да яе падыходзілі.
Гэтак жа чакаюць свайго паштальёна Рэгіну Максімаву і жыхары Дайлідак, Тракель і бліжэйшых да іх невялікіх вёсачак і хутароў.
– «Астравецкую праўду» выпісваюць амаль у кожны дом, – расказвае Рэгіна Адольфаўна. – Я і сама з задавальненнем чытаю «раёнку», і іншым рэкамендую.
Лёс звязаў жанчыну з поштай 11 гадоў таму. Тады ў аддзяленні паштовай сувязі якраз вызвалілася месца – і Рэгіна Адольфаўна ўзялася за працу. І нават калі шэсць гадоў таму аддзяленне ў Дайлідках закрылі і прапанавалі ёй перавесціся ў Астравец, жанчына вырашыла не выпрабоўваць лёс – не змяніла выбранай прафесійнай сцежцы.
– Цяпер паштовую карэспандэнцыю мне прывозяць на дом, – расказвае Рэгіна Адольфаўна. – Ніякіх нязручнасцей няма: расклала газеты – і павезла па хатах.
Першага кастрычніка ў паштальёна аддзялення паштовай сувязі «Варона» Ірыны Лукашэвіч быў першы рабочы дзень у горадзе.
– Цяпер я – вадзіцель-паштальён. Акрамя свайго ўчастка ў Вароне, буду абслугоўваць частку вуліц горада, – расказвае Ірына Баляславаўна. – Работа прывычная. Засталося толькі бліжэй пазнаёміцца са сваімі новымі кліентамі.
Увогуле на пошце жанчына працуе шэсць гадоў – уладкавалася сюды пасля выхаду з адпачынка па доглядзе дзіцяці.
– Працаваць усюды трэба, – разважае паштальён. – У Вароне я ўсіх ведаю, ды і мяне таксама. У горадзе будзе пакуль складана, але, спадзяюся, што спраўлюся.