Лепшыя працаўнікі КСУП “Гудагай” атрымалі ўзнагароды ў прафесійнае свята
Больш за 30 работнікаў КСУП “Гудагай” падняліся на сцэну Дома культуры ў Малях, каб атрымаць заслужаныя ўзнагароды і пачуць словы віншаванняў і падзякі за адданасць сваёй справе і лепшыя паказальнікі ў працы.
Калі ў адным накірунку ідуць людзі, зацікаўленыя ў добрых выніках, то гэтыя вынікі абавязкова будуць. Таму не дзіўна, што дзякуючы карпатлівай працы работнікаў і КСУП “Гудагай” быў прызнаны лепшай сельгасарганізацыяй раёна ў раслінаводстве і жывёлагадоўлі.
СЛОВЫ ВІНШАВАННЯ
Іван Карніла, першы намеснік старшыні райвыканкама:
– Многае ў сельскай гаспадарцы залежыць ад людзей, іх вопыту і адносін да справы. Дзякуй вам за высакародную і нялёгкую, але такую неабходную ўсім нам працу, прафесіяналізм, самааддачу. Высокіх вам ураджаяў, добрай тэхнікі і спрыяльнага надвор’я.
Так, за 1 месца сярод экіпажаў камбайнераў раёна на ўборцы збожжавых узнагароджаны Віталь Мілейша, Аляксандр Змітровіч і Аляксандр Ермаковіч. Лепшым звяном на сушцы прызнаны тандэм гудагайцаў Віталя Андрушкевіча і Вадзіма Адамковіча. На нарыхтоўцы кармоў лідарам у раёне стаў камбайнер Міхаіл Лашчонак, на адвозцы – вадзіцелі Пётр Сяргей і Іван Адамковіч. У жывёлагадоўлі перамогу святкавалі аператары машыннага даення на малочна-таварных фермах КСУП “Гудагай” Ганна Сцефановіч і Валянціна Алёкса. Лепшымі па дарошчванні буйной рагатай жывёлы ў гэтым годзе сталі Валянціна Лукша і Павел Карнэцкі, па адкормцы – Віталь Заранковіч, Наталля Андрушкевіч, Уладзімір Бразевіч, Рамуальд Раткевіч.
Ганаровую грамату раённага Савета дэпутатаў трактарысту-машыністу Вацлаву Кандратовічу ўручыў дэпутат райсавета Віктар Карповіч. Падзячны ліст атрымаў Уладзімір Відэйка.
Былі адзначаны і лепшыя ў сваёй прафесіі працаўнікі. У гэтай намінацыі на адну сцэну з “гудагайцамі” за ўзнагародамі падняліся спецыялісты Астравецкай сельгастэхнікі, селякцыйна-племяннога цэнтра жывёлагадоўлі і ветстанцыі.
Павіншавалі аграрыяў з прафесійным святам прадстаўнікі раённых грамадскіх аб’яднанняў “Беларускі саюз жанчын”, “Белая Русь”, “Беларускі рэспубліканскі саюз моладзі” і раённы камітэт Беларускага прафсаюза работнікаў аграпрамысловага комплексу.
На свята аграрыяў у Малі завітаў інспектар па якасці прадпрыемства “Смаргонскія малочны завод” Алег Ядзевіч. Ён адзначыў лепшых працаўнікоў і лепшую ферму КСУП “Гудагай”, якія непасрэдна працуюць на якасць малака.
Першы намеснік старшыні райвыканкама Іван Карніла падзякаваў за актыўнасць і творчую ініцыятыву ў аграрным напрамку вучням аграрнага класа СШ №1 горада Астраўца.
З ПЕРШЫХ ВУСНАЎ
Эдуард Садоўскі, старшыня КСУП “Гудагай”:
– Было прыемна прысутнічаць на падвядзенні абласных вынікаў, дзе з дэлегацыі ў 16 чалавек 8 былі нашымі. Мне давялося сядзець сярод аксакалаў сельскай гаспадаркі вобласці – і я ўбачыў, што яны добра ведаюць наш КСУП “Гудагай”.
Сяргей Туркін, механізатар сельгастэхнікі:
– Самому цяжка ацаніць сваю работу. Працую на трактары – справа не з лёгкіх. Таму вельмі рады, што мяне кіраўніцтва заўважыла і адзначыла. Дзякуй за гэта!
Вадзім Адамковіч, зернесушыльшчык КСУП “Гервяты”:
– Працую на сушцы збожжа чацвёрты год. За гэты час па-рознаму было – калі і цяжкавата. Усё залежыць ад надвор’я і ўраджаю. У мінулым годзе паказчыкі былі крыху лепшымі, але і ў гэтым удалося заняць 1 месца. Задаволены, бо такая ўзнагарода ў мяне ўпершыню, хоць сярод двухтысячнікаў раёна лідзіраваў не раз.
Мар’ян Таль, спецыяліст СПЦЖ:
– У гэтым годзе працаваў як заўсёды: кожны дзень і старанна. Нават сёння спяшаюся выйсці з мерапрыемства ў ліку першых – трэба на працу. Так, выхадны, да таго ж свята – у мяне яно будзе на ферме. Узнагароду атрымаў ужо ў чацвёрты раз. Прыемна.
Аляксандр Замара, трактарыст-машыніст КСУП “Гудагай”:
– Лепшым у прафесіі прызнаны не ўпершыню, але ўсё роўна рады і задаволены. Канешне, гэта патрабуе трымаць марку – буду старацца.