Астравецкія медыкі атрымалі віншаванні і ўзнагароды з нагоды прафесійнага свята

15:28 / 21.06.2021

Эпідэмія каронавіруснай інфекцыі COVID-19 унесла карэктывы ў многія напрамкі нашага жыцця. У тым ліку – і ў святочныя мерапрыемствы. У мінулым годзе медыкаў віншавалі з прафесійным святам па ўнутранай радыёсувязі. Сёлета ўсё ж сабраліся ў бальнічнай канферэнц-зале, якая, вядома, не змагла змясціць усіх. Але такі ўнутраны фармат дазволіў многім прыйсці на ўрачыстасць прама з дзяжурства – і пасля яе завяршэння вярнуцца да выканання працоўных абавязкаў.

Уладзімір Мажэйка і Юлія Краўчанка

– Эпідэмічная сітуацыя паўплывала на фармат правядзення мерапрыемства, але, спадзяюся, не паўплывае на ваш святочны настрой, – сказаў, віншуючы калег, галоўны ўрач Астравецкай ЦРКБ Уладзімір Мажэйка.
Да гэтых слоў далучыліся намеснік старшыні райвыканкама Павел Мілешка і галоўны санітарны ўрач Йонас Таль.
– Дзякую нашым медыкам не толькі за тое, што ратуюць жыцці і вяртаюць людзям здароўе, а і за тое, што ў няпростых умовах разгулу пандэміі ў многім дзякуючы іх прафесіяналізму не дапушчаны крызісныя з’явы ў эканоміцы, – сказаў Павел Віктаравіч.
– У нас цудоўная бальніца, аснашчаная самым сучасным абсталяваннем. Але не сцены і не апаратура лечаць людзей, а людзі. Не стамляюся паўтараць, што астравецкія ўрачы – лепшыя, яны – прафесіяналы высокага класа, – далучыўся да віншаванняў Йонас Мар’янавіч.
Прафесіяналаў рыхтуюць настаўнікі – на імпрэзе прагучалі словы падзякі і віншавані ветэранам аховы здароўя, дзякуючы якім дасягнуты сённяшні ўзровень падрыхтоўкі спецыялістаў. А памяць тых, каго ўжо няма, ушанавалі хвілінай маўчання.
Вялікая група медыцынскіх работнікаў атрымала Ганаровыя граматы, Падзячныя лісты старшынь райвыканкама і раённага Савета дэпутатаў, абласнога ўпраўлення аховы здароўя, адміністрацыі і прафкама нашай бальніцы.
Так, Ганаровымі граматамі райвыканкама ўзнагароджаны Тадэвуш Зубель, урач анестэзіёлаг-рэаніматолаг аддзялення анестэзіі і рэанімацыі, Ганна Качан, старшая медыцынская сястра стаматалагічнага аддзялення паліклінікі, і Ганна Вашчылка, памочнік урача-гігіеніста раённага цэнтра гігіены і эпідэміялогіі.
Падзячныя лісты старшыні раённага выканаўчага камітэта ўручаны Ірэне Емяльян, акушэру Кямелішкаўскай амбулаторыі ўрача агульнай практыкі; Наталлі Івашка, урачу ўльтрагукавой дыягностыкі дыягнастычнага аддзялення; Віктару Марціновічу, загадчыку хірургічнага аддзялення; Паўлу Базюку, дэзінфектару райЦГЭ; Ірыне Анімуцкай, фармацэўту цэнтральнай раённай аптэкі.
Шматгадовая добрасумленная праца і высокі прафесіяналізм Інэсы Кардзіс, участковага ўрача-педыятра, і Наталлі Кірпа, медыцынскай сястры Варнянскай амбулаторыі ўрача агульнай практыкі, а таксама супрацоўнікаў райЦГЭ ўрача-гігіеніста Дзіяны Лось, лабарантаў санітарна-гігіенічнай лабараторыі Святланы Масойць і Алены Гацук адзначаны Ганаровымі граматамі раённага Савета дэпутатаў. Падзячныя лісты старшыні раённага Савета атрымалі Андрэй Бароўка, анестэзіст аддзялення анестэзіялогіі і рэаніматалогіі, Наталля Бабіч, рэнтгенлабарант кабінета ангіаграфіі, Яніна Васілец, сястра-гаспадыня неўралагічнага аддзялення, Таццяна Вішнеўская, медыцынская сястра тэрапеўтычнага аддзялення, а таксама работнікі райЦГЭ: Ала Вішнеўская, галоўны бухгалтар, і Анастасія Лабажэвіч, юрысконсульт.

Узнагароду атрымлівае Інэса Кардзіс

І асабліва цёплымі і працяглымі апладысментамі калегі віталі Галіну Зубель, загадчыка педыятрычнага аддзялення паліклінікі – напярэдадні свята Галіна Мікалаеўна атрымала нагрудны знак «Выдатнік аховы здароўя».

Галіна Зубель – выдатнік аховы здароўя

А ўрач агульнай практыкі Генадзь Хаменка стаў пераможцам абласнога, а затым – і рэспубліканскага конкурсу «Урач года». Як бачна, высокі прафесіяналізм нашых урачоў па вартасці ацэньваюць не толькі ў раёне, але і ў вобласці, і ў рэспубліцы.

Генадзь Хаменка стаў пераможцам конкурсу «Урач года»

Медыцынскія работнікі – не ўсе, але значная частка – святы, у тым ліку і прафесійнае, сустракаюць на працы. Работа ў іх такая: ахвяраваць сваім часам, стасункамі з блізкімі і сябрамі, захапленнямі, а часам – і здароўем дзеля пацыентаў.
І колькі б ні гучалі словы «Дзякуй, доктар!», іх ніколі не будзе шмат…

Подписывайтесь на телеграм-канал «Островецкая правда» по короткой ссылке https://t.me/ostrovetsby.

Телеграм-канал «Островецкая правда» – всё самое интересное из жизни Островца и Островецкого района.

Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.

Телеграм-канал «Гродно Медиа Group» – это ежедневные новости районов Гродненской области и города Гродно.