Пра што пісала «Астравецкая праўда» ў юбілейныя гады: 20 сакавіка
14:39 / 23.03.2021
Першы нумар «Астравецкай праўды» – на той час «Большэвіцкі арганізатар» – выйшаў 29 мая 1941 года. З таго часу – з перапынкам на гады Вялікай Айчыннай вайны і падчас расфарміравання Астравецкага раёна ў 1962-1965 гады – газета ўвесь час была побач з чытачамі, расказвала навіны, дапамагала вырашаць праблемы, віншавала са святамі і спачувала ў бядзе.
Прапануем зазірнуць у гісторыю і пачытаць, пра што пісала «раёнка» ў юбілейныя для сябе гады.
20 сакавіка 1971 года
Добрай дарогі
– пад такой назвай «раёнка» апублікавала падзяку жыхароў вёскі Слабодкі, адрасаваную паштальёну Веры Васілеўскай.
Мясцовыя жыхары задаволены работай добразычлівай і ветлівай жанчыны і дзякуюць ёй за добрасумленныя адносіны да службовых абавязкаў.
«Вера заўсёды параіць, якія выпісаць газеты, часопісы, рэгулярна прыносіць пошту», – пішацца ў падзяцы.
19 сакавіка 1981 года
Вопытная даглядчыца
Генуэфа Тамашаўна Замара не першы год становіцца лепшай працаўніцай калгаса «Шлях Леніна».
Жанчына займаецца адкормам буйной рагатай жывёлы. За калгасніцай замацавана 60 бычкоў. Нават у складаных умовах зімоўкі вопытная даглядчыца дабіваецца высокіх вытворчых паказчыкаў: сярэднясутачныя прывагі за 2 месяцы склалі 652 грамы.
«Гэта больш, чым яна атрымлівала ад сваіх гадаванцаў за мінулы год. Генуэфа Тамашаўна абавязалася давесці сярэднясутачныя прывагі да 700 грамаў», – зазначае аўтар артыкула.
19 сакавіка 1991 года
Прагаласавалі за саюз
За захаванне СССР як абноўленай федэрацыі раўнапраўных суверэнных рэспублік прагаласавала на рэферэндуме, які прайшоў 17 сакавіка, больш за 90% жыхароў раёна.
Як паведамляў Савет дэпутатаў, у спісы для галасавання было ўключана 22 155 грамадзян, у галасаванні прыняло ўдзел 20 755 чалавек, або 93,7% ад агульнай колькасці грамадзян, уключаных у спісы.
21 сакавіка 2001 года
Рымдзюнскі цэнтр збірае сяброў
Літоўскі цэнтр культуры, адукацыі і інфармацыі адкрылі ў аграгарадку Рымдзюны.
Размова ў артыкуле ішла пра адкрыццё менавіта Дома культуры, паколькі беларускамоўная і літоўскамоўная школы і інтэрнат тут ужо працавалі.
Шматлікія госці, пераразанне чырвонай стужкі, уручэнне сімвалічнага ключа і, вядома ж, падарункі – адкрыццё стала падзеяй не толькі для нашага раёна, але і рэспублікі.
19 сакавіка 2011 года
Мы чытаем!
Пасвячэнне першакласнікаў у чытачы прайшло ў дзіцячай бібліятэцы.
117 дзяцей з СШ №1 і гімназіі №1, якія ўпершыню наведалі бібліятэку, атрымалі пасведчанні чытача.
Акрамя таго, школьнікаў чакала цікавая забаўляльная праграма: дзеці сустрэліся з казачнымі персанажамі, адгадвалі загадкі, удзельнічалі ў конкурсах і віктарынах. І канешне ж, кожны выбраў для сябе цікавую кнігу.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.