«Ветразь» аб’яднаў юных аматараў чытання

Удзельнікі аматарскага аб’яднання «Ветразь» весела і з карысцю бавяць час у дзіцячай бібліятэцы.

Хлопчыкі і дзяўчынкі збіраюцца тут раз у месяц, каб падзяліцца ўражаннямі ад прачытаных кніг і паўдзельнічаць у цікавых мерапрымствах, якія ладзяць для іх бібліятэкары.

Нядаўна юныя аматары чытання сабраліся на пасяджэнне аматарскага аб’яднання, якое прайшло пад дэвізам «Мы – сябры бібліятэкі». Праз гульню новыя наведвальнікі пазнаёміліся з пастаяннымі членамі клуба.

Таксама дзеці ўспомнілі дэвіз і эмблему аб’яднання – ветразь, якая сімвалізуе творчасць, мары і новыя дасягненні.

Удзельнікі клуба падвялі вынікі ўдзелу ў жыцці бібліятэкі за мінулы год і абмеркавалі, якія мерапрыемствы хацелася б правесці сёлета.

Ганна КЕРЭЛЬ,
бібліятэкар Астравецкай дзіцячай бібліятэкі