32 тур конкурсу «Пазнай Астравеччыну»
08:17 / 28.08.2020
Прыватны музей беларускай фаўны заснаваны ў 1989 годзе Мечыславам Змітровічам спачатку размяшчаўся ў вёсцы Слабодцы. Перасяліўшыся ў Трокенікі, Мечыслаў перавёз туды і музей, выдзеліўшы для яго будынак – без вокнаў і са спецыяльным тэмпературным рэжымам.
Адметны гэты музей яшчэ і тым, што яго сабраў і аформіў чалавек без спецыяльнай адукацыі, але, як сцвярджалі ўсе, хто ведаў Мечыслава Іванавіча, ён быў прафесійным таксідэрмістам.
У экспазіцыі больш за 500 экзэмпляраў, з іх – 168 відаў птушак. Як сцвярджае знаток музейнай справы Ванда Вайшнаровіч, аформлены яны па ўсіх патрабаваннях.
Большасць экспанатаў – з тэрыторыі нашага раёна, многія з якіх з’явіліся ў Змітровіча дзякуючы паляўнічым.
Сёння за музеем прыглядае і праводзіць экскурсіі ўсім жадаючым сын Мечыслава – Аляксандр.
За адказы на заданне 31 тура 2 балы атрымліваюць Ванда Вайшнаровіч і Андрэй Ваўчок, па 3 балы ў скарбонку паклалі Святлана Марозава і Алена Памецька, па 4 – Ганна Мілашэвіч, Жанна Волк-Леановіч, Алег Драган, Вікторыя Іванцэвіч і Марына Кімса.
Лідары конкурсу па выніках усіх тураў не змяніліся: у Алега Драгана 102 балы, Марыны Кімсы – 100, Ганны Мілашэвіч і Жанны Волк-Леановіч – па 96 балаў.
Дзе гэта, што гэта?
Нагадваем: далучыцца да конкурсу можна з любога этапу. Калі вы ведаеце, дзе гэта і што гэта, – дасылайце свае адказы, расповеды і фотаздымкі.
Адказы на пытанні конкурсу можна дасылаць у рэдакцыю па электроннай пошце ці паведамляць па тэлефонах 2-03-64, 7-08-44, +375-29-328-75-99 на працягу пяці дзён (з улікам выхадных і святочных) пасля выхаду газеты з конкурсным заданнем (да аўторка ўключна).
Мадэратар праекта
Ніна РЫБІК
