Ці будуць гаспадаркі з кармамі, расказаў начальнік райсельгасхарчу Іван Карніла
08:47 / 30.06.2020
Ці скарысталіся гэтым гаспадаркі раёна, колькі і якога фуражу ўжо нарыхтавалі – пра гэтае і многае іншае распытаў карэспандэнт у першага намесніка старшыні райвыканкама, начальніка ўпраўлення сельскай гаспадаркі і харчавання Івана Карнілу.
– На Астравеччыне завяршаецца першы ўкос. Ці ёсць якія-небудзь прынцыповыя адрозненні сёлетняй корманарыхтоўчай кампаніі ад мінулых?
– Убіраць травы сёлета пачалі на тыдзень пазней, чым летась. Першы ўкос радуе: вясной хапала вільгаці – і травы дружна пайшлі ў рост.
У мінулым годзе значную шкоду сенакосам нанесла засуха: пасля скошвання травы не адрасталі на працягу месяца, а то і больш. Надвор’е негатыўна паўплывала і на ўраджайнасць збожжавых. Іншых істотных адрозненняў няма. Людзі разумеюць важнасць корманарыхтоўчай кампаніі, таму тэхніка ў полі працуе без перапынкаў.
Увогуле сёлета запланавана нарыхтаваць амаль 109 тысяч тон сенажу, 165 тысяч тон сіласу і крыху больш за 3 тысячы тон сена. Такім чынам, на адну ўмоўную галаву буйной рагатай жывёлы прыйдзецца 32,2 цэнтнера кармавых адзінак.
У сярэднім па раёне ўжо нарыхтавана 7,13 да мінулагодніх 5,87 цэнтнера кармавых адзінак на ўмоўную галаву. У лідарах – КСУП «Гудагай», дзе назапашана 8,54 цэнтнера кармавых адзінак (+0,5), на другой пазіцыі КСУП «Гервяты» з 7,61 (+1,2), а тройку лідараў замыкае КСУП «Міхалішкі» з паказчыкам 6,95 (+2,1).
Да слова, тром гаспадаркам раёна – КСУП «Варняны», «Міхалішкі» і РУП «Астравецкі саўгас «Падольскі» – з мясцовага бюджэту выдзелена ў 2019 годзе па 30 тысяч рублёў на набыццё насення люцэрны. Такія інвестыцыі апраўдалі сябе: культура добра ўрадзіла, асабліва ў КСУП «Міхалішкі».
Па вялікаму рахунку, у нас няма падстаў сумнявацца ў тым, што запланаваныя ў нарыхтоўцы кармоў паказчыкі будуць дасягнуты.
– Як выглядае корманарыхтоўка ў разрэзе гаспадарак?
– У КСУП «Гудагай» і «Міхалішкі» завяршыўся першы ўкос. Гудагайцы ўжо кладуць у пракосы атаву. Корманарыхтоўка ў РУП «Астравецкі саўгас «Падольскі» блізіцца да завяршэння. Радуе, што асноўная маса траў убрана ў аптымальныя тэрміны: злакавыя ў канцы фазы выхаду ў трубку да пачатку калашэння, а аднагадовыя бабовыя і бабова-злакавыя – да пачатку цвіцення.
У КСУП «Варняны», якое першае ў раёне пачало нарыхтоўваць кармы і першым заклала сянажна-сіласную траншэю, не абышлося без праблем: падводзіла тэхніка. Тым не менш, варнянцы ў параўнанні з мінулым годам сёлета працуюць паскоранымі тэмпамі. Пра гэта сведчаць і лічбы: на 23 чэрвеня ў гэтай гаспадарцы на адну ўмоўную галаву буйной рагатай жывёлы нарыхтавана на 1,5 цэнтнера кармавых адзінак больш, чым у 2019 годзе, гэта 130%.
І ўсё ж КСУП «Варняны» адстае ад іншых гаспадарак: 73% пры сярэднераённых 86%. Асноўная прычына – паломкі тэхнікі. Для паспяховага правядзення корманарыхтоўчай кампаніі «Варнянам», на маю думку, патрэбны як мінімум тры высокапрадукцыйныя корманарыхтоўчыя комплексы, а працуюць з пераменным поспехам толькі два: непасрэдна на корманарыхтоўцы заняты два «Ягуары», а КЗР задзейнічаны на забеспячэнні малочна-таварных ферм і комплексаў зялёнай падкормкай.
– Некалькі гадоў запар асобным сельскагаспадарчым прадпрыемствам не хапала на зіму ўласных кармоў. Ці зменіцца сёлета гэтая негатыўная тэндэнцыя?
– Думаю, што на зімне-стойлавы перыяд атрымаецца нарыхтаваць неабходную колькасць сенажу, сена і сіласу. На сёння (24 чэрвеня. – Заўв.аўт.) у мінулым годзе быў закладзены 41% сенажу, у гэтым – 56%, пры тым, што летась на гэтую дату ўборка траў першага ўкосу заканчвалася, а сёння ўбрана 86% сенакосаў – яшчэ ёсць што ўбіраць. Да ўзроўню мінулага года ў 2020-м ужо нарыхтавана 124% сенажу.
Каб сфарміраваць неабходны запас грубых кармоў на зімне-стойлавы перыяд, першым укосам неабходна нарыхтаваць да 60% фуражу. Думаю, гэта лічба будзе большай – каля 60-65%.
У КСУП «Міхалішкі» падчас зімне-стойлавага ўтрымання жывёлы сапраўды адчуваўся істотны недахоп кармоў. Аднак яны выправілі сітуацыю: сёння па забяспечанасці сенажом гэтае сельскагаспадарчае прадпрыемства займае другую пазіцыю ў раённым табелі рангаў.
Найлепшая забяспечанасць сенажом у КСУП «Гудагай» – 70% да патрэбы. Другое месца ў КСУП «Міхалішкі» – 58%.
– З колькасцю нарыхтаваных кармоў зразумела. А што вы можаце сказаць пра іх якасць?
– Каб забяспечыць атрыманне высокаякасных травяністых кармоў, трэба дакладна выконваць асноўныя прынцыпы іх нарыхтоўкі. Напрыклад, якасць сенажу залежыць ад трамбоўкі, тэрмінаў закладкі траншэі і яе герметычнасці. На 99% гэтыя патрабаванні выконваюцца ва ўсіх гаспадарках. Аднак ніхто не застрахаваны ад паломкі тэхнікі. Закладка траншэі побач з малочна-таварнай фермай «Газа» КСУП «Варняны», на жаль, вялася больш за тры дні.
Цяпер варнянцам дапамагае завяршаць першы ўкос траў тэхніка сельгастэхнікі – кормаўборачны камбайн КВК і некалькі адзінак на адвозцы траў.
У гаспадарках і спецыялісты, і механізатары добра разумеюць, што толькі прытрымліваючыся ўсяго тэхналагічнага ланцужка корманарыхтоўкі, можна назапасіць кармы добрай якасці – у выпадку парушэння тэхналогіі ні адзін кансервант не выправіць дапушчаныя памылкі.
– Мы з вамі ўсё пра сянаж… А сена гаспадаркі нарыхтоўваюць?
– Калі тыдні два-тры назад ледзь не штодня грымелі навальніцы, то цяпер – самае надвор’е для сенавання. Учора (23 чэрвеня. – Заўв.аўт.) ўсе сельскагаспадарчыя прадпрыемствы пачалі нарыхтоўваць сена. Тут мы крыху адстаём ад мінулага года па паказчыках: летась у пунях было амаль 1 000 тон сена, сёлета – толькі 300 тон. Думаю, другім укосам выканаем план.
Надвор’е было больш спрыяльнае для нарыхтоўкі сенажу: у раёне назапашана амаль на 14 тысяч тон больш гэтага корму, чым летась.
– Хоць пра нарыхтоўку сіласу яшчэ рана гаварыць, тым не менш, як падрастае каралева палёў – кукуруза?
– Па гэтай культуры, як і па травах, сітуацыя сёлета вельмі адрозніваецца ад леташняй. З-за халоднай вясны кукуруза, асабліва пасеяная ў раннія тэрміны, не расла – гэта цеплалюбівая культура. А пустазелле, наадварот, набірала сілу – цяпер гаспадаркі затрачваюць дадатковыя сродкі для барацьбы з ім. Цяпер у раёне завяршаецца праполка кукурузы.
– Што вас, як начальніка райсельгасхарчу, радуе ці засмучае ў гэты перыяд?
– Радуюць травы – ёсць што ўбіраць. Прыемна, што людзі добра працуюць і разумеюць важнасць корманарыхтоўчай кампаніі: штодзень закладваецца каля тысячы тон зялёнай масы на сянаж – гэта нямала.
Хачу адзначыць КСУП «Гервяты» і «Гудагай», дзе нарыхтавалі найбольш сенажу: 20 тысяч тон – гэта 30% ад усяго валавага збору ў раёне. Не нашмат ад іх адстаў і КСУП «Гервяты».
– Іван Мар’янавіч, дзякуй за гутарку! Будзем спадзявацца, што сёлетняй зімой гаспадаркі будуць з кармамі.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
