Што аб’ядноўвае беларусаў і расіян
12:24 / 03.04.2020
Вольга Лябецкая, педагог:
– Важна, што акрамя эканамічных, палітычных стасункаў дарослых, народы Беларусі і Расіі аб’ядноўваюць дзеці. Паміж нашай гімназіяй і сярэдняй школай №1 горада Сасновы Бор Ленінградскай вобласці даўно ўсталяваліся не толькі пабрацімскія, але і сяброўскія адносіны. Кожны год мы арганізоўваем «візіты дружбы» – не проста экскурсіі, а ўдзелы ў адукацыйных праектах, канферэнцыях, спартыўных спаборніцтвах і творчых конкурсах. Да 75-годдзя Вялікай Перамогі мы ініцыіравалі сумесны праект «Дарогамі Вялікай Перамогі», у межах якога вучні з Расіі з’ездзілі ў Брэсцкую крэпасць, разам з нашымі дзецьмі наведалі музей гісторыі Вялікай Айчыннай вайны. На сцэне гімназіі госці прэзентавалі пастаноўку «А зори здесь тихие», а затым усе вучні і настаўнікі разам усклалі кветкі да помніка воінам-вызваліцелям у Астраўцы. Такое сяброўства дарагога каштуе.
Сяргей Бернюкевіч, вадзіцель:
– Гісторыя Беларусі і Расіі цесна пераплецены – гэта, напэўна, самы важкі і важны факт. Што тычыцца Астравеччыны, то нашы краіны цесна паяднала будаўніцтва атамнай электрастанцыі.
Аляксей Маргуж, трэнер:
– Беларусь і Расія – брацкія краіны, у нас шмат агульнага: мова – большасць з нас, у тым ліку і я, у паўсядзённым жыцці размаўляем па-руску, карані і гісторыя, рэлігія. Хоць нельга не браць у разлік ментальнасць – яна ў нас розная: гэта, мне здаецца, абумоўлена тэрытарыяльным фактарам: Беларусь – больш кампактная, а Расія – неабдымная. Адзінае, што цяпер нас раз’ядноўвае – закрытыя межы, але, спадзяюся, гэта часовая мера.
Андрэй Цыганок, электраманцёр:
– Мы брацкія народы, і гэты факт асабіста ў мяне не выклікае ніякіх сумненняў – у нас адзіныя карані і гісторыя. Шкада, што некаторыя пра гэта забыліся.
Родам я з Кубані. Мой бацька служыў у Баранавічах, і мяне лёс прывёў у Беларусь. Уражанні ад вашай краіны і людзей толькі станоўчыя! Беларусы – вельмі адкрытыя, добрыя і спагадлівыя, а такія якасці – асабліва цяпер, на вагу золата. Дзякуй вам за гасціннасць!
Анастасія Андрыцо і Вікторыя Казюк, вучаніцы
Анастасія:
– Беларусы і расіяне, увогуле, як і ўсе людзі, вельмі падобныя: нам аднолькава баліць, мы крыўдзімся і бываем шчаслівымі, радуемся і засмучаемся. Справа, напэўна, не ў нацыянальнасці, а ў самім чалавеку. Некалькі гадоў назад да нас у клас прыйшлі вучыцца два хлопчыкі, якія пераехалі з Расіі. Яны нічым не адрозніваюцца ад нас: нам падабаюцца аднолькавыя фільмы і музыка, мы любім пажартаваць і прыкальнуцца. (Усміхаецца.)
Вікторыя:
– Ой, складанае пытанне! Нават не ведаю, што адказаць. Галоўнае – каб чалавек быў харошы, астатняе – другаснае.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.