Навагодняя фотазона астраўчан прызнана адной з самых прыгожых у вобласці

У Гродне падвялі вынікі абласнога конкурсу фотазон сярод устаноў адукацыі «Волшебство Нового года» – астраўчане ў ліку прызёраў.

Абласному этапу папярэднічаў раённы. Удзел у ім прынялі дзіцячыя сады, школы, гімназія і Цэнтр творчасці дзяцей і моладзі – усяго было даслана 30 здымкаў фотазон.

Арыгінальнасцю і змястоўнасцю ідэі, яе мастацкім рашэннем вызначыліся творчыя задумы Варнянскага НПК, Астравецкага ЦТДіМ і ясляў-сада №5 – яны занялі першае месца. Другое месца падзялілі таксама тры канкурсанты – гімназія, СШ №2 і яслі-сад №4. Трэцяе – аддалі яслям-саду №3, Рытанскаму НПК і яшчэ адной фотазоне Варнянскага НПК. Работы пералічаных устаноў упрыгожаць фае кінаканцэртнай залы «Астравец» падчас дабрачыннага ранішніка.

Варнянскі НПК

Астравецкі ЦТДіМ

Яслі-сад №5

Гімназія

СШ №2

Яслі-сад №4

Яслі-сад №3

Рытанскі НПК

Варнянскі НПК

Пераможцы ўдзельнічалі ў абласным этапе конкурсу – і Дыпломам ІІ ступені адзначылі работу «чараўнікоў» з Астравецкага ЦТДіМ.

– Стварыла гэту фотазону наш таленавіты педагог Алла Зяленская разам са сваімі вучнямі, – расказвае дырэктар цэнтра творчасці Святлана Куцько. – Наш калектыў вельмі рады такому поспеху, асабліва, калі ўлічыць, што канкурыравалі мы з 61 установай адукацыі вобласці – і толькі пяць фотазон былі прызнаны лепшымі. Зачаравалі мы сваёй творчасцю журы!

Астравецкая фотазона будзе ўпрыгожваць Гродзенскую філармонію падчас абласнога каляднага Белага балю, які пройдзе 18 снежня.