Астраўчане на “Зялёнай планеце”

09:15 / 09.10.2018

Больш за трыццаць дыпломаў лаўрэатаў заваявалі выхаванцы Астравецкага цэнтра творчасці дзяцей і моладзі ў XVI Міжнародным форуме «Зялёная планета – 2018».

Астраўчане кожны год удзельнічаюць у конкурсах, якія праводзяцца ў межах гэтага форума. І яшчэ ніколі іх талент, крэатыўнасць, а галоўнае – імкненне зрабіць навакольны свет больш чыстым і прыгожым не заставаліся неадзначанымі.

У гэтым годзе на адрас арганізатараў форуму – агульнарасійскага грамадскага дзіцячага экалагічнага руху «Зялёная планета» – цэнтр творчасці накіраваў работы ў трох намінацыях: малюнкі і плакаты «Добрыя справы», сацыяльна-значныя праекты «Прырода – неацэнны дар», вырабы і кампазіцыі «Разнастайнасць векавых традыцый».

– У кожнай з намінацый, дзе былі заяўлены нашы работы, мы заваявалі дыпломы, – гаворыць намеснік дырэктара Астравецкага ЦТДіМ Святлана Куцько. – У агульнай колькасці мы атрымалі 31 перамогу – у мінулым годзе было 13. Мы вельмі рады такому выніку.

У конкурсах выяўленчага і дэкаратыўна-прыкладнога мастацтва астраўчане ўдзельнічаюць даўно. А сёлета, валанцёрскі атрад цэнтра творчасці «Крылы» ўпершыню прэзентаваў сваю сацыяльна-значную дзейнасць у экалагічным накірунку – і перамог.

«Зялёная планета», акрамя таго, што прывівае дзецям любоў да навакольнага свету і прапагандуе простыя экалагічныя рашэнні розных задач, што ўзнікаюць у паўсядзённым жыцці, мае яшчэ адну добрую традыцыю – адзначаць самых актыўных арганізатараў нацыянальнага этапу форуму. У ліку лепшых і нашы землякі: Астравецкі цэнтр творчасці дзяцей моладзі ўзнагароджаны граматай за вялікі ўклад у фарміраванне экалагічнай культуры дзяцей і падлеткаў, зберажэнне культурнай спадчыны і арганізацыю і правядзенне сёлетняга конкурсу на мясцовым узроўні.
Віншуем дзяцей і іх педагогаў!