Колькі зарабляюць на жніве?
14:15 / 27.07.2018
1
– Штогод прафсаюз трымае руку на пульсе жніва. Па добрай традыцыі, якая склалася ў раёне, адзначаем «тысячнікаў» – камбайнерскія экіпажы і вадзіцеляў, якія першымі намалацілі тысячу тон збожжа і рапсу; і «двухтысячнікаў» – аператараў зернесушыльных установак. Акрамя гэтага, падарунак атрымае галоўны аграном той гаспадаркі, у якой экіпаж першым у раёне, незалежна ад прапускной здольнасці камбайна, намалоціць тысячу тон збожжа, – па дарозе расказвае Юрый Аляксандравіч. – Для працаўніка важна не толькі матэрыяльнае заахвочванне яго працы, але і ўвага. Згадзіцеся, кожнаму прыемна, калі бачаць і цэняць яго працу і старанні.
– Ва ўсіх гаспадарках раёна наладжана двухразовае гарачае харчаванне занятых на ўборцы людзей. Асаблівых нараканняў няма. Падабаецца механізатару абед ці не – гэта ўжо справа густу, – працягвае Юрый Аляксандравіч. – Абеды і падвячоркі хлебаробам прывозяць у поле – і, каб нармальна паабедаць, людзям няма дзе прысесці. Сёлета гэтую праблему вырашылі сумесна з прафсаюзнымі пярвічкамі гаспадарак – і закупілі наборы раскладных сталоў і крэслаў.
Прыпынак 1: Малі
На жаль, ні ля адміністрацыйнага будынка КСУП «Гудагай», ні на стэндзе ўнутры яго інфармацыі пра перадавікоў жніва напрыканцы мінулага тыдня мы не ўбачылі: яна «схавалася» ў кабінеце ідэолага. Намеснік дырэктара па ідэалагічна рабоце Вікторыя Юргелянец патлумачыла, што не паспела вынесці інфармацыйны стэнд і паабяцала, што такіх хібаў больш не будзе.
Умовамі стымулявання хлебаробаў пацікавіліся ў галоўнага эканаміста КСУП «Гудагай» Ірыны Юцкевіч.
– Ад працоўнага спаборніцтва мы адмовіліся, – здзівіла нас спецыяліст. І аргументавала:
– Каб ніхто потым не крыўдаваў і ўсе былі ў больш-менш аднолькавых умовах. У нас распрацаваны ўмовы прэміравання на перыяд уборкі. Напрыклад, кожныя сто тон прыносяць камбайнеру дадаткова 10 рублёў, яго памочніку – 8. Вадзіцель МАЗа за перавезеныя 200 тон дадаткова атрымае 10 рублёў, а вадзіцель ГАЗ-53 атрымае столькі ж за 100 тон збожжа. Акрамя гэтага ў гаспадарцы практыкуецца натуральная аплата: за кожную намалочаную тону камбайнер атрымае кілаграм збожжа, сушыльшчык – 300 грам за тону даведзенага да кандыцыі зерня.
У КСУП «Гудагай» распрацаваны бюлетэнь, у якім штодзень мяняюцца звесткі пра намалоты камбайнераў і колькасць перавезенага вадзіцелямі збожжа за дзень і з пачатку ўборкі.
ФАКТ*
Найбольшы заробак камбайнера за дзень склаў 96 рублёў, найменшы – 51.
Побач з пляцоўкай, дзе будуецца атамная станцыя, стаялі, прытуліўшыся да беражка поля, тры камбайны. Дождж, нібыта татара-мангольскае іга, нечаканымі налётамі не даваў працаваць ні тэхніцы, ні людзям.
Цікавімся ў камбайнераў, ці ведаюць яны, колькі зарабляюць за дзень на ўборцы.
– Ведаем! – у адзін голас адазваліся хлебаробы. – «Паперкі» перадаюць разам з абедамі.
У пацвярджэнне сваіх слоў памочнік камбайнера Віктар Бабарыка паказаў два лісты: «інфарматар» налічэння зарплаты на ўборцы ўраджаю і такі ж – аб ходзе ўборкі.
Дакументы састаўлены зразумела: камбайнер адразу бачыць, колькі ён зарабіў за дзень і з пачатку ўборкі на абмалоце збожжа, рапсу, травы. Таксама ў іх пазначана норма выпрацоўкі, ад якой залежыць прэмія.
Гэтыя «нормы» вар’іруюцца для розных камбайнаў (у залежнасці ад прапускной здольнасці), аўтамабіляў і зернесушыльных установак.
За выкананне 30 норм (напрыклад, для «Джон-Дзіра» гэта 660 тон) камбайнер атрымае 65 рублёў, памочнік – 55, вадзіцель – 50, а кожны аператар зернесушылкі – 60 рублёў.
«Плюс» варнянскага жніўнага спаборніцтва ў тым, што ў ім удзельнічаюць не толькі камбайнерскія экіпажы, вадзіцелі і аператары зернесушыльных установак, але і занятыя на падборы і прэсаванні саломы механізатары.
Зазірнуўшы на майстэрні ў Варняны, мы ўбачылі ўзняты сцяг і стэнд з інфармацыяй. Праўда, пазней высветлілася, што на выхадных яна не абнаўляецца, хоць хлебаробы працуюць і ў гэтыя дні…
ФАКТ*
Найбольшы заробак камбайнера за дзень склаў 80,34 рублёў, найменшы – 21,89.
Прыпынак 3: Гервяты
Каля механічных майстэрняў у Гервятах перад масавай уборкай устанавілі флагшток і новы стэнд – кожны механізатар можа ўбачыць на ім колькасць намалочаных за мінулы дзень тон збожжа і прозвішчы лідараў жніва. Акрамя ўмоў жніўнага спаборніцтва, на стэндзе ў дыспетчарскай размешчаны нормы выпрацоўкі і аплаты працы на корманарыхтоўцы.
Акрамя гэтага, падчас дажынак у гаспадарцы вызначаюцца па тры прызавыя месцы ў кожнай з вышэй узгаданых катэгорый.
Пярвічная прафсаюзная арганізацыя закупіла для ўсіх камбайнераў майкі і кепкі з эмблемай прадпрыемства.
Пры ўсіх «плюсах», у гервятцаў без «лыжкі дзёгцю» не абышлося. Даведацца, колькі зарабіў кожны камбайнер за дзень, мы не змаглі. Па словах эканаміста Ганны Іванаўны Махнач, камбайнеры несвоечасова здаюць пуцёўкі. Праўда, пазней гэта высветлілі.
ФАКТ*
Найбольшы заробак камбайнера за дзень склаў 110 рублёў, найменшы – 34.
Прыпынак 4: Міхалішкі
На тэрыторыі ля зернетока сустракаем аператараў зернесушыльнай устаноўкі Віктара Мілашэвіча і Генадзя Субаткевіча.
ФАКТ*
Найбольшы заробак камбайнера за дзень склаў 69,29 рублёў, найменшы – 23,20.
Прыпынак 5: Рытань
У РУП «Астравецкі саўгас «Падольскі», як і ў КСУП «Гудагай», распрацавана сістэма прэміравання на перыяд уборкі. Праўда, яна тычыцца толькі камбайнерскіх экіпажаў і вадзіцеляў.
Велічыня прэміі залежыць ад маркі камбайна і намалоту. Напрыклад, экіпаж, які працуе на КЗС-1218, за 400 тон намалочанага збожжа – атрымае 10 рублёў, за 600 – 15, а за 1 тысячу – 30. Вадзіцель МАЗ-555-142 за першыя 400 тон перавезенага збожжа атрымае 10 рублёў, за 1 тысячу – 20.
Па словах спецыялістаў, камбайнеры і вадзіцелі штодзень на рукі атрымліваюць персанальныя бюлетэні.
ФАКТ*
Найбольшы заробак камбайнера за дзень склаў 87 рублёў, найменшы – 15.
Каментарый постфактум
Старшыня райкама прафсаюза работнікаў АПК Юрый Аляксандравіч Адула:
– Як бачна, дзесьці недапрацоўваюць ідэолагі, дзесьці – прафсаюзная лідары. Важна, каб падчас уборкі ўсе службы працавалі разам, як агульны механізм.
Для мяне паказальным быў вопыт работы ў СВК «Варняны», калі я сумяшчаў абавязкі юрысконсульта і ідэолага. Штодзень познім вечарам, часта – ноччу па мабільным тэлефоне мы прымалі справаздачу загадчыкаў зернескладаў. На камп’ютары звесткі «збіваў» у табліцу – і ў 6 гадзін раніцы яна ўжо ляжала на стале старшыні калгаса. Я не сцвярджаю, што менавіта так павінна быць наладжана работа ва ўсіх гаспадарках, – але хлебаробы, якія працуюць і ў святы, і ў выхадныя павінны ведаць, колькі каштуе іх праца, і маюць права на тое, каб за яе ім сказалі словы падзякі.
Знайсці інфармацыю пра намалоты, ураджайнасць збожжа і дасягненні любога ўдзельніка жніва можна на сайце райкама прафсаюза работнікаў АПК па спасылцы http://profapk.www.by/zatva2018
P.S. Пакуль матэрыял рыхтаваўся да друку, прагледзела сайты сельскагаспадарчых прадпрыемстваў. На 14.00 26 ліпеня звесткі пра перадавікоў жніва былі толькі на сайце КСУП «Гудагай» і «Гервяты».
* Звесткі на 25 ліпеня. Велічыня заробку залежыць ад намалоту, стажу камбайнера, класнасці, маркі і тэрміну эксплуатацыі камбайна і інш.
