З гісторыі Падольскай сярэдняй школы
Першага верасня 1977 года адчыніла свае дзверы Падольская сярэдняя школа. З таго часу прайшло 40 гадоў – гэта амаль што жыццё асобна ўзятага чалавека. А колькі такіх жыццяў, лёсаў прайшло праз гісторыю школы! Пра гэта можна даведацца з успамінаў настаўнікаў і вучняў, з фондаў школьнага музея і, уключыўшы фантазію, – з кнігі загадаў, якая была пачата ў жніўні 1977 года, калі Падольскую школу рыхтавалі да здачы ў эксплуатацыю.
Першы загад аб прызначэнні загадчыкам гаспадаркі Іосіфа Іосіфавіча Казлоўскага ў кнізе зарэгістраваны 2 жніўня. З наступных можна даведацца аб настаўніках, якія прыйшлі сюды працаваць, і аб вучнях, якія былі залічаны ў класы.
– Я добра помню дзень, калі адкрывалася новая школа, – расказвае сённяшні дырэктар школы, а тады – дзевяцікласнік, Іван Францавіч Сухарэўскі. – Калі праходзіла ўрачыстая лінейка, у школе яшчэ працавалі будаўнікі. Гэта бачна і на фотаздымках, што былі зроблены ў той дзень.
Пачатковая школа, якая да таго працавала ў Падольцах, размяшчалася ў прыстасаваным будынку. Пасля яе заканчэння хлопчыкі і дзяўчынкі ішлі ў дзесяцігодку ў Жукойні.
– Раніцай дабіраліся то на аўтобусе, то на калгаснай машыне, – расказвае Іван Францавіч. – А назад часцей за ўсё ішлі пешшу. Канешне, быў маршрутны аўтобус Астравец – Пабрадзе, але вярнуцца дахаты на ім маглі толькі старшакласнікі: малодшым месца ў аўтобусе не хапала.
Дзяцей у мікрараёне Падольскай школы на той час было шмат – таму і прынялі рашэнне аб узвядзенні ў Падольцах трохпавярховага будынка сярэдняй школы.
– Вялікую ролю ў тым, што ў нашай вёсцы з’явілася сярэдняя школа, адыграў тагачасны дырэктар саўгаса «Падольскі» Леанід Сцяпанавіч Рубан, – гаворыць Іван Францавіч Сухарэўскі. – Пры падтрымцы саўгаса школу аснасцілі сучасным на той час абсталяваннем і тэхнікай.
Як сведчыць усё тая ж кніга загадаў, у многіх кабінетах былі тэлевізары і дыяпраектары, прайгравальнікі і фільмаскопы, магнітафоны, кінаапараты і фотаабсталяванне. Школа магла пахваліцца радыёвузлом і лінгафонным кабінетам. І гэта, нагадаю, у 70-я гады!
Першага верасня 1977 года ў Падольскую школу былі залічаны 265 вучняў. Класы былі немаленькія: у 4-м вучылася 32 вучні, у 7-м – 36, у 5-м – 27, у 10-м – 24, а ў 8-м – ажно 42, таму яго падзялілі на «А» і «Б».
У першы клас у той год прыйшлі 13 хлопчыкаў і дзяўчынак – яны і сталі галоўнымі героямі школьнай урачыстасці, якая адбылася 1 верасня 1977 года. Фотаздымак з той першай школьнай лінейкі захоўваецца ў школьным музеі.
На ім – 11 хлопчыкаў і дзяўчынак, для якіх упершыню празвінеў першы званок. Адна з іх, Луцыя Літвіновіч (Луцыя Казіміраўна Супрановіч), сёння працуе настаўніцай пачатковых класаў Падольскага НПК. Яна разам з дырэктарам школы і стала ініцыятарам сустрэчы аднакласнікаў, якая адбылася ў Дзень ведаў.
– Думаю, што той першавераснёўскі дзень застаўся ў памяці ўсіх маіх аднакласнікаў, – успамінае Луцыя Казіміраўна. – Спачатку мы сабраліся каля старой школы – гэты будынак не захаваўся, – і ўсе вучні строем накіраваліся ў новую школу.
Вялікі трохпавярховы будынак уражваў і дзяцей, і дарослых.
– Тут была спартыўная зала і сталовая, пра якія мы нават не марылі, – расказвае сённяшні дырэктар. – Лінейка прайшла, а потым яшчэ не адзін месяц старэйшыя школьнікі і настаўнікі працавалі на добраўпарадкаванні школы і прышкольнай тэрыторыі.
На ўроках працы школьнікі выпілоўвалі плашкі для плоту, у вольны час настаўнікі і вучні закладвалі школьную цяпліцу з абагрэвам: расаду і агародніну тут вырошчвалі круглы год.
Пры школе меўся інтэрнат, у якім жылі дзеці з аддаленных вёсак. Пазней саўгас пабудаваў жылы дом для настаўнікаў.
Школу і настаўніцкі калектыў узначаліла дырэктар Жукойненскай школы Лідзія Іванаўна Рубан.
– Яна была строгая, але справядлівая – нам так здавалася, – успамінае Луцыя Казіміраўна Супрановіч. – Прынамсі, нас, малышоў, з рознымі характарамі, яна разумела. Лідзія Іванаўна цудоўна ведала матэматыку і выкладала яе цікава, па-сучаснаму. А яшчэ яна шмат дзе бывала і мы, вясковыя дзеці, з захапленнем слухалі яе цікавыя расповеды.
На той час у пачатковых класах адзін настаўнік працаваў з двума класамі: і першы вучыўся разам з трэцім.
– Тады мы не разумелі, наколькі складана было настаўніцы – Вользе Віктараўне Калач. Але яна ўсё паспявала. З ёй было цікава – гэта цяпер я разумею, што кожны ўрок яна прадумвала да драбніц.
– Затым нашым класным кіраўніком стала Лілія Іванаўна Печатоўская, – расказвае Луцыя Казіміраўна пра настаўнікаў, – кожны з якіх пакінуў след у дзіцячых душах. – Нягледзячы на тое што хлопцаў у нашым класе было больш і кожны з іх быў з характарам, настаўнікам удалося аб’яднаць нас у дружны калектыў. Мы ўдзельнічалі ва ўсіх школьных мерапрыемствах – нам гэта падабалася.
У 2007 годзе Падольская сярэдняя школа атрымала новае жыццё – яе капітальна адрамантавалі ў рамках будаўніцтва ў вёсцы аграгарадка.
– Зроблена было шмат, – расказвае дырэктар школы. – Замянілі вокны і дзверы, усталявалі новае абсталяванне на харчблоку, памянялі асвятленне. Толькі, на жаль, дзяцей у нас цяпер нерапаўнальна менш, чым у 1977 годзе. Сёння ў школе вучыцца 53 школьнікі, 17 дзетак наведваюць дзіцячы садок. У мінулым годзе ўпершыню ў гісторыі школы мы не набралі першы клас. Затое сёлета для 9 першакласнікаў, як і сорак гадоў назад для самага першага класа школы, празвінеў першы званок.
Ён празвінеў і для тых, хто ўпершыню пераступіў парог школы ў далёкім 1977 годзе. Першыя першакласнікі зноў сустрэліся са школай і дзяцінствам, убачылі аднакласнікаў, успомнілі ўрокі і тых, хто падарыў веды.
Узгадаць тую далёкую першавераснёўскую лінейку мы папрасілі некаторых вучняў, якія 1 верасня 1977 года прыйшлі першы раз у першы клас Падольскай школы.
Іосіф Шылько:
– Запомніліся прыгожыя ранцы з алоўкамі, сшыткамі, каляровай паперай і іншымі канцылярскімі таварамі, якія нам падарылі шэфы – саўгас «Падольскі». А яшчэ помню, як старшакласнікі прывялі нас у клас і пасадзілі за парты. Заўсёды са шчымлівай радасцю ўспамінаю першую настаўніцу Вольгу Віктараўну Калач. Зрэшты, можна сказаць, што са школай я і не развітваўся. 23 гады працаваў тут настаўнікам працоўнага навучання, чарчэння і геаграфіі.
Уладзімір Радзько:
– Хоць і было гэта 40 гадоў назад, але першы дзень у школе не забываецца. Новая школа, аднакласнікі, шмат настаўнікаў – яны здаваліся такімі маладымі. І сёння я ўспамінаю сваю першую настаўніцу – Вольгу Віктараўну Калач, а таксама дырэктара школы Лідзію Іванаўну Рубан – строгую і справядлівую. А колькі добрых успамінаў звязана з нашым класным кіраўніком – Ліліяй Іванаўнай Печатоўскай!
Школьныя гады нельга забываць – тады губляецца сувязь пакаленняў.
Луцыя Літвіновіч (Супрановіч):
– З 47 гадоў майго жыцця 34 звязаны са школай. Спачатку тут вучылася, а потым прыйшла працаваць. І таму гэта адно з самых дарагіх для мяне месцаў на зямлі. На трыццацігадовы юбілей Падольскай школы сабралася палова нашага класа. Сёлета – шэсць. На жаль, двух нашых аднакласнікаў – Дзмітрыя Гурскага і Ніны Кавалеўскай – ужо няма. З Нінай я сядзела за адной партай… Нам усё падабалася ў школе. З асаблівым пачуццём мы чакалі групу падоўжанага дня, калі настаўнік паказваў дыяфільмы – праўда, гэты падарунак трэба было заслужыць. Але гэта было і стымулам. Мы садзіліся ў радок, настаўніца занавешвала шторы – і пачыналася казка…
Анатоль Шылько:
– Канешне, помню! Мне з маёй аднакласніцай Мірай Іллюк выпала прабегчы са званком у руках перад усёй школай. Вельмі хваляваліся – але і радаваліся, што менавіта нам выпаў такі гонар.
Помню: спачатку я сядзеў за партай са стрыечным братам Іосіфам Шылько. Мы шмат смяяліся, таму нас рассадзілі.
Школьнае жыццё было вясёлым – і такім засталося ў памяці.
Аляксандр Астапец:
– Лінейка тады праходзіла на пляцоўцы каля ўваходу ў спартыўную залу. Напэўна, таму, што мы былі яшчэ зусім малымі, усе здаваліся нам вельмі высокімі. І мы, адкрыўшы рот, глядзелі на старшакласнікаў і настаўнікаў.
Наша першая настаўніца, Вольга Віктараўна Калач, была строгай – напэўна, такой і павінна быць настаўніца, каб даць дзецям веды. Хоць ні раней, ні цяпер я не дзялю настаўнікаў на добрых і дрэнных. Кожны з іх застаўся ў памяці: Ядвіга Іосіфаўна Капуста, Людміла Фабіянаўна Валадзько, Лідзія Іванаўна Рубан… Пералічваць можна і варта многіх.
А школа – гэта тое месца, дзе і праходзіць станаўленне асобы. Таму яна заўсёды ў маёй памяці. На жаль, часта заходзіць сюды не атрымліваецца, але, калі прыязджаю на радзіму, стараюся хаця б прайсці міма.
Першы і трэці класы Падольскай школы. 1977 год
Л.К. Супрановіч
Дырэктар школы І.Ф. Сухарэўскі ў школьным музеі