Островецкий лесхоз отмечает 50-летие
50 гадоў – залаты ўзрост, калі можна прыгадаць тое, што зроблена, і намеціць планы на будучыню; калі разважлівасць і вопытнасць дазваляюць прадбачыць вынікі дзейнасці на некалькі гадоў наперад…Сёлета ДЛГУ “Астравецкі лясгас” адзначае менавіта такую сур’ёзную і важную дату – 50-годдзе з дня ўтварэння.
Афіцыйны адлік жыцця лесагаспадарчая ўстанова распачала 7 ліпеня 1966 года, калі быў падпісаны загад Галоўнага ўпраўлення лясной гаспадаркі пры Савеце Міністраў БССР. На базе чатырох лясніцтваў Смаргонскага лясгаса – Астравецкага, Кямелішкаўскага, Варнянскага і Міхалішкаўскага – утварыўся новы лясгас – Астравецкі.
Шмат вады сцякло з таго часу. Чатыры лясніцтвы “разрасліся” да дзевяці. Адміністрацыйныя будынкі набылі новыя “твары”, а для працаўнікоў былі створаны камфортныя ўмовы для працы і адпачынку. Пры лясгасе адкрыўся сучасны дрэваапрацоўчы цэх, а драўніну ўжо нарыхтоўваюць не толькі людзі, але і разумныя сучасныя машыны – фарвардары і харвэстары. Літаральна за апошнія тры гады быў створаны новы лесагадавальнік, дзе актыўна выкарыстоўваецца фінская тэхналогія па вырошчванні пасадачнага матэрыялу. У палушскіх лясах у вальерах гуляюць алені, лані, муфлоны. Дзеці абіраюць дарогу бацькоў – прадаўжаюцца дынастыі лесаводаў. А колькі лесу было пасаджана за гэты час!
50 гадоў – залатая сярэдзіна, калі новыя тэхналогіі ў лесакарыстанні гарманічна спалучаюцца з запаветамі ветэранаў. Яны ўжо сталі лейтматывам усіх работнікаў Астравецкага лясгаса: зберагаць і прымнажаць лясное багацце роднага краю.
