В Островце впервые прошёл семейный фестиваль
15 мая, калі адзначаўся Міжнародны дзень сям’і, у Астравецкім раёне адбыўся першы ў сваім родзе фестываль сямей. Ініцыятарам яго правядзення стала урач акушэр-гінеколаг цэнтральнай раённай бальніцы Наталля Іванаўна Івашка. Дапамаглі ёй у арганізацыі свята раённы аддзел ідэалагічнай работы, культуры і па справах моладзі, Цэнтр творчасці дзяцей і моладзі, Тэрытарыяльны цэнтр абслугоўвання насельніцтва і ўвогуле ўсе, для каго сямейныя каштоўнасці маюць асаблівае, самае галоўнае ў жыцці значэнне.
Фестываль сямей планавалася правесці з вялікім размахам ў лесапаркавай зоне, але гэтаму перашкодзіў дождж. Таму свята тэрмінова перабазіравалася ў кінаканцэртную залу “Астравец” – але гэта не сапсавала настрой ні дзецям, ні дарослым, якія прыйшлі на свята.
З-за непагадзі не атрымаўся запланаваны парад дзіцячых калясак. Але бацькі паўтарагадовага Цімафея Коўзана і чатырохмесячнага Валодзі Тараненкі не спалохаліся непагадзі і прыйшлі на свята з тэматычна аформленымі каляскамі – і атрымалі за гэта падарункі.
Тое, што цяжарнасць можа быць прыгожай, а адзенне для цяжарных – не толькі зручным, але стыльным і модным, прадэманстравалі будучыя мамы, якія, нібы сапраўдныя мадэлі па подыуму, прайшлі па сцэне кінаканцэртнай залы.Фестываль быў багатым на розныя конкурсы: мамы спаборнічалі ў спрыце, таты – у сіле і вытрымцы, а сем’і – ва ўменні намаляваць дом сваёй мары.
Увесь час ў зале працавалі інфармацыйныя пляцоўкі, дзе ўрачы цэнтральнай раённай бальніцы давалі кансультацыі маладым і будучым мамам.
Гледачоў радавалі сваімі талентамі астравецкія артысты і выхаванцы Цэнтра творчасці дзяцей і моладзі.Так што надвор’е не здолела сапсаваць свята: гледачы пакідалі залу ў прыўзнятым настроі.
Хочацца спадзявацца, што гэты сямейны фестываль стане пачаткам яшчэ адной добрай прыгожай традыцыі.
Падрабязны рэпартаж пра сямейны фестываль чытайце ў суботнім выпуску "АП"
Фота Івана Дзятловіча.
