Як гэта – стаць у 17 гадоў юрысконсультам такой вялікай гаспадаркі, як КСУП “Гудагай”, расказвае Вера Сівец

У іх розная спецыфіка дзейнасці, успрыманне, але аб’ядноўвае іх тое, што першыя крокі ў прафесію яны робяць у КСУП «Гудагай». Моладзь, якая тут працуе, расказала пра выбар прафесіі і пра тое, чым для іх з’яўляецца іх гаспадарка.  

Юрысконсульт

Вера Сівец:

– Пра прафесію юрыста марыла з дзя­цінства. Магчыма, з-за таго, што ў свой час перагле­дзела шмат серыялаў крымінальнай тэматыкі накшталт «Вяртанне Мухтара», «Ментаўскія войны» і іншыя. (Усміхаецца.) 

У школе, акрамя таго што ўзмоцнена зай­малася рускай мовай, цікавілася грамада­знаўствам. Дзякуючы алімпіядам і конкурсам зразумела, што менавіта гэта галіна для мяне найбольш блізкая. Таму вырашыла працягнуць адукацыю ў гэтым накірунку. Для паступлення выбрала юрыдычны каледж Беларускага дзяржаўнага ўніверсітэта. Мне падалося гэта добрым варыянтам. Па-першае, гэта філіял самай прэстыжнай вну ў нашай краіне; па-другое, разумела, што з-за высокіх прахадных балаў там будуць вучыцца таленавітыя і мэтанакіраваныя юнакі і дзяўчаты, што стварае выдатную магчымасць развівацца ў асяроддзі матываванай і адукаванай моладзі.

Паралельна з работай цяпер завочна вучу­ся на апошнім курсе юрфака Белдзярж­уні­версітэта, праўда, спецыялізацыю выбрала судова-пракурорска-следчага профілю. На­пэўна, каб пашырыць свой кругагляд і крыху абстрагіравацца ад работы грамадзянскай накіраванасці. (Усміхаецца.)

Калі скончыла каледж, мне было 17 гадоў. З блізкімі мы разглядалі розныя варыянты: і сталіцу, і іншыя гарады. Улічваючы, якія пра­паноўвалі зарплаты маладым спецылістам з юрыдычнай адукацый, заставацца ў Мінску было немэтазгодна. Пра вакансію ў КСУП «Гудагай» даведаліся выпадкова. Сустрэліся з Эдуардам Іванавічам, ён праявіў давер і ўзяў мяне. У гэтай гаспадарцы я з 2021 года.

Наша прадпрыемства сельскагаспадарчае, таму ў сваёй рабоце я сутыкаюся абсалютна з рознымі сферамі. У мяне не толькі дагаварная і прэтэнзійна-іскавая работа, падача да спагнання запазычанасцей, але і афармленне спонсарскай дапамогі, бязвыплатнай перадачы аб’ектаў, вядзенне дзелавой перапіскі – шмат нюансаў, таму што мы дзяржпрадпрыемства…

Дапамагаю з прававой базай калегам з іншых аддзелаў. Удзельнічаю ў распрацоўцы лакальных нарматыўна-прававых актаў, у тым ліку калектыўнага дагавора.

Работу імкнуся выконваць правільна, дакладна і ў тэрмін. У мяне няма такога, каб неш­та адклала, усе пытанні стараюся вырашаць па меры іх паступлення. Нават калі ўпэўнена ў нечым на ўсе 100%, усё адно пераправеру – заканадаўства хутка мяняецца. Добрае падспор’е – прававыя базы, напрыклад, праграмы «Бізнес-інфо», «Айлекс». Ёсць шмат сумежных пытанняў, таму заўсёды можна звярнуцца да калег – паміж усімі нашымі аддзеламі наладжана ўзаемадзеянне.

Таксама я ўзначальваю пярвічку БРСМ. У КСУП «Гудагай» працуе 71 чалавек ва ўзросце да 31 года. З калегамі стараемся ўдзель­нічаць у мерапрыемствах, якія ладзіць наш райкам. Нават некалькі дыпломаў маем. (Усміхаецца.)

Не толькі для маладых спецыялістаў, але і для ўсіх работнікаў калдагаворам прадугледжана шмат бонусаў: выплата пад’ёмных, прадастаўленне жылля і кампенсацыя за яго з’ём, падвоз, бясплатныя пуцёўкі ў лагер і санаторый для дзяцей работнікаў... Словам, у нас ніхто не абдзелены!

КСУП «Гудагай» – стабільная арганізацыя, якая дае сваім супрацоўнікам магчымасць развівацца. Многія ў нас пастаянна прахо­дзяць курсы павышэння кваліфікацыі. Кіраўніцтва заўсёды ідзе насустрач, адкрыта для ўзаемадзеяння і супрацоўніцтва, і гэта адчуваецца, калі ты малады спецыяліст. Ведаю з уласнага досведу. 

Гэта самая лепшая гаспадарка ў раёне па многіх накірунках. Я рада, што трапіла на работу менавіта сюды. Гэта дало мне непераўзыдзенную магчымасць спазнаць знутры спецыфіку работы дзяржаўнага прадпрыемства».