Мікалай Пляшчоў у “Памяці народа”
Здаецца, за амаль 80 гадоў з дня Перамогі мы ўсё ведаем пра падзеі Вялікай Айчыннай вайны, пра подзвігі герояў, пра вязняў канцлагераў і ветэранаў, якія жылі на нашай Астравеччыне або абаранялі яе.
Аднак гэта не так. І расказаць нешта новае або проста напомніць імёны абаронцаў Радзімы, дзяцей вайны, вязняў канцлагераў могуць работнікі арганізацый і прадпрыемстваў раёна. Каб яны гэта зрабілі, мы запусцілі сумесны праект газеты і раённага прафсаюза «Я хачу вам расказаць».
Ні адну сям’ю не мінула Вялікая Айчынная: бацька ці маці, браты і сёстры, дзеці – многія не вярнуліся з поля бою…
Дзед старшыні прафсаюзнай пярвічкі астравецкай меліярацыі Надзеі Ненартовіч прайшоў усю вайну і быў узнагароджаны за вернасць і служэнне Радзіме, а вось яго братам не так пашанцавала.
– Нарадзіўся дзядуля, Мікалай Фаміч Пляшчоў, на Віцебшчыне, у вёсцы Ізухава ў 1922 годзе. Адтуль у 1941-м і быў прызваны на фронт. Дзень і месяц яго нараджэння дакладна невядомы, толькі год. Нават у пасведчанні аб шлюбе ўказалі «было 26 гадоў». Па меркаванні родных, дзесьці, у сакавіку.
ПРА СЯМ’Ю
– У Пляшчовых было 11 дзяцей, двое з якіх памерлі малымі. З вялікай сям’і ваяваў не толькі дзядуля, але і яго браты, і бацька, мой прадзед. Прадзядуля і два сыны з вайны не вярнуліся. Выжылі трое, адзін з іх застаўся без вока.
Не ведаю дакладна, чаму, але Мікалай, узяўшы з сабою двух братоў, пераехаў жыць на Астравеччыну. Ажаніўся дзядуля ў 1948 годзе.
Мікалай Пляшчоў усё жыццё адпрацаваў у мясцовым камбінаце будаўнічых матэрыялаў сталяром.
Пайшоў з жыцця ў 1991-м.
ПРА ВАЙНУ
– На жаль, узнагарод Мікалая Фаміча мне ў руках патрымаць не давялося. А ордэн, які выдавалі ўжо ў астравецкім ваенкамаце ў мірны час, быў пахаваны з ім у магіле. Не засталося і пацвярджаючых папер.
Пра тое, што дзядуля ваяваў і быў неаднаразова ўзнагароджаны, мы знайшлі інфармацыю на сайце «Памяць народа». Там жа ў юбілейнай картатэцы змешчаны запіс аб узнагароджанні ордэнам Айчыннай вайны II ступені. Упамінаецца імя Мікалая Пляшчова і ў праекце «Дарогамі памяці» – з кароткім подпісам «чырвонаармеец».
Быў удзельнікам савецка-японскай вайны 1945 года.
ПРА ЎЗНАГАРОДЫ
Па знойдзеных звестках, служыў сяржант Мікалай Пляшчоў у воінскай часці 84-га гвардзейскага танкавага палка 30-й гвардзейскай механізаванай брыгады 9-га гвардзейскага механізаванага корпуса.
Медаль «За баявыя заслугі» механіку-вадзіцелю Пляшчову ўручылі за тое, што «…ён у перыяд баявых дзенняў палка супраць японскага імперыялізму па баявым маршруце пустынна-бязводнай мясцовасці ў гарах Вялікага Хінгана прывёў баявую машыну ў пункт прызначэння без адзінай аварыі і паломкі. Машына ўтрымліваецца ў выдатным стане». (З загада аб узнагароджанні. – Заўв.аўт.)
У верасні 1945-га Пляшчоў узнагароджаны медалём «За перамогу над Японіяй», якога ўдастоены ваеннаслужачыя часцей Чырвонай арміі і ваенна-марскога флоту, што прымалі непасрэдны ўдзел у баявых дзеяннях.
У 1945-м Мікалай Фаміч узнагароджаны і медалём «За перамогу над Германіяй у Вялікай Айчыннай вайне 1941-1945 гг.».
Фота з архіва Н. Ненартовіч.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.