Як не разбіцца на горцы – падказвае траўматолаг

08:50 / 21.01.2019

Як аматарам зімніх забаў весела правесці час на горцы, разагнаць санкі да хуткасці ветру і не трапіць на бальнічны ложак, расказвае траўматолаг Астравецкай ЦРБ Сяргей Вырвіч:

– Асноўная хваля зваротаў з траўмамі, атрыманымі падчас катання з горкі, прыпала на канец снежня. Сярод нашых пацыентаў не толькі дзеці, хоць яны і атрымліваюць падобныя траўмы нашмат часцей, але і дарослыя. Аматары катання на санках, цюбінгах і іншых сродках атрымання «горачнага» экстрыму звяртаюцца за дапамогай з сінякамі, драпінамі, пераломамі касцей, чэрапна-мазгавымі траўмамі.

Падчас прыёму траўміраваных дзяцей часта высвятляецца, што былі яны на горцы без нагляду дарослых, а ў некаторых выпадках бацькі нават не ведалі, дзе бавіць вольны час іх дзіця.

Любыя прыстасаванні для катання – санкі, лядзянкі, цюбінгі – бяспечныя, калі быць уважлівым і ведаць, як імі карыстацца. Перад тым як уручыць сыну або дачцэ санкі, праверце, ці няма на іх завостраных вуглоў, штыроў або абламаных дошчачак. Купілі дзіцяці лыжы – перад кожным «выгулам» праверце на іх мацаванне абутку. Катанню на цюбінгу таксама трэба вучыцца: як сесці, як «руліць»…

Калі ж «прызямленне» аказалася жорсткім – на хвасцец – і вы адчулі боль у спіне, то абавязкова звярніцеся да ўрача. А вось прыкметы чэрапна-мазгавой траўмы могуць праявіцца нашмат пазней. Да іх адносяцца страта свядомасці, галавакружэнне і ваніта, галаўныя болі. Расцяжэнне і разрывы звязак нават вопытны ўрач не зможа вызначыць «на вока», тым больш не зробіць гэтага сам пацыент. Аднак і гэта траўма, як і пералом, патрабуе лангеты. Калі гэтага не зрабіць, наступствы могуць быць сур’ёзнымі.

Да слова, да зімовых траўм можна аднесці і абмаражэнні, ад якіх часцей за ўсё пакутуюць дзеці. Абмарозіцца можна не толькі пры мінусавых тэмпературах, але і пры +3-4, асабліва калі ў дзяцей прамоклі рукавіцы і абутак. Час іх знаходжання на вуліцы таксама трэба абмяжоўваць: гадзіну пагулялі – паўгадзінкі пагрэліся дома.

РАІМ
*Адказна аднясіцеся да любога спуску на любым відзе «транспарту».
*Выбірайце спадзістыя горкі.
*Апранайце аб’ёмнае адзенне – да прыкладу, камбінезон.
* Абутак павінен быць зручным, высокім, цёплым, з тоўстай падэшвай і тугой шнуроўкай.
* Галаўны ўбор засцеражэ галаву ад магчымых удараў.
* Не астаўляйце дзяцей на горках без дагляду, вучыце іх пазбягаць бяспекі і бачыць перашкоды.
* Падстрахоўвайце дзяцей на ніжэйшай кропцы спуску, зарання правярайце адсутнасць там камянёў, слупоў або вадаёма.

25 чалавек звярнулася за дапамогай у раённую паліклініку з траўмамі рознай ступені цяжкасці, якія яны атрымалі падчас катання з горкі. Зафіксаваны 2 выпадкі пералому ў дзяцей вялікіх галёначных касцей.