Сахарная свёкла отправляется в Слуцк

09:16 / 29.10.2016

Кожны дзень Слуцкі цукровы завод прысылае за сыравінай на чыгуначную станцыю “Гудагай” да 15 вагонаў: за змену некалькі пагрузчыкаў загружаюць у іх да 1 тысячы тон цукровых буракоў. А глянеш – здаецца, і знаку няма: “цукровыя горы” не меншаюць.

– Дзень на дзень не прыходзіцца, – гаворыць механізатар Сельгастэхнікі Анатоль Віктаравіч Тарашкевіч. – Учора, напрыклад, загрузіў 13 вагонаў, а сёння – толькі 8.

Загадчык сектара раслінаводства ўпраўлення сельскай гаспадаркі і харчавання Віктар Багданавіч Чума расказаў, што сёлета, у параўнанні з мінулым годам, тэрміны адгрузкі цукровых буракоў зацягнуцца. Гэта звязана з высокай ураджайнасцю, а таксама з тым, што сёлета плошча пад імі павялічылася на 400 гектараў. У гэтым годзе раённыя аграрыі збіраюць карняплодаў на 123 цэнтнеры з гектара больш, чым летась.

– Пры здачы буракоў на перапрацоўчае прадпрыемства ўлічваецца іх цукровістасць і забруджанасць, – патлумачыў галоўны аграном раёна. – Сёлета цукровістасць астравецкіх буракоў складае 16,45 працэнтаў, забруджанасць – 8,3 працэнта – гэта высокія паказчыкі. Самыя салодкія буракі атрымаліся ў саўгасе “Падольскі” – 17,44 працэнта.

Па стане на 25 кастрычніка буракі выкапаны на 1 138 гектарах, што складае 71 працэнт ад плана. СВК “Гудагай” ужо цалкам справіўся з уборкай і адгрузкай буракоў. Гудагайскія цукраводы паставілі ў Слуцк амаль 14 тысяч тон буракоў.

А самыя важкія ў раёне цукровыя буракі выраслі ў СВК “Міхалішкі”: іх ураджайнасць складае рэкордныя 610 цэнтнераў з гектара.

У саўгасе “Падольскі” буракі пакуль выкапаны на плошчы ў 50 гектараў. Для іх уборкі задзейнічаны прыватны буракаўборачны камбайн.

НА ЗДЫМКУ: на адным з пагрузчыкаў на чыгуначнай станцыі “Гудагай” працуе Анатоль Віктаравіч Тарашкевіч.

Алена ГАНУЛІЧ, фота аўтара.

Похожие новости