Как устроен современный профилакторий для телят на МТК «Гоза» КСУП «Гервяты»
У разрэзе вобласці наш раён выглядае вельмі годна: усяго на Астравеччыне 20 падобных аб’ектаў, у тым ліку 2 узвялі ў гэтым годзе ў дастаткова сціслыя тэрміны.
У чым перавага такога жытла для цялят, чаму краевугольным каменем у працэсе гадоўлі жывёлы з’яўляецца строгая дысцыпліна і выкананне тэхналогій – пра гэта і многае іншае карэспандэнт даведаўся на малочна-таварным комплексе «Газа» КСУП «Гервяты», дзе 18 жніўня справілі наваселле ў новым прафілакторыі.
Кампетэнтна
Вольга Умрыхіна, першы намеснік начальніка ўпраўлення сельскай гаспадаркі і харчавання:
Адным з лідараў стаў наш раён. Летась на Астравеччыне ўзведзена 5 аб’ектаў, сёлета 2 – на базе МТК «Беразоўка» (аграфірма «Варняны») і МТК «Газа» (КСУП «Гервяты»).
На кожным малочна-таварным комплексе ёсць падобныя прафілакторыі для ўтрымання маладняку. Там сучасныя кормакухні, ёсць пастэрызатары, малочныя таксі ці транспарціроўшчыкі малака, мыйшчыкі сосак і вядзерац.
Галоўная мэта такіх маштабных інвестыцый у жывёлагадоўчую галіну – аблегчыць цяжкую працу цялятніц, аўтаматызаваць руцінныя працэсы, а таксама максімальна забяспечыць захаванасць маладняку і ўмацаваць здароўе жывёлы з першых дзён жыцця.
Нагадаю перагісторыю МТК «Газа». Пяць гадоў назад гэты комплекс адышоў КСУП «Гервяты». Найперш тут зрабілі рэканструкцыю: перакрылі дахі ў некалькіх памяшканнях і адрамантавалі іх, усталявалі новую сістэму гноевыдалення, забетаніравалі пляцоўкі.
Паклапаціліся і пра жывёлу: рацыёны розных груп сталі збалансаванымі, у кароўніках на месцах лёжкі з’явіліся спецыяльныя дыванкі, а сумесь на сталы рагулям стаў развозіць кормараздатчык. На першы погляд можа падацца, што змяненні і не такія маштабныя, але вынік не прымусіў сябе чакаць.
Літаральна за месяц-два тут цалкам выйшлі на малако гатунку экстра, яго таварнасць дасягнула 95%, выраслі надоі і валоўка. Для параўнання: калі напачатку 2022 года за дзень з «Газы» на перапрацоўку адпраўлялі 4,5 тоны малака, то ў 2026-м – 12. Дойны статак вырас з 300 да 420 галоў. Таму на гэтым аб’екце наспела патрэба ў маштабаванні вытворчасці.
Хоць, у адрозненне ад іншых малочна-таварных комплексаў, тут не замкнуты цыкл гадоўлі жывёлы, тым не менш, быў вельмі патрэбен сучасны прафілакторый для цялят.
Узводзіць яго з нуля на тэрыторыі МТК узяліся будаўнікі з ААТ «ПЕРФАРАТАР». Яны справіліся з задачай у тэрмін: будаўніча-мантажныя работы завяршыліся ў сярэдзіне жніўня.
Кампетэнтна
Генаефа Харкевіч, начальнік МТК «Газа»:
На комплексе і да будаўніцтва прафілакторыя добра клапаціліся пра цялят, упэўнена, што такі падыход захаваецца і надалей.
З плюсаў арганізацыі памяшкання для гадоўлі цялят – тое, што ў лепшы бок зменяцца ўмовы працы для жывёлаводаў.
Лічба
710 тысяч рублёў (крэдыт і ўласныя сродкі) затрачана на будаўніцтва прафілакторыя і набыццё неабходнага абсталявання.
Неаспрэчны плюс у тым, што прафілакторый на 152 пастановачныя месцы збудаваны з улікам прынцыпу «пуста-занята» – гэта залатое правіла тэхналогіі вырошчвання маладняку буйной рагатай жывёлы. Напрыклад, нельга засяляць і вызваляць асобныя стойла-месцы паасобку. Секцыя павінна быць вызвалена ад жывёлы цалкам. Пасля таго як яна стала «нежылой», праводзяць грунтоўную ачыстку, дэзінфекцыю, санацыю, прасушку. Толькі пасля ў «аддзяленне» засяляюць новую групу цялят.
Запаўняць прафілакторый на МТК «Газа» плануюць па меры ацёлаў. У дзень майго прыезду тут быў з дзясятак цялят; астатніх, якія нарадзіліся да ўвядзення ў эксплуатацыю аб’екта, утрымліваюць на вуліцы ў індывідуальных дамках.
Як адзначыў дырэктар КСУП «Гервяты» Ігар Жданаў, узвесці прафілакторый – толькі палавіна справы. Куды больш важным патрабаваннем з’яўляецца няўхільнае захаванне тэхналогіі гадоўлі. Менавіта таму ў гэтай гаспадарцы (як, зрэшты, і ў іншых перадавых сельгаспрадпрыемствах) тэхналагічная дысцыпліна ўзведзена ў ранг закону.
Па вялікім рахунку, шлях да фарміравання высопрадукцыйнага статка і вялікіх надояў пачынаецца з маленькай цялушачкі. Менавіта ад першых месяцаў яе жыцця залежыць, ці вырасце добрая малочная карова. Таму штодзённы дбайны догляд, збалансаванае кармленне і своечасовае правядзенне ўсіх неабходных ветэрынарна-заатэхнічных маніпуляцый набываюць сёння архіважнае значэнне.
Кампетэнтна
Дмітрый Будай, галоўны заатэхнік КСУП «Гервяты»:
На працягу першых трох сутак малое ў ідэале атрымлівае малозіва маці. Пры вялікім прыплодзе можна выкарыстоўваць зборны прадукт.
Пры пераходзе з малозіва на малако ўводзім вітамінна-мінеральную дабаўку для стабілізацыі сістэмы стрававання.
Выпайка малаком адбываецца тры разы на дзень, на чацвёрты цяля прывучаюць да старцернага камбікорма. Пры гэтым абавязкова ў вядзерцы ёсць цёплая вада.
У прафілакторыі цяля ўтрымліваецца да 2-3 месяцаў.
Новы цялятнік запаўняецца толькі нованароджанымі. Напрыклад, у верасні на комплексе павінны ацяліцца 42 рагулі, таму адна секцыя запоўніцца. Па папярэдніх разліках цалкам прафілакторый будзе заняты маленькімі жыхарамі да канца года.
Пакуль на МТК працягваецца абуладкаванне кормакухні і закупка неабходнага абсталявання. Заказалі мыйныя машыны для сосак і вядзерац. У планах набыць яшчэ адно малочнае таксі з функцыяй пастэрызацыі.
Пра ўсіх цялят (81 галава) клапоціцца Таццяна Тумінская: на таксі дастаўляе малако, насыпае камбікорм, налівае цёплую ваду, мые вядзерцы, падсцілае салому… У жывёлагадоўлі жанчына ўсё жыццё: з 17-ці даіла кароў, а апошнія 7 гадоў працуе цялятніцай.
…Менавіта ў сучасным прафілакторыі ў першыя два-тры дні жыцця цяляці закладваецца генетычны і прадуктыўны патэнцыял жывёлы, а значыць – і эканоміка гаспадаркі.
