Спорт объединяет

– Не толькі я ўзрадаваны тым, што на такім узроўні прайшлі еўрапейскія баскетбольныя спаборніцтвы на Астравеччыне – прычым у другі раз, – расказвае Альфонсас Аўгуліс. –  Яшчэ ў мінулым годзе, калі толькі вяліся размовы аб тым, каб правесці турнір на Беларусі, старшыня Астравецкага раённага выканаўчага камітэта Адам Дзмітрыевіч Кавалька станоўча аднёсся да гэтай ідэі. Як бачым, менавіта дзякуючы падтрымцы главы раённай вертыкалі, у Астравецкім раёне прайшлі спаборніцтвы такога маштабу. Хочацца падзякаваць і  намесніку старшыні райвыканкама Віктару Збігневічу Свіле, кіраўніцтву аддзелаў адукацыі, спорту і турызму і ідэалагічнай работы, культуры і па справах моладзі, а за падтрыманне  парадку – супрацоўнікам Астравецкага РАУС.

Замежныя госці, якія былі размешчаны на базе Рымдзюнскіх школ, адзначалі беларускі парадак і добраўпарадкаванне нашых аграгарадкоў. Спартсмены, якія прыязджалі на падобныя спаборніцтвы ў 2010 годзе, спачатку не пазналі горад Астравец. Па іх словах, ён змяніўся да непазнавальнасці, вырас і папрыгажэў. Таксама ўдзельнікі баскетбольнага турніру адзначалі добразычлівасць і спагадлівасць мясцовага насельніцтва. Усіх захапіла жніво, якое ўпэўнена “крочыць” па раёне. Многія ўдзельнікі з задавальненнем фатаграфавалі на памяць хлебаробаў і камбайнераў.

Цудоўны канцэрт арганнай музыкі ў Гервяцкім касцёле і амаль двухгадзіннае выступленне народнага ансамбля  народнай песні “Кемяліна” ў Літоўскім культурна-асветніцкім цэнтры, думаю, запомніцца ўсім надоўга. Людзі змаглі не толькі дакрануцца душой да класікі, але і спазнаць праз песні сапраўдны каларытны беларускі фальклор.

Шкадую, што на турнір на Астравеччыну не трапілі спартсмены з Канады і ЗША: зацягнуліся справы з дакументамі. Хочацца адзначыць работу Пасольства Рэспублікі Беларусь у Літоўскай Рэспубліцы – яго супрацоўнікі ў кароткія тэрміны аформілі візы больш чым сотні людзей.

Упэўнены, што баскетбольны турнір аматарскіх каманд Еўро-пы яшчэ не раз будзе праходзіць на Астравеччыне.