Педагоги Островетчины на один день стали спортсменами

09:00 / 04.04.2016

У той дзень настаўнікі з усіх навучальных устаноў раёна спяшаліся ў гімназію №1. Але іх склікала не педагагічная нарада, не тэрміновае пасяджэнне і нават не чарговы конкурс. На гэты раз яны сабраліся разам, каб паспаборнічаць у розных відах спорту, на сваім прыкладзе прадэманстраваць перавагі здаровага ладу жыцця і камандны дух: раённая спартакіяда работнікаў сістэмы адукацыі прайшла цікава, насычана і весела.

Усе настаўнікі аб’ядналіся ў тры каманды: першую ўзначаліў дырэктар Рытанскай СШ Леанід Часлававіч Радзько, другую – кіраўнік Гудагайскай СШ Ганна Мечыславаўна Капцюг, а трэцюю – дырэктар Альхоўскай СШ Сяргей Анатольевіч Гаўрыловіч.

Такім чынам, змяніўшы строгія касцюмы на спартыўную форму, месца ля дошкі – на спортзалу, а крэйду – на ракетку, мяч ці гіру, настаўнікі Астравеччыны выйшлі на старт.

Адначасова праходзілі спаборніцтвы па некалькіх відах спорту: у адным месцы падымалі гіру, у другім – кідалі дроцікі, у трэцім гулялі ў настольны тэніс, а ў чацвёртым стралялі з вінтоўкі. Гэта быў сапраўдны спартыўны кактэйль задавальнення і адрэналіну для балельшчыкаў!

У гіравым спорце не было роўных Аляксандру Ляцкаму, які падняў гіру 83 разы. На адзін уздым адстаў ад яго Андрэй Бумбуль, які стаў другім. На трэцім месцы – Юрый Кусойць: 51.

У дартсе змагаліся і мужчыны, і жанчыны. Самай трапнай аказалася Кацярына Шаблавінская, якая выбіла 116 ачкоў. На другім месцы – Вольга Барысевіч: яе вынік 114 ачкоў. А Кацярына Емяльян заняла трэцяе месца – 88 ачкоў.

Сярод мужчын 148 ачкоў і першае месца ў Аляксандра Лузінава, другое – у Анатоля Кавалеўскага – 137 ачкоў, трэцім стаў Ягор Філіпаў – 117 ачкоў.

Цікавымі і відовішчнымі атрымаліся і паядынкі па настольным тэнісе. Сапраўдны майстар-клас прадэманстраваў Андрэй Баранаў, які і стаў пераможцам. Генадзь Аўсюкевіч заняў другое месца, а Віталь Кужын апынуўся на трэцім.

Сярод тэнісістак з першых партый вызначыўся бясспрэчны лідар – Анастасія Пашук. Другое месца заняла Іна Вінцкусь. Валерыя Аляксеева стала трэцяй.

Пільнае вока, упэўненая рука і цвёрдае жаданне трапіць “у дзясятку” – вось асноўныя правілы для ўдзельнікаў стральбы з пнеўматычнай вінтоўкі. Поўная канцэнтрацыя на мішэні, адрэналін – і ў выніку жаданыя ачкі. Пераможцай у гэтым відзе спаборніцтва стала Таццяна Кандратовіч, на другое месца “настраляла” Вольга Юргелянец, трэцяе заняла Анжэла Заяц.

Лепшымі стралкамі сярод мужчын сталі Пётр Каранеўскі, Уладзімір Батура і Аляксандр Лузінаў – першае, другое і трэцяе месцы адпаведна.

Самых хуткіх і энергічных пазмагацца за пальму першынства запрашаў лёгкаатлетычны крос. Спаборніцтва праходзіла сярод мужчын і жанчын у дзвюх узроставых катэгорыях: да 35 гадоў і пасля 35 гадоў.

Сярод старэйшых удзельнікаў, якія беглі дыстанцыю 1 000 метраў, першае месца заняў Мікалай Трафімчык. Другім фінішаваў Аляксандр Ляцкі. Трэцяе месца заняў Аляксандр Лузінаў.

Жанчыны ў гэтай катэгорыі беглі 500 метраў. Самай хуткай стала Іна Вінцкусь. На другім месцы апынулася Вольга Юргелянец. Трэцяе месца заняла Галіна Мядэйша.

Ва ўзроставай катэгорыі да 35 гадоў мужчыны пераадольвалі дыстанцыю 2 000 кіламетраў. Лепшымі ў выніку сталі Артур Грэчанік, Васіль Станкевіч і Юрый Кусойць – першае, другое і трэцяе месцы адпаведна.

Дзяўчаты беглі 1 000 метраў. Першай фінішавала Марыя Піскунова, на другім месцы Эдзіта Масейка, трэцяе заняла Жанна Свірская.

А затым надышоў час прадэманстраваць здольнасці гуляць камандай. Спачатку на спартыўнай пляцоўцы разыгрываліся валейбольныя жарсці. Пераможцай у выніку стала каманда С.А. Гаўрыловіча. Другое месца занялі валейбалісты каманды Л.Ч. Радзько. На трэцім аказаліся ігракі зборнай Г.М. Капцюг.

Не менш цікавымі і інтрыгуючымі атрымаліся і спаборніцтвы па міні-футболе. Здаецца, сілы ў ігракоў былі на зыходзе, але яны да апошняй хвіліны ўпарта змагаліся за перамогу. Лепш за ўсё гэта атрымалася ў каманды №2, на другім – каманда №1, трэцяе месца ў каманды №3.

У агульнакамандным заліку каманда №2 пад капітанствам Г.М. Капцюг заняла першае месца, каманда №1 Л.Ч. Радзько стала другой, а каманда №3 С.А. Гаўрыловіча – трэцяй. Усе пераможцы спартакіяды былі ўзнагароджаны медалямі, а прызёры атрымалі дыпломы.

-------------------------------

Марына МАЦКЕВІЧ.

Фота Антона МАЛЬШЭЎСКАГА.

Похожие новости