Как воспитать патриота, знают в Гудогайской школе
16:00 / 30.11.2015
Як не згубіцца ў вялізнай інфармацыйнай прасторы і зберагчы грамадзянскія і сямейныя каштоўнасці? Як дапамагчы дзіцяці сфарміраваць той стрыжань, які не дазволіць яму зламацца ў самых складаных жыццёвых сітуацыях? Хто з нас валодае звесткамі пра гісторыю сваёй сям’і, сваёй мясцовасці, пра сваіх знакамітых землякоў? Ці зможам мы зберагчы гэтыя веды для сваіх нашчадкаў?Знайсці адказы на гэтыя пытанні можна было ў Гудагайскай школе – тут прайшоў семінар па інавацыйнай дзейнасці.
Гудагайская сярэдняя школа ўвайшла ў лік 23 устаноў адукацыі рэспублікі, якія сталі пляцоўкай па рэалізацыі інавацыйнага праекта “Укараненне мадэлі вуснагістарычных даследаванняў гісторыі роднага краю як сродку развіцця сацыяльна-грамадзянскіх кампетэнцый вучняў”. За гэтай складанай і не кожнаму зразумелай назвай праекта крыюцца вельмі актуальныя напрамкі работы: патрыятычнае выхаванне, вывучэнне гісторыі роднага краю, усебаковае і ўзаемазвязанае пазнанне вучнямі прыроды, традыцый, абрадаў і фальклору мясцовага насельніцтва.
Удзельнікамі і гасцямі семінара сталі загадчык цэнтра прафесіянальнага развіцця і інавацыйнай адукацыі, кандыдат філасофскіх навук, дацэнт і кансультант інавацыйнага праекта Пётр Мікалаевіч Савасцёнак, галоўны спецыяліст аддзела адукацыі, спорту і турызму Астравецкага райвыканкама Людміла Міхайлаўна Апановіч, а таксама намеснікі дырэктараў школ раёна па выхаваўчай рабоце.
Гудагайскія школьнікі і педагогі прадставілі ўдзельнікам мерапрыемства цікавую пазнавальную праграму ў школьным музеі.
Загадчыца музея Марыя Карлаўна Васілёнак правяла ўрок “З гісторыі лёну”, падчас якога прысутныя змаглі ўбачыць многія рэчы, пра якія сёння ўжо не ведаюць, даведацца, як нашы продкі вырошчвалі лён. Вучаніцы педагагічнага класа Арына Лаўрэцкая, Анжаліка Гурштын, Вераніка Лапшэвіч, Ілона Акушка правялі экскурсію па музеі. Парадавала, што дзяўчаты добра ведаюць гісторыю роднага краю і выдатна размаўляюць на беларускай мове.
Цікавым момантам семінара стаў міні-канцэрт “Як любіш свой край, дык песні яго спявай”, які паказалі ўдзельнікі хору “Беларусачка”.
Вынікі патрыятычнага выхавання пакажа жыццё. А сёння можна зрабіць першыя высновы, галоўная з якіх: павялічваецца цікавасць дзяцей да вывучэння гісторыі роднага краю. А гэта значыць, што працуем мы не дарма.
---------------------------------
Жанна БЕРНЮКЕВІЧ, намеснік дырэктара Гудагайскай СШ.
