“Нам давяраюць!”- пад такім дэвізам сёлета праходзіць міжнародная выстаўка “СМІ ў Беларусі”
Слоган “Нам давяраюць!” – не проста прыгожыя словы: у сваім выступленні на канферэнцыі “Сродкі масавай інфармацыі ў мяняючымся свеце: прафесіяналізм і адказнасць” дырэктар інстытута сацыялогіі НАН Беларусі Ігар Катляроў прывёў дадзеныя сацыялагічных даследаванняў, згодна з якімі узровень даверу беларускім СМІ складае амаль 50 працэнтаў. Для параўнання: расійскім і замежным СМІ давяраюць 28 працэнтаў апытаных.
Яшчэ адным дэвізам выстаўкі мог бы стаць пастулат аб прафесіяналізме і адказнасці журналіста – аб гэтым гаварыла міністр інфармацыі Лілія Ананіч, адкрываючы выстаўку; гэтая ж думка чырвонай ніткай праходзіла ў выступленнях на канферэнцыі. Журналістам даверана вельмі важная зброя – слова, і абыходзіцца з ёй, па першае, трэба ўмець, а па-другое, несці адказнасць за тое, якія наступствы можа выклікаць нават самае прыгожае і таленавітае слова ў жыцці кожнага чалавека і грамадства ў цэлым – далёка не заўсёды гэтыя наступствы – пазітыўныя і станоўчыя, аб чым сведчыць уся сусветная гісторыя.
Шырока былі прадстаўлены на выстаўцы “СМІ ў Беларусі” сродкі масавай інфармацыі Гродзеншчыны, у тым ліку -- газета “Астравецкая праўда”. Без перабольшання: нашы “фотамадэлі” ў касцюмах, пашытых з “Астравецкай праўды” (за дапамогу – асобная ўдзячнасць “залатаручцы” Валянціне Вільеўне Віннічак) карысталіся павышаным “попытам” – усе хацелі сфатаграфавацца. Павышаным попытам карысталіся газеты і насценныя календары “Астравецкай праўды” -- думаю, пасля гэтай выстаўкі, якая прадоўжыцца да 6 мая, нашмат больш жыхароў краіны будуць ведаць пра Астравец, пра яго людзей і справы.
