Поют юные дарования

Пакуль у фае праходзіла рэгістрацыя ўдзельнікаў,  маленькія  вакалісты рэпеціравалі на сцэне, папраўлялі прыгожыя  строі  і  прычоскі.  Некаторыя падыходзілі  да  сваіх  кіраўнікоў,  каб  за пятнаццаць  хвілін  да  пачатку  конкурсу атрымаць апошнія парады і прафесійныя рэкамендацыі.  Хваляваліся  не  толькі ўдзельнікі, але педагогі і мамы, якія ў гэты дажджлівы дзень прыйшлі падтрымаць сваіх дзетак.
Усіх  прысутных  прывітаў  старшыня журы вакальнага фестывалю Сяргей Лявонцьевіч Сяўко, а яго намеснік Генрых Францавіч Волчак выказаў меркаванне, што з цягам часу  фестываль  стане  традыцыйным і збярэ удзельнікаў не толькі з памежных раёнаў. У склад судзейскай каманды ўвайшлі педагогі Астравецкай школы мастацтваў Данута Міхайлаўна Блашкевіч і Таццяна Янаўна Канчанін і ашмянскі педагог Ганна Эдуардаўна Буйко.
Малодшая  група  сольнага  выканання  была  прадстаўлена  12 дзяўчынкамі. Некаторыя з маленькіх выканаўцаў моцна хваляваліся, аднак нават тады, калі з галавы выляталі патрэбныя словы, знаходзілі ў сабе сілы прадоўжыць песню.
Чароўным  голасам  і  мілагучнымі песнямі  “Пасха  ў  госці  да  нас  прыйшла”,  “Вясёлая  мышка”  журы  пакарыла Насця  Сямёнава  з  Ашмянскай  школы мастацтваў, якая стала першай. Другое месца заняла таксама таксама ашмянская дзяўчынка Аліна Айвазоўская: “Зберажэнне здароўя” і “Калыханка для мамы” не пакінулі раўнадушнымі ніводнага слухача ў зале. Віка Дзянісава, якой давялося адкрываць фестываль, таксама ўзнялася на другую прыступку з песнямі пра гномікаў і Чапліна. Саша Бойка з Ашмян і астравецкая выканаўца Аліна Гацук сталі трэцімі.
У  старэйшай  узроставай  групе выканаўцы змагаліся ў дзвюх намінацыях – акадэмічнае і народнае выкананне. Першае  месца  журы  адзінагалосна  аддало Насці Бражыцкай з Ашмян за песню “Мой край”  і  “Дзівосны  саксафон”,  другое  – Лізе Гарбачовай з Астраўца, якая цудоўна выканала  песні  “Жураўліная  чарада”  і “Вяснянка”.  Трэцяе  месца  засталося  за Наташай Дземідовіч. Музычны расповед дзяўчынкі пра ляснога аленя і калыханку мядзведзіцы спадабаўся ўсім слухачам.
У  намінацыі  “Народнае  выкананне” першае месца не прысуджалі нікому. Карына Млынкоўская з Ашмян выступала ў суправаджэнні  народнага  ансамбля  на родных інструментаў “Карусель”. Магчыма, падтрымка калег на сцэне і дапамагла дзяўчыне  заняць  другое  месца.  Трэцяй стала Карына Гудзінская з Гервят, якая пакарыла слухачоў у зале сваім моцным выкананнем беларускіх народных песень.
Гран-пры  Першага  адкрытага рэгіянальнага  фестывалю  дасталася вакальнай групе, якой кіруе Данута Міхайлаўна Блашкевіч. Першае месца ў намінацыі  “Вакальны  ансамбль”  заняў ашмянскі  ансамбль  “Сугучча”,  а  другое  раздзялілі  “Юнацтва”  з  Радунскай дзіцячай школы мастацтваў і астравецкія “Чаравічкі”, якія былі адзінымі ўдзельнікамі ў малодшай групе.
Усе  пераможцы  атрымалі  падарункі  і граматы.  Бумбокс,  мікрафоны,  флэш-карты,  камп’ютарныя  мышкі,  сумкі  для дыскаў дасталіся лепшым выканаўцам. А дзеткі, якім не пашанцавала ў гэты раз, атрымалі ў падарунак суцяшальныя прызы – блакноты і кнігу.
Генрых  Францавіч  Волчак,  дырэктар Астравецкай школы мастацтваў, прызнаўся, што атрымаў  цудоўныя ўражанні ад фестывалю, нягледзячы на тое, што былі няўвязкі арганізацыйнага характару. Некаторыя калектывы і выканаўцы не прытрымліваліся палажэнняў конкурсу, што і не дазволіла ім заняць прызавыя месцы.
Плануецца, што рэгіянальны фестываль будзе праходзіць не радзей, чым раз у два  гады,  і  “Вакальны  капеж”  аб’яднае таленавітых дзетак з усёй вобласці.

________________

Алена ГАНУЛІЧ,

фота аўтара