23-24 августа Зельва приглашает на Анненскую ярмарку
23 і 24 жніўня 2013 года ў г.п. Зэльва адбудзецца свята – Ганненскі кірмаш.
Як сведчыць гісторыя, менавіта дзякуючы Ганненскаму кірмашу Зэльва была вядома ўсяму свету яшчэ ў XVIII стагоддзі. Тагачасныя зэльвенскія кірмашы былі аднымі з буйнейшых у Еўропе і саступалі па сваёй значнасці толькі знакамітым лейпцыгскім.
У 2001 годзе Ганненскі кірмаш атрымаў “новае дыханне”. Раённае свята стала адным з самых масавых і жаданых для жыхароў і гасцей Зэльвеншчыны.
Распачнецца свята 23 жніўня, у пятніцу. У гэты дзень плануецца (з 14 да 16 гадзін) правесці навукова-практычную канферэнцыю “Кірмаш. Мінулае, сучаснае і будучае”. Адбудзецца таксама раённае свята “Дажынкі”. І яшчэ адно цікавае мерапрыемства чакае гасцей: упершыню ў раёне пройдзе абласны конкурс лесарубаў. Вечарам у 20 гадзін запрашаем на выступленне калектыву з Германіі “Вудвор”.
Асноўная частка мерапрыемстваў пройдзе ў суботу, 24 жніўня. Пасля ўрачыстага адкрыцця свята, якое адбудзецца на цэнтральнай плошчы пасёлка ў 12 гадзін, жыхарам і гасцям Зэльвы будзе прадстаўлена цыганскае шоу “Алюр”, выступленні калектываў “Тутэйшая шляхта” (г.Мінск) і зноў жа “Вудвор” (Гермнія).
Займальна і весела адпачываць на кірмашы можна будзе на разнастайных пляцоўках, якія размесцяцца ў цэнтральнай частцы Зэльвы. Цікавай мае быць прадпрымальніцкая пляцоўка, на якой пройдзе прэзентацыя аграсядзіб і аб’ектаў малога і сярэдняга бізнесу.
Свае работы на кірмашы рамёстваў і ў Горадзе майстроў прадставяць умельцы народнай творчасці і мастакі.
Аматараў песні і вясёлай музыкі чакае музычна-мастацкая пляцоўка. Для дзяцей будуць арганізаваны гульнёвыя праграмы і атракцыёны.
Запланаваны кірмашовы карнавал, куды запрашаюцца ўсе жыхары і госці пасёлка, якія прыйдуць на свята, апранутымі ў касцюмы стылю XVIII стагоддзя.
А які ж Ганненскі кірмаш без коней?! Не хвалюйцеся: плануецца конкурс на лепшую павозку, а таксама кожны жадючы будзе мець магчымасць пакатацца на конях.
А яшчэ на кірмашы будзе арганізаваны шырокі гандаль прамысловымі і харчовымі таварамі. Візітнай карткай стане выстава-продаж зэльвенскіх караваяў.
Завяршальным акордам свята стане, вядома ж, феерверк. Ну а тыя, хто не стоміцца за дзень, запрашаюцца апоўначы ў раённы Дом культуры на пенна-лазарнае шоу.
Раім усюды паспець і ўсё пабачыць. Не пашкадуеце!
Для таго, каб гасцям было лёгка і правільна арыентавацца, па ўсёй тэрыторыі святкавання будуць устаноўлены ўказальнікі і інфармацыйныя дошкі. На плошчы арганізуе работу інфармацыйны цэнтр, дзе можна будзе набыць гасцявыя карты, заказаць экскурсію.
Усе хвалючыя пытанні можна вырашыць па тэлефонах: (801564) 2-45-58 і 2-55-67.
Аргкамітэт г.п.Зэльва.
