Социальные сетки, мамы и их детки

У Дзень маці былі падведзены вынікі конкурсу на лепшы здымак дзяцей са сваёй мамай, арганізаваны райкамам прафсаюза работнікаў АПК.

На працягу месяца ўдзельніцы конкурсу размяшчалі свае фотаздымкі  з хэштэгам #profpak у сацыяльных сетках. Дарэчы, журы не абмяжоўвала колькасць здымкаў, але абавязкова трэба было выканаць простыя ўмовы: быць падпісчыцай суполкі Астравецкага прафсаюза работнікаў АПК у сацыяльнай сетцы “ВКонтакте” і з’яўляцца членам прафсаюзнай арганізацыі.

У мінулую пятніцу ля будынка ўпраўлення сельскай гаспадаркі і харчавання “фотасушка” прыцягвала ўвагу прахожых: конкурсныя фотаздымкі былі прымацаваны да стужкі рознакаляровымі прышчэпкамі.

– У конкурсе паўдзельнічала  28 чалавек. Лепшы здымак выбірала журы, у склад якога ўвайшлі прадстаўнікі сельгасхарчу, аддзела ідэалагічнай работы, культуры і па справах моладзі, прафсаюзнай арганізацыі, – расказвае старшыня прафсаюза работнікаў АПК і арганізатар конкурсу Юрый Аляксандравіч Адула. – Аднак у дзень галасавання з-за вялікага рэзанансу было вырашана, што кожны жадаючы зможа аддаць свой голас за фотаздымак, які найбольш спадабаўся, павязаўшы ля яго белую стужку.

З кожнай гадзінай ля фотаздымкаў з’яўляліся новыя стужкі – лідары мяняліся. Па выніках народнага галасавання перамог фотаздымак Марыны Якімовіч, якая ў якасці падарунка атрымала падпіску на газету “Беларускі час” на 1 паўгоддзе 2017 года. А галоўны прыз – сертыфікат на наведванне салона прыгажосці “Сакура” на 100 рублёў –  журы аддало Алене Кандратовіч.

– Конкурс зрабіў гэты асенні дзень больш цёплым і яркім. Асабліва прыемна, што журы выбрала мой здымак, дзе я разам са сваёй дачушкай і мамай, –  падзялілася ўражаннямі пераможца конкурсу Алена Кандратовіч. – Няхай нашы дзеці прыносяць нам радасць не толькі ў святы, але і ў будні.

Варта адзначыць, што кожная ўдзельніца конкурсу, незалежна ад вынікаў, атрымала да Дня маці падарунак – свае раздрукаваныя фотаздымкі.

___________

Алена ГАНУЛІЧ,

фота аўтара.