Пра ўдзел у фестывалі рэгіянальнага фальклору “Панямоння жыватворныя крыніцы” расказвае Ганна Ткачук
10:12 / 15.09.2025
– У гэтым фестывалі ўдзельнічала ўпершыню. Аўтэнтычныя песні, побытавыя танцы, народныя строі – было вельмі прыгожа. Журы ацэньвала выкананне нумару і адпаведнасць тэматыцы касцюмаў удзельнікаў. Выступала ў індывідуальнай намінацыі з песняй «Ой пайду я, гукаючы». У выніку заваявала 2-е месца.
У фестывалі з побытавым танцам таксама прымаў удзел наш народны фальклорна-этнаграфічны калектыў «Жыльвіціс».
Асабліва парадавала, што сярод тых, хто выходзіў на сцэну, былі не толькі дарослыя, але і дзеці.
Дзень беларускага пісьменства прайшоў прыгожа, ярка, здорава. На два дні ён сабраў прадстаўнікоў не толькі усіх раёнаў Гродзеншчыны, але і Беларусі. Аж сэрца заходзілася, як зайгралі разам на адкрыцці баяністы! А тое, што на святкаванні было шмат дзяцей, сведчыць, што ім цікава наша гісторыя, самабытнасць беларускага народа. Менавіта так, перадаючы нашчадкам запаветы і культуру дзядоў і прадзедаў, мы гадуем новае пакаленне, якое ганарыцца сваёй краінай. Як адзначыла журы конкурсу, песні, танцы, народныя рамёствы перажываюць сапраўднае адраджэнне – імі цікавіцца наша моладзь. І гэта здорава!
