Рашэнне аб месцы размяшчэння Беларускай АЭС і іншыя падзеі – пра што пісала “Астравецкая праўда” ў першай і другой палове нулявых

Асвятлялі…

Але не толькі пра АЭС пісала раённая газета. У спецыяльных праектах ці кароткіх «інфармашках», фотарэпартажах і інтэрв’ю, праблемных артыкулах і карэспандэнцыях – ва ўсіх формах і жанрах «Астравецкая праўда» адлюстроўвала шматаблічную палітру жыцця раёна. «Асвятляць» было што: падзей і людзей, за якія «чап­лялася» журналісцкае пяро, было шмат. 

…Падзеі

У чэрвені 2007 года ў Аст­раў­ца ўпершыню ў гісторыі яго існавання з’явіліся ўласныя геральдычныя сімвалы – герб і сцяг. Іх зацвердзіў сваім Указам Прэзідэнт Рэспублікі Беларусь. 

У жніўні таго ж года Астра­вецкі раён упершыню наведаў з рабочым візітам кіраўнік дзяржавы. Аляк­сандр Лукашэнка азнаё­міў­ся з ходам уборачнай кам­паніі, наведаў СВК «Гервяты», Гер­вяцкую школу, пагутарыў з людзьмі. «Аляксандр Лукашэнка на Астравеччыне» – паведамляла раён­ная газета 15 жніўня і змя­шчала рэпартаж аб гэтай падзеі. 

У 2007 годзе ў раёне пасля шматлікіх просьбаў і зваротаў мясцовых жыхароў з’явіўся яшчэ адзін чыгуначны прыпынак: ак­рамя здаўна вядомай станцыі Гудагай цягнікі рэгіянальных ліній сталі спыняцца на прыпынку Каменка, які абсталявалі каля вёскі Слабодкі.

…Адкрыцці

У 2005 годзе ў Гервятах пачалі будаўніцтва першага ў раёне аграгарадка. Будавалі яго, без перабольшвання, усім раёнам. І вынік атрымаўся годны. Пера­ўтварылася не толькі цэнтральная плошча і тэрыторыя навокал касцёла – кардынальна змянілі аблічча вёска і ўсе яе ўстановы. Адным з найбольш доўгачаканых стала адкрыццё ўніверсама «Янтарный», які пабудавалі з нуля замест згарэлай за некалькі гадоў да таго крамы. У студзені 2006 года ў аграгарадок прыйшоў прыродны газ – і гэта таксама была падзея раённага значэння, якая знайшла сваё адлюстраванне на старонках газеты. А ў кастрычніку 2006-га «раёнка» змясціла рэпартаж з адкрыцця гервяцкага фізкультурна-аздараўленчага комплексу, на той час – першага і адзінага ў раёне.

У сакавіку 2008 года «Ёлачка» стала «Гермесам» – пад такой назвай выйшаў рэпартаж аб адкрыцці ў Астраўцы сучаснага гастранома «Гермес», у які пасля рэканструкцыі ператварыўся напаўразбураны будынак былога рэстарана «Ёлачка».

У 2008 годзе ў горадзе адбы­лося шмат наваселляў, як правіла, пасля рэканструкцыі будынкаў: горад рыхтаваўся да святкавання юбілею і паўсюль ішло абнаўленне. 

6 верасня ў рэпартажы «Тут па­селяцца музы» «раёнка» расказ­вала і паказвала, як у ко­ліш­нім адміністрацыйным будын­ку кам­бі­ната будаўнічых матэ­рыя­лаў размясцілася музыч­ная школа. Неўзабаве яна была рэар­га­ні­завана ў школу мас­тацт­ваў: з’явіліся ўмовы для адкрыцця класаў выяўленчага мастацтва і харэаграфічнага. 

Да юбілею горада рэканст­руя­валі мост праз Лошу – пра гэта паведамляла раённая газета ў інфармацыі «Бераг левы, бераг правы звязаў мост-прыгажун». 

А ў лістападзе па новым масце праз Вілію пайшоў транспарт у Міхалішках.

У юбілейным годзе па добра­ўпарадкаванні райцэнтра было зроблена вельмі шмат. І па вы­ніках работы за 2008 год Астравец упершыню быў прызнаны пераможцам рэспубліканскага агляду-конкурсу санітарнага стану і добраўпарадкавання.

Асвятлялі...

…выданне новых кніг

У студзені 2005 года вый­шаў сігнальны экзэмпляр доўга­чака­най кнігі «Памяць. Астравецкі раён». Гэта стала цудоўным падарункам да 40-годдзя аднаўлення Астравецкага раёна. 

27 жніўня 2007 года газета паведамляе, што выйшаў зборнік «Астравецкі край», у якім мастацтвам слова і малюнка апяваецца Астравеччына. Прафінансаваў вы­­данне райвыканкам. 

У кастрычніку 2006 года «раёнка» расказвала пра прэзентацыю новай кнігі казак Інэсы Багдзевіч «На кухні Рэгіны Магдалены», якая выйшла ў выдавецтве «Мас­тацкая літаратура». 

Багатым не толькі на матэ­рыяльныя, але і на духоўныя здабыткі стаў 2008 год, калі адзначалася 540-годдзе Астраўца. Тады выйшла з друку кніга Іаланты Валуевіч «Як называць цябе, родны мой куто­чак?». Іаланта Францаўна, апан­таны края­знаўца, сабрала пад адной вокладкай тапонімы спон­даў­скага краю, мясцовыя легенды і па­данні. І ў тым жа годзе выйшлі яшчэ дзве, больш сціплыя, але не менш каштоўныя кнігі Іаланты Валуевіч «Матуліна мова жыве ў родным краі» і «Хочаце – верце, хочаце – праверце». У першай аўтар распавядае пра асаблівасці гаворкі сваёй мясцовасці, прыводзіць прыказкі, прымаўкі, тосты, праклёны, жарты, анекдоты, прыпеўкі, песні. А ў другой падаюцца народныя прыкметы. 

Да юбілею Астраўца выйшлі з друку яшчэ дзве кнігі, выданне якіх прафінансаваў райвыканкам. У зборніку «Астравецкай зямлі галасы» былі сабраны вершы і проза ўжо вядомых і пачынаючых астравецкіх аўтараў Рычарда Бялячыца, Станіслава Валодзькі, Інэсы Багдзевіч, Таісы Сямёнавай, Алены Рыбік, Ганны Чакур, Вінцэнта Бянёхі, Людмілы Кухарэвіч, Вольгі Караткевіч, Люд­мілы Валодзькі, Ма­рыі Пешкі, Таццяны Граблеўскай, Антона Маль­шэўскага, Святланы Бацюлевай, Ігара Туршава, а ў кнігу прозы «Свае і Чужыя» аўтар Ніна Рыбік уключыла лепшыя са сваіх апавяданняў.

...пленэры, выставы, фестывалі

Багатым на культурныя па­дзеі выдаўся 2007 год. У маі ў Аст­раў­цы прайшоў першы пленэр графіцістаў – рэпартаж пад назвай «Малююць сваё жыццё» быў змешчаны ў раённай газеце 2 чэрвеня. А ў нумары за 23 мая – інтэрв’ю з ідэйным натхняльнікам пленэру мастаком Дзянісам Ходасам «Што такое графіці і як яго малююць?».

У чэрвені Ганна Чакур расказ­вала пра пленэр, прысвечаны 100-годдзю Льва Дабжынска­га, які ад­­быўся ў Лошы. У ім прымалі ўдзел як вядомыя мастакі, так і мяс­цо­­­­выя: сёстры Тарэ­са Вара­новіч і Ірэ­на Герасім, Біру­тэ Куцкай­тэ, Эду­ард Мацюшо­нак і іншыя. Пасля пле­­нэру ў Лош­скім клубе адбылася выстава напісаных за тыдзень работ, якія затым разам з новымі звест­­камі пра Льва Дабжынскага, зной­­дзе­нымі ў архівах Вільнюса, пера­далі раённаму аддзелу культуры. Тады ж каля Лошскай капліцы ўстанавілі і асвяцілі памятны камень у гонар мастака.

Напрыканцы чэрвеня па тэры­то­рыі раёна прайшла экспедыцыя краязнаўцаў, прысвечаная 150-год­дзю воднай вандроўкі, здзей­­­сненай графам Тышкевічам і пад­­рабязна апісанай ім у кнізе «Па Ві­ліі» – пра яе адметнасці ў серыі матэ­рыялаў расказала ўдзельніца вод­нага падарожжа Ганна Чакур.

У ліпені-жніўні 2008 года ў раёне працаваў пленэр скульптараў, пасля якога горад упрыгожылі 10 ка­менных скульптур. Калі работы былі ўстаноўлены, «Астра­вецкая праўда» правяла свое­асаблівы конкурс на вызначэнне самай любімай з іх. У выніку «народнай скульптурай» назвалі «Дубочак» Эдуарда Астаф’ева.

У чэрвені 2009 года «Лята­ючы кот» вярнуўся на радзіму» – пад такой назвай раённая газета расказвала пра персанальную выставу літоўскай мастачкі з астравецкімі каранямі Бірутэ Куцкайтэ, пасля якой усе карціны былі перададзены ў дар раёну. 

…і іншыя навіны культуры

У 2005 годзе папоўнілася сям’я народных калектываў раёна. У ве­расні званне «Народны аматар­скі ка­лектыў» прысвоілі ансамблю народнай песні «Кемяліна». У ра­шэн­ні калегіі Міні­стэр­ства куль­туры гаворыцца, што «звання ка­лек­тыў удастоены за дасягнутыя поспехі ў развіцці аматарскай мастац­кай творчасці, актыўную работу па папулярызацыі народных тра­дыцый». 1 кастрычніка 2005 года газета паведаміла, што званне ўзор­нага атрымаў фальклорны гурт Міха­­лішкаўскай дзіця­чай музыч­най школы «Міха­лін­ка», а званне на­роднага – хор ветэ­ранаў пад кіраў­ніцтвам Генрыха Стаціны.

У 2007 годзе да народных калек­тываў дадаўся народны майстар Рэспублікі Беларусь: у нумары за 29 снежня паведамляецца, што ганаровае званне прысвоена Ва­лян­ціне Віннічак.

Той час быў плённым на новыя конкурсы і цікавыя праекты. У 2007 годзе прайшлі два вы­пускі «Зорнага дажджу». Сольным кан­цэртам Сяргея Сяўко, які ад­быў­ся напярэдадні Новага года, рас­пачаліся свое­асаблівыя каляд­ныя сустрэчы з лепшымі артыстамі Аст­равеччыны. У наступ­ным го­дзе традыцыю прадоў­жыла Данута Блаш­кевіч, пазней – муж і жонка Аляксандр і Таццяна Юргялянцы…  

У 2008 годзе работнікі культуры арганізавалі новае шоу – «Цу­доў­ная пяцёрка». На сцэне спявалі і тан­цавалі, змагаючыся за званне самых таленавітых і артыстычных пра­цоўных калектываў, прад­стаў­нікі рай­газу, Варнянскай школы, вузла паш­товай сувязі, спажыў­каапе­рацыі, раённай бальніцы, дзіцячых сад­­­коў. Ура­жан­нямі ад творчых спа­­­бор­ніцт­ваў, якія праходзілі ў не­калькі этапаў, доў­га жыў увесь раён.

У 2009 годзе традыцыя народ­­­ных куль­турных шоу пра­доў­жылася праектам «Дзве зоркі», падчас якога на сцэну выйшлі пары, састаўленыя з прафесійных і са­ма­дзейных ар­тыс­­таў: Святланы Куцько і пракурора Аляксандра Марцін­чыка (яны, да слова, сталі пе­ра­можцамі); Аляксандра Юргя­лян­ца і агранома Алесі Вялічкі; Акса­ны Сяўко і загадчыка аддзела спорту і турызму райвыканкама Сяргея Шэіна; Анастасіі Ляховіч і дырэктара кінатэатра Вік­тара Жда­новіча. 

…духоўнае 

жыццё

У верасні 2006 года духоўна-асвет­ніцкая экспедыцыя «Дарога да святыняў» з Благадатным агнём ад Гроба Гасподняга ўпер­шыню наведала Астравеччыну. Ак­рамя царкоўнага богаслужэння і раздачы агню на свечкі вернікаў,  былі цікавыя сустрэчы ў школах і ўста­новах культуры з чле­намі экс­педыцыі – вядомымі наву­коў­цамі, літаратарамі, дзея­чамі культуры. 

У 2007 годзе ў Камаях Пастаў­ска­га раёна, дзе ў свой час у мясцовым касцёле служыў святар і паэт Канстанцін Стэповіч, больш вядомы як Казімір Сваяк, адкрылі і асвя­цілі памятную дошку ў яго гонар. 

А ў ліпені таго ж года адбыла­ся значная падзея не толькі духоўнага, але і свецкага жыцця: кара­нацыя залатымі Папскімі ка­ронамі цудатворнага абраза маці Божай Гудагайскай. Пры гэтым пры­сутнічалі тысячы вернікаў, вышэйшае кіраўніцтва беларускай каталіцкай Царквы, першыя асобы абласной і раённай улад. Фота­рэпартаж «І пралілася міласць боская», які адлюстроўваў святкаванне гэтай падзеі, таксама выйшаў на старонках «Астравецкай праўды». 

У 2009 годзе шмат значных па­дзей адбылося ў праваслаўнай абшчы­не раёна. У чэрвені жыхары горада і раёна сустракалі Крыж Ефрасінні Полацкай. У верасні ў Астраўцы прайшоў фестываль праваслаўнай культуры. А 16 верасня ў рэпартажы «Храм над вёскай» распавядалася пра асвячэнне ў Альхоўцы царквы Святога Іліі.