На механических мастерских в Палушах готовят технику не только к посевной, но к сенокосу и жатве

11:00 / 18.02.2025

Калі з вясны да восені эпіцэнтр вясковых работ знаходзіцца ў полі, дзе механізатары праводзяць большую частку светлавога дня, то зімой – на механічных майстэрнях. Хоць менавіта на гэты перыяд прыпадае пік працоўных адпачынкаў вадзіцеляў і трактарыстаў, тым не менш тэхніку да вясенне-палявых работ яны рыхтуюць адказна і з апярэджаннем графіка.

Даведалася, як рыхтуюць сельгасмашыны і прычапныя агрэгаты на майстэрнях у Палушах (КСУП «Гудагай»).

Нагадаю, прыблізна ў гэтую пару рабіла аналагічны рэпартаж на гэтым аб’екце ў мінулым годзе. Завітаць сюды тады параіў галоўны інжынер гаспадаркі Павел Гваздоў. Калі немагчыма адшукаць рэдкую запчастку, то за справу бярэцца загадчык майстэрні Аляксей Налівайка і па сумяшчальніцтве таленавіты токар.

Пры рабоце сеялкі з-за пылу хутка зношваліся вентылятар, іншыя рабочыя дэталі. Аляксей зрабіў новую дэталь, а хлопцы ўстанавілі канструкцыю забору паветра не знізу, а зверху.

Запчасткі выдае кладаўшчык Марыя Зезюлевіч

– Самі прыдумалі, самі зрабілі. Увесь сезон без праблем адпрацаваў пасяўны комплекс, – з усмешкай зазначыў Аляксей. – Гатоўнасць тэхнікі да вясенне-палявых работ ідзе па плане. Хутка пачнецца тэхагляд. Сёння, напрыклад, пачалі рамантаваць збожжаўборачны камбайн, а іх на нашых майстэрнях 8 адзінак.

Работнік раённага аддзела па надзвычайных сітуацыях Міхаіл Янкойць на жніве чалавек далёка не новы. На працягу 5-ці сезонаў ён у якасці памочніка набіраўся вопыту ў камбайнера РУП «Астравецкі саўгас «Падольскі» Віталя Трыбоцкага.

– На гэтай хлебаўборачнай машыне адпрацаваў 8 сезонаў. На час яе рамонту афіцыйна працаўладкаваны ў КСУП «Гудагай». Сёння, напрыклад, тут, а заўтра заступлю на баявое дзяжурства, – расказаў мужчына. – За ўсімі вузламі трэба глядзець. Цяпер замяняю ніжнюю каробку, потым – элеватары, ланцугі, пасы, падшыпнікі. Каб камбайн летам не падвёў у полі, пра яго варта паклапаціцца зарання.

Адзін з лепшых касцоў гаспадаркі і раёна Генрых Млынскі рамантаваў ратацыйную модульную касілку.

– Фронт работ невялікі, таму што комплекс толькі каля трох сезонаў у счэпцы з «Беларусам» адпрацаваў на касавіцы, – патлумачыў мужчына. – Замяню ўтулкі, дзе ідзе сучляненне рамы. Устаўкі самі пераварваем, бо з-за іх зносу не цалкам скошвалася трава.

Лічба

96% трактараў і прычапных навясных агрэгатаў КСУП «Гудагай» гатовы да вясенне-палявых работ па стане на 13 лютага.

На механічнай майстэрні ў Палушах (КСУП «Гудагай») з апярэджаннем тэрмінаў ідзе падрыхтоўка тэхнікі да вясенне-палявых работ. Механізатар Максім Букліс замяніў большасць рабочых органаў у пасяўным комплексе «Поцінгер», які ўжо гатовы да прыгортвання насення ў глебу.