Шчасце жыць пад мірным небам, упэўнены былыя вязні канцэнтрацыйных лагераў

Напярэдадні Дня Незалежнасці і 80-годдзя вызвалення Беларусі ад нямецка-фашысцкіх захопнікаў кіраўніцтва Астравецкага райвыканкама, Савета дэпутатаў, грамадскіх аб’яднанняў і райваенкамата наведалася ў госці да былых вязняў канцэнтрацыйных лагераў, якія пражываюць на тэрыторыі нашага раёна.

– Сёння вельмі важна помніць жывых сведкаў далёкіх падзей 1940-х гадоў. На жаль, з кожным годам іх становіцца ўсё менш. У раёне не засталося ні аднаго ветэрана. Затое ёсць 4 вязні, якіх мы наведалі. Гэтыя людзі сведкі тых страшных падзей. І ў большасці выпадкаў – усё залежыць ад стану іх здароўя – яны актыўна дзеляцца з маладым пакаленнем тым, што ім давялося перажыць. А калі інфармацыя ідзе ад першай асобы, яна з большай верагоднасцю дойдзе да адрасата і знойдзе зваротны водгук у моладзі і сучаснікаў, – адзначыў старшыня райвыканкама Сяргей Мядзвецкас.

Сёння з боку дзяржавы прымаецца нямала мер па падтрымцы ветэранаў і вязняў канцэнтрацыйных лагераў. Вось і напярэдадні галоўнага свята краіны астраўчанкі Ніна Іларыёнаўна Мілідовіч, Ніна Адамаўна Маргуж, Еўдакія Рыгораўна Сігалёва і Сафія Цярэнцьеўна Палуян сустракалі гасцей, якія ўручылі ім грашовыя прэміі, падарункі і кветкі.

А лепшым пацвярджэннем, што іх помняць і што яны ўнеслі ўклад у вызваленне краіны ад нямецка-фашысцкіх захопнікаў і Вялікую Перамогу, стала ўзнагароджванне юбілейным медалём “80 год вызвалення Беларусі ад нямецка-фашысцкіх захопнікаў” – яго жанчынам уручыў ваенны камісар раёна Дзмітрый Багуслаўскі.

І кожная з былых вязняў у сваю чаргу пажадала сваім землякам міру і згоды – і гэтыя жанчыны, якія перажылі вайну, зведалі боль страты родных людзей, ведаюць, што значаць іх словы.

Дарэчы, па меры сваіх сіл былыя вязні канцлагераў стараюцца сустракацца з маладым пакаленнем, каб данесці ім праўду пра Вялікую Айчынную.

– Мне вельмі прыемна сустракацца з дзецьмі. Вось і нядаўна я была ў сваёй роднай сярэдняй школе №1. Добра, што сёння вялікая ўвага надаецца патрыятычнаму выхаванню; важна, каб дзеці і моладзь ведалі пра вайну і разумелі, што яна нясе, – адзначыла адна з малалетніх вязняў Ніна Маргуж.

– Мы помнім – і будзем помніць, таму што гісторыя кожнаму дае ўрок. І калі мы яго не засвойваем, гісторыя паўтараецца, – упэўнены і старшыня райвыканкама.