Для тех, кто хочет стать военным: абитуриентам на заметку
11:45 / 21.01.2024
Да заканчэння навучальнага года і здачы іспытаў засталося мала часу – і выпускнікі будуць маніторыць табліцы падачы дакументаў у навучальныя ўстановы, пралічваючы магчымыя варыянты. Асобна з катэгорыі будучых абітурыентаў вылучаюцца тыя, хто выбраў курс на атрыманне ваеннай спецыяльнасці – для гэтых юнакоў і дзяўчат першым крокам насустрач сваёй мары будзе не ЦЭ ці ЦТ, а прафесійны адбор.З чаго пачынаць, на што звярнуць увагу, а таксама пра асаблівасці ўступнай кампаніі ў вышэйшыя ваенныя навучальныя ўстановы і на адпаведныя факультэты грамадзянскіх вну расказаў карэспандэнту «АП» начальнік групы прызыву Астравецкага райваенкамата Рыгор Дземідовіч.
– Адразу акрэслю: прэтэндаваць на паступленне ў ваенныя вну ці на адпаведныя факультэты могуць выключна грамадзяне нашай краіны.
Што тычыцца агульнай інфармацыі пра навучальныя ўстановы, накірункі прафесіі, уступныя іспыты, то ўсё гэта можна паглядзець на сайтах Міністэрства абароны, райваенкамата альбо звярнуцца да нас асабіста – раскажам, параім, падкажам.
Дзяўчат прымаюць не на ўсе спецыяльнасці.
Звярніце ўвагу!
«Лепш адзін раз убачыць, чым сто разоў пачуць» – гэты выраз пра дні адкрытых дзвярэй.
Дату, час і месца правядзення прафарыентацыйных дзён размяшчаюць на сайтах навучальных устаноў. На такіх прэзентацыях абітурыентам і іх бацькам расказваюць не толькі пра спецыяльнасці, асаблівасці вучобы, паказваюць матэрыяльна-тэхнічную базу, але і знаёмяць з умовамі быту курсантаў.
ЗВЯРНУЦЦА Ў ВАЕНКАМАТ
Менавіта гэтая ўстанова стане адліковай кропкай на шляху да атрымання прафесіі.
– Калі вызначыліся з вну і спецыяльнасцю, ідзіце ў ваенкамат. Тут на кандыдата фарміруюць асабовую справу, неабходную для паступлення.
Абітурыент напіша заяву, дзе пазначыць абраныя навучальную ўстанову, факультэт і спецыяльнасць.
Да заявы патрэбна будзе прыкласці аўтабіяграфію, пісьмовую згоду законных прадстаўнікоў (калі кандыдат непаўналетні), характарыстыку, даведку аб навучанні, копіі дакумента аб адукацыі, пасведчання аб нараджэнні і чатыры фотаздымкі 4,5x6,0.
Дакументы ваенкамат прымае да 1 красавіка.
Звярніце ўвагу!
Не адкладвайце на апошнія дні падачу заявы – чым раней вы звернецеся, тым больш часу будзе на вырашэнне момантаў, звязаных з праходжаннем прафадбору. Напрыклад, спатрэбіцца дадатковае медабследаванне вузкага спецыяліста, якога няма ў мясцовай паліклініцы.
ПРАЙСЦІ ПРАФАДБОР
– Прафесійны адбор складаецца з некалькіх момантаў: вызначэнне стану здароўя і псіхалагічнага адбору. Праходзіць гэта ў 2 этапы:
папярэдні – па месцы жыхарства абітурыента;
канчатковы – у абласным камісарыяце.
Спярша кандыдата на паступленне накіруюць на медагляд. На падставе паданай у ваенкамат заявы абітурыенту афармляюць карту медыцынскага абследавання, згодна з ім вызначаюць стан здароўя і ступені годнасці маладога чалавека па абранай спецыяльнасці.
Калі гаварыць пра наш раён, то папярэдні агляд праходзяць у Астравецкай паліклініцы – ён павінен быць завершаны да канца красавіка, каб трапіць на канчатковы (у маі) – у Гродне на абласным зборным пункце.
Для кожнай ваеннай спецыяльнасці вызначана пэўная група здароўя. Чым раней даведаецеся ступень сваёй годнасці, тым больш часу застанецца на «падумаць»: магчыма, пераарыентуецеся на тую ваенную спецыяльнасць, на якую будзеце праходзіць па стане здароўя.
Псіхалагічны адбор – гэта рашэнне заданняў рознага тыпу. Ён таксама складаецца з 2-х этапаў: папярэдняга (пасля вынікаў медкамісіі, калі кандыдат прызнаны годным да паступлення) – у райваенкамаце і канчатковага – на абласным зборным пункце.
ПАДАЦЬ ДАКУМЕНТЫ Ў ВНУ
– Калі кандыдат паспяхова прайшоў прафадбор, наступнымі крокамі будуць здача патрэбных іспытаў, атрыманне атэстата і падача дакументаў у абраную вну.
З умовамі паступлення абітурыент можа азнаёміцца на сайтах навучальнай установы ці Міністэрства абароны альбо звярнуўшыся ў ваенны камісарыят – да начальніка групы прызыву на ваенную службу ці вядучага спецыяліста групы прызыву.
Патлумачу, што сфарміраваную ваенкаматам асабовую справу на рукі не выдаюць – яе адпраўляюць непасрэдна ў тую навучальную ўстанову, у якую плануе паступаць абітурыент.
Конкурс для юнакоў і дзяўчат асобны.
Залічэнне ў ваенную вну і на адпаведныя факультэты грамадзянскіх навучальных устаноў адбываецца ў пачатку жніўня – і адразу (у жніўні) курсанты адпраўляюцца да месца размяшчэння. Гэта абумоўлена тым, што навучэнцы павінны асвоіць курс пачатковай ваеннай падрыхтоўкі да пачатку вучобы і прыняць прысягу.
Калі абітурыент не праходзіць па конкурсе на адзін факультэт, ён мае магчымасць перападаць дакументы на іншы ваенны факультэт, запоўніўшы на месцах адпаведныя дакументы, – гэта можна зрабіць пры ўмове, што падыходзяць група здароўя і здадзеныя ЦЭ і ЦТ. Тое ж тычыцца ў тым ліку і варыянтаў з рознымі навучальнымі ўстановамі.
Тыя абітурыенты, якія не прайшлі па конкурсе, могуць спрабаваць свае сілы на наступны год, але сабраны пакет дакументаў ужо будзе неактуальным – пісаць заяву і праходзіць прафадбор давядзецца зноў.
ЛІЧБА
4 жыхары раёна сталі курсантамі вну краіны ў 2023 годзе.
2 заявы (на 12.01.2024) на праходжанне прафадбору для паступлення ў ваенную сферу
ўжо пададзена ў райваенкамат.
Сябры Мікіта Дудаў і Арцём Садоўскі выпускнікі СШ №2. Хлопцы вызначыліся з прафесіяй яшчэ ў 10 класе: мараць служыць ва ўнутраных войсках.
– Чым прывабліваюць менавіта ўнутраныя войскі? Спецыфікай службы. Я толькі ў агульным ўяўляю яе, але тое, што бачыў і чуў, у тым ліку падчас экскурсій у вайсковую часць 7434, – падабаецца, – гаворыць Мікіта. – Рыхтуюся па прадметах: для паступлення на абраны факультэт буду здаваць мову, матэматыку і гісторыю Беларусі. Буду спадзявацца, што мае планы стануць рэальнасцю.
Хлопцы разумеюць, што спачатку будзе нялёгка – давядзецца змяніць звыклы распаволены рытм жыцця на армейскі.
– Але нішто нас не палохае, мы хочам стаць сапраўднымі абаронцамі Радзімы. Ды і ўсё гэта будзе потым, пакуль наша галоўная мэта – паступіць. Ужо схадзілі ў ваенкамат, напісалі заявы, узялі пералік неабходных для асабовай справы дакументаў, даведаліся пра некаторыя нюансы – словам, маральна гатовы, да іспытаў рыхтуемся, – усміхаюцца маладыя людзі.
