Как Островетчина отмечала День мамы

Шумна, весела і прыгожа было напярэдадні і ў Дзень маці ў Цэнтры творчасці дзяцей і моладзі і ў гарадскім парку.

Выхаванцы і педагогі Цэнтра творчасці дзяцей і моладзі ў свята маці  не пакінулі жанчын без увагі. У гэты дзень усіх, хто праходзіў праз гарадскі парк,  віншавалі мімы – яны дарылі жанчынам-маці кветкі-брошкі, зробленыя на занятках гурткоў  сваімі рукамі,  і прапаноўвалі ўзяць з чароўнага кошыка  скрутак з пажаданнем.

І трэба было бачыць, як свяціліся радасцю твары жанчын, а на  вачах час ад часу блішчалі слёзы радасці...

___________________

Алена СВЕТЛАЯ, фота аўтара.

*     *     *     *     *

Напярэдадні Дня маці супрацоўнікі Астравецкай дзіцячай і раённай бібліятэк прыйшлі ў госці да выхаванцаў цэнтра карэкцыйна-развіваючага навучання і рэабілітацыі з праграмай “Зазірніце ў маміны вочы”.

Ва ўтульнай зале сабраліся навучэнцы цэнтра і іх мамы, для якіх бібліятэкары падрыхтавалі забаўляльныя конкурсы: сабраць цукеркі і пачаставаць матуль, дапамагчы мамам развесіць бялізну, адгадаць загадкі.

Дзеці назвалі і пералічылі ласкавыя і прыемныя словы ў адрас сваіх любімых мам, паслухалі вершы пра матулю. Мамы і супрацоўнікі бібліятэкі атрымалі ў падарунак ад выхаванцаў самаробныя сувеніры.

Мерапрыемства было напоўнена шчырымі ўсмешкамі мам, апладысментамі дзяцей, словамі падзякі, пажаданнямі.

Такія сустрэчы неабходны не толькі дзецям, але і іх мамам, каб яшчэ раз нагадаць сабе і іншым аб тым, як важна і адказна быць мамай, як гэта радасна, а часам – і балюча. І як цудоўна, калі маміны вочы свецяцца дабрынёй і спагадай.

____________________________

Ганна КЕРЭЛЬ, бібліятэкар Астравецкай дзіцячай бібліятэкі.

*     *     *     *     *

Усіх, хто ў мінулую пятніцу прыйшоў у кінаканцэртную залу “Астравец”, чакаў сюрпрыз: акрамя ўрачыстага мерапрыемства, прысвечанага Дню маці, тут праходзіў  конкурс маладых спецыялістаў “Творчасць без межаў”.

Урачысты і святочны настрой адчуваўся ўжо ў фае, дзе вока радавала выстава малюнкаў “Мама”, а члены райкама БРСМ і раённага аб'яднання прафсаюзаў раздавалі прысутным прыгожыя сэрцайкі – як сімвал вялікай любові да сваіх матуль.

Падчас урачыстага мерапрыемства ўсіх маці павіншаваў намеснік старшыні райвыканкама Павел Віктаравіч Мілешка.

– Мама – галоўны і самы дарагі чалавек у жыцці кожнага, – адзначыў П.В. Мілешка. – Яна надзейна захоўвае шчасце свайго дзіцяці і дапамагае перажыць усе няшчасці. Галоўная мэта і жаданне кожнай маці – вырасціць дастойнага чалавека і грамадзяніна сваёй краіны.

Да віншаванняў далучыўся і благачынны Астравецкага благачыння, айцец Георгій Савіцкі:

– Адметна, што Дзень маці прыпадае на вялікае царкоўнае свята Дня Пакрова Божай Маці. Няхай яна, як і кожная маці, абараняе ўсіх вас ад зла і бед. Любіце і шануйце сваіх матуль.

Міра і дабра ў кожную сям’ю, любові і шчасця ўсім жанчынам, якія носяць ганаровае званне маці, пажадала начальнік аддзела ідэалагічнай работы, культуры і па справах моладзі Наталля Уладзіміраўна Сянюць. І яна ж аб’явіла аб пачатку конкурсу сярод маладых спецыялістаў “Творчасць без межаў”.

...І пасыпаліся крэатыўнасць, артыстызм і фантазія – маладосць на выдумкі багатая. Пятнаццаць канкурсантаў з розных сфер дзейнасці дэманстравалі самыя разнастайныя таленты. Многія нумары прысвячаліся менавіта Дню маці. Перавага была аддадзена песні: спявалі не толькі работнікі культуры, але настаўнікі і ўрачы, майстар лясной гаспадаркі і прадстаўнікі сельгаскааператыва – і варта адзначыць, што некаторыя аматары-самавучкі нічым не саступалі прафесіяналам. Не абышлося і без танцаў: нікога не пакінуў абыякавым філасофска-пранікнёны нумар маладога харэографа цэнтра культуры і народнай творчасці, а вясёлая і няўрымслівая шасцёрка выратавальнікаў прадэманстравала ўменне не толькі тушыць пажары, але і “запальваць” у дыскатэчным рытме.

Знайшліся сярод моладзі і віртуозы ігры на музычных інструментах. “Венгерка” на цымбалах выклікала дружныя апладысменты, а непаўторнае выкананне задорных матываў на духавых інструментах ад квартэта з дзіцячай школы мастацтваў прымушала яшчэ і прытанцоўваць. Былі сярод маладых канкурсантаў і паэты: супрацоўніца СВК “Гервяты” прачытала свой верш, прысвечаны маме, – атрымалася чулліва і шчыра.

У выніку журы ацаніла творчасць і старанне ўдзельнікаў і вынесла свой прысуд.  Трэцяе месца заняла харэограф Астравецкага цэнтра культуры і народнай творчасці Маргарыта Яцэвіч, другое – педагог дзіцячай школы мастацтваў  Дзіяна Фанван, а  пераможцай  конкурсу стала супрацоўніца раённага аддзела па надзвычайных сітуацыях Вераніка Ганчарова.  Усе яны былі ўзнагароджаны дыпломамі і атрымалі падарункі.

_____________

Марына МАЦКЕВІЧ, фота аўтара.

*     *     *     *     *

Напярэдадні Дня маці прадстаўнікі раённай арганізацыі Беларускага саюза жанчын накіраваліся ў госці да гаспадынь:  на іх прыгожых і дагледжаных сядзібах  з ранняй вясны да позняй восені цвітуць кветкі.

Напрыканцы лета па ініцыятыве жаночай арганізацыі ў раёне стартаваў конкурс “Гаспадыня сядзібы – гаспадыня краіны”.

– Усе работы, якія жанчыны  прадставілі на конкурс, былі годнымі, цікавымі і запамінальнымі. На абласны этап конкурсу мы накіравалі  тры  з іх, –  расказала старшыня раённай арганізацыі Наталля Вікенцьеўна Баніцэвіч.

А напярэдадні Дня маці фіналісткі раённага этапу – Аксана Уладзіміраўна Юркойць і  Інеса Вяславаўна Багдановіч з Варнян і Ірына Станіславаўна Шукель з Гудагая  –  атрымалі дыпломы і падарункі ад раённай арганізацыі, якія жанчынам уручылі Наталля Вікенцьеўна Баніцэвіч і сакратар жаночай арганізацыі Юлія Альбінаўна Ражко.

___________________

Алена ЯРАШЭВІЧ, фота аўтара.

*     *     *     *     *

“Будзем вечна праслаўляць тую жанчыну, чыё імя  – МАЦІ!” – пад такой назвай прайшоў тыдзень, прысвечаны святкаванню Дня маці ў Варонскім дзіцячым садзе-пачатковай школе.

Тыдзень маці ў Варонскім НПК распачаўся выставай-конкурсам “Восеньскія цуды з агарода”. Вырабы з бульбы, яблыкаў, кукурузы, морквы, гарбузоў здзіўлялі непаўторнасцю і крэатыўнасцю. На выставе былі букеты, кошыкі з кветкамі і з восеньскімі дарамі, паруснікі, машынкі, павуцінкі, мядзведзікі, вусені і матылькі – усяго  не злічыць.

Свята без кветак – хіба ж гэта свята? Здаецца, усе кветкі сабралі на паперы школьнікі, каб зладзіць з іх букеты для мамаў, – светлымі, цёплымі і па-дзіцячы шчырымі атрымаліся малюнкі для выставы “Букет для мамы”...

Кульмінацыяй тыдня стала святочная праграма, якая прайшла 14 кастрычніка.  Шчырыя словы віншаванняў, песні, танцы і тэатралізаваныя мініяцюры для дарагіх матуль падрыхтавалі навучэнцы, а ўсе выступленні суправаджаліся відэасюжэтамі і фотазамалёўкамі са здымкамі мам.

Думаецца, што гэтыя імгненні свята нікога не пакінулі раўнадушным.

______________________________________

Галіна ЧАХРАЧ, намеснік дырэктара Варонскага НПК.