Фэст у мястэчку Гудагай сабраў сотні вернікаў з розных куткоў Беларусі

14:22 / 22.07.2023

На працягу некалькіх дзён усе шляхі вялі ў мястэчка Гудагай – сюды людзі ішлі пешшу, ехалі на аўтамабілях ці аўтобусах, каб паўдзельнічаць у фэсце, які айцы-кармеліты арганізоўваюць штогод у сярэдзіне ліпеня. Сёлета яго прымеркавалі да 260-годдзя пабудовы мясцовага касцёла.
На ўрачыстасці, якія праходзілі ў суботу і нядзелю, прыйшлі не толькі мясцовыя парафіяне, але і жыхары з іншых населеных пунктаў раёна, пілігрымы з Маладзечна, Нясвіжа, Ваўкавыска, Мінска і іншых беларускіх гарадоў, а таксама з блізкага замежжа.

– Фэст у гонар Маці Божай Гудагайскай праходзіць кожны год 16 ліпеня або ў бліжэйшую нядзелю да гэтай даты, каб ушанаваць Маці Божую, якая знаходзіцца тут больш за 300 гадоў. Так лічыцца таму, што ў хроніцы пра пабудову касцёла ў 1763 годзе, значыцца, што ў яго быў занесены абраз, які вядомы і шанаваны вернікамі больш за 100 гадоў, – расказаў кусташ парафіі Аркадзь Куляха.
Гудагайскі фэст не абмяжоўваецца адным днём. Святары загадзя рыхтуюць праграму, у якой кожны знаходзіць штосьці для сябе. Ёсць і такія вернікі, якія лічаць, што павінны паўдзельнічаць ва ўсіх момантах свята. Імша і заканчэнне навэнны; цяжкі ў фізічным плане (у малітвах і спевах пераадолець тры з паловай кіламетры), але лёгкі духоўна крыжовы шлях на Кальварыі; працэсія са свечкамі каля касцёла, калі непарыўны ланцужок святла рассейвае цемру і асвятляе душы ўсіх, хто верыць; нядзельныя літургіі – усё выклікае небывалую лёгкасць і дае адчуванне ачышчэння.

– У Гудагаі ў другі раз. Упершыню трапіла сюды ў 2018 годзе – тады прыняла шкаплер. А сёлета прыехала, каб аднавіць складзеныя абяцанні. Тут так спакойна, лёгка моліцца, добрая, радасная атмасфера, – гаворыць Ала, якая прыехала з Ваўкавыска. – Абавязкова паўдзельнічаем у Кальварыі і працэсіі са свечкамі і, напоўненыя верай, вернемся дамоў.
Падобныя эмоцыі ў суботні вечар перапаўнялі многіх вернікаў, якія прыехалі ў Гудагай.
– Калі выйшла замуж, змяніла парафію, але сюды прыязджаю часта. Бо тут прайшлі мае дзіцячыя і юнацкія гады. Разам з айцамі-кармелітамі і сёстрамі мы шмат дзе пабывалі, хадзілі ў пілігрымкі, ездзілі на сустрэчу з Папам Янам Паўлам ІІ, – расказвае Жанна з Астраўца. – І на фэст штогод прыязджаю. Вось і сёння рвецца душа на Кальварыю.
Эпагей свята ў мястэчку – нядзеля. Дзве літургіі, на якія збіраюцца парафіяне і вернікі-пілігрымы, дазваляюць у чарговы раз адчуць святочную радасць і ўзвысіцца душы.

І, канешне ж, кожны вернік у гэтыя дні прыехаў ці прыйшоў сюды, каб дакрануцца да невялікага па памеры, але такога значнага па сваёй вартасці і ласцы абраза Багародзіцы, каб адчуць яе блізкасць і выказаць удзячнасць за атрыманыя ласкі.

На 16 ліпеня прыпаў і дзень нараджэння кусташа Гудагайскай парафіі Аркадзя Куляхі. З гэтай нагоды намеснік старшыні райвыканкама Генадзь Бычко павіншаваў яго і ўручыў Падзяку райвыканкама.

– У хрысціянскай традыцыі ўшанаванне Найсвяцейшай Панны Марыі – адзін з важных момантаў духоўнага жыцця чалавека, бо менавіта праз яе мы атрымалі таямніцу ўцелаўлення Божага слова. І шляхі да Бога-чалавека, калі яны вядуць праз набажэнства да Яго Маці, дапамагаюць дасягнуць гэтай мэты. Малітва праз заступніцтва Найсвяцейшай Панны Марыі ва ўсе вякі для веруючых была падтрымкай і дапамогай, умацаваннем адносінаў з Богам, – адзначыў біскуп Віцебскі Алег Буткевіч. – Паводле традыцыі ў нашай краіне даўно ўшаноўваюць Маці Божую. І гэтае месца ў Гудагаі пазначана асаблівай апекай Божай Маці, шматлікімі яе ласкамі да тых, хто звяртаецца да яе. Традыцыйна 16 ліпеня на ўспамін Божай Маці Шкаплернай – таго знаку, які яна пакінула ў свой час, – на гэтым месцы збіраецца шмат людзей. Хачу павіншаваць усіх пілігрымаў і жыхароў Астравеччыны, што іх зямля атрымала асаблівую ласку мець культ Найсвяцейшай Панны Марыі і пажадаць яе асаблівай апекі.

З першых вуснаў
Наталля, г. Мінск:
– Упершыню прыехала ў Гудагай. Пачула пра абраз, які тут знаходзіцца, таму захацелася сюды трапіць. Мне вельмі спадабалася: усё прасякнута Святым Духам. Упэўнена, гэтае свята яшчэ доўга будзе асвятляць маю душу.

Марына Кутовіч, в. Ізабеліна:
– Прыехала сюды з сястрой і ўнукамі. Ні разу не прапусціла гэты фэст, бо, прыняўшы ўдзел у літургіі, атрымліваеш вельмі шмат станоўчых эмоцый ад прамовы ксяндза і ад людзей, якія побач.
Для нашай сям’і – гэта самае вялікае каталіцкае свята. Штогод падыходзім да абраза, каб папрасіць апекі Маці Божай Гудагайскай і падзякаваць ёй. Няхай яна і далей дапамагае нашай сям’і і ўсім, хто да яе звяртаецца!

Іосіф Грамбоўскі, г. Астравец:
– Сюды мяне ў дзяцінстве прывяла маці, тут мяне хрысцілі. З таго часу наведванне санктуарыя – вялікая радасць. На фэст прыехаў з сынам і ўнукам. Радасна, што так шмат людзей прыйшло пакланіцца Маці Божай. Спадзяюся, што пачутыя тут словы многім западуць у душу.

Фота аўтара і Мацвея САКАЛОЎСКАГА.

Похожие новости