Да Дня работнікаў ЖКГ: хто забяспечвае астраўчан чыстай вадой

Ці задумваліся вы калі-небудзь, хто і як забяспечвае нас чыстай вадой і дапамагае ў прамым сэнсе гэтага слова не патануць у моры каналізацыйных адходаў? Так, уся адказнасць у гэтым пытанні кладзецца на плечы Астравецкага РУП ЖКГ, а дакладней невялікай, усяго ў чатыры дзясяткі чалавек, каманды ўчастка водаправодна-каналізацыйнай гаспадаркі.

Пра яе спецыфіку мы распыталі ў начальніка ўчастка Дзмітрыя Скарахода:

– Асноўная задача нашага падраздзялення – бесперапыннае забеспячэнне спажыўцоў якаснай пітной вадой і безаварыйны адвод сцёкавай вады, яе перапрацоўка і выпуск у паверхневыя водныя аб’екты. За гэта адказваюць 2 брыгады: адна займаецца непасрэдна водаправодам, другая адказвае за сеткі водаадвядзення, эксплуатацыю помпавых станцый і ачышчальных збудаванняў. Участак водаправодна-каналізацыйнай гаспадаркі абслугоўвае ўвесь раён.

Для забеспячэння Астраўца чыстай вадой прадугледжана 2 водазаборы: па вуліцы Камсамольскай і ў вёсцы Трайгі. На іх працуюць станцыі абезжалезвання – вада жыхарам паступае высокай якасці. Кожны месяц у розных кропках горада праводзім адбор проб, каб адсачыць гэты паказальнік. Аналізам вады для ўжывання ў ежу, а таксама ачышчанай сцёчнай займаюцца супрацоўнікі хіміка-бактэрыялагічнай лабараторыі.

У населеных пунктах раёна, дзе якасць вады была пад пытаннем, таксама ўстанавілі станцыі абезжалезвання: у буйных вёсках – модульныя, у іншых – невялікія сістэмы, на якія самі закупляем абсталяванне. Такія, да прыкладу, у Газе, Чэхах, Бабраўніках.

Каб папярэдзіць форс-мажорныя выпадкі, сістэмна выконваем замену старых сетак: штогод аднаўляем ад кіламетра сетак водазабеспячэння і 0,6 – водаадвядзення. Праводзім і прафілактычны рамонт запорнай арматуры і засавак. Усё гэта дапамагае зменшыць выдатак вады, а значыць знізіць матэрыяльныя затраты.

Наша жыллёва-камунальная гаспадарка стараецца абнаўляць і тэхніку, і абсталяванне. Так, нядаўна купілі камеру для агляду труб, што дазваляе правяраць іх стан без вонкавага ўскрыцця і земляных раскопак. Такім чынам можна правесці маніторынг труб дыяметрам ад 63 да 315 міліметраў на даўжыні да 120 метраў. Працуе камера ў аўтарэжыме. Парыў, карозія, іржа, залом – усё гэта дапаможа знайсці набытае абсталяванне.

Але без спецыялістаў – слесараў-аварыйшчыкаў, машыністаў помпавых установак, аператараў дыстанцыйнага пульта ўпраўлення і іншых, хто, без перабольшвання, кожную хвіліну кантралюе абстаноўку, аператыўна рэагуе на сітуацыю, – не можа быць зладжанай і якаснай работы. Разам мы паспяхова спраўляемся з узнікаючымі пытаннямі. Зразумела, добра дапамагаюць аўтаматызацыя працэсаў, дыспетчарызацыя, аднак галоўнае ў нашай сферы ўсё ж людзі.

Лічбы

– На ўчастку водаправодна-каналізацыйнай гаспадаркі працуе 41 чалавек. Тэхнікі – 6 адзінак для розных відаў работ.
– Участак абслугоўвае 151 км трасы водазабеспячэння і 86 км трас водаадвядзення і каналізацыі. Колькасць каналізацыйна-насосных станцый: у горадзе – 17, па раёне – 3; ачышчальных збудаванняў: у раёне разам з горадам – 12.