70 гадоў сябруе з “раёнкай” Тарэса Вайцюль
Ішлі гады, мянялася аблічча газеты і яе назвы, яна знікала разам з Астравецкім раёнам і адраджалася з ім жа, мяняліся прозвішчы рэдактараў у выхадных даных і журналістаў пад артыкуламі – нязменным заставаўся толькі прыярытэт «раёнкі» сярод падпісчыкаў. Адным з якіх заўсёды заставалася сама Тарэса Эдуардаўна.
Больш за 40 гадоў разносіла пошту Тарэса Вайцюль. Але і пасля выхаду на пенсію яе сяброўства з раённай газетай не спынілася: «Астравецкая праўда» па-ранейшаму два разы на тыдзень кладзецца ў яе паштовую скрыню. І чытае яе жанчына ад загалоўка да выхадных даных.
– Люблю раённую газету, – прызнаецца Тарэса Эдуардаўна. – Хто ж яшчэ раскажа мясцовыя навіны? Дзе прачытаеш пра нашых людзей? А найбольш цікавіць, што сказаў наш Прэзідэнт па тым ці іншым пытанні. І на першай старонцы ўсё вычытаю, і на другой, і на трэцяй… Разумны ён, правільна ўсё гаворыць.
Дай Бог усім добрым людзям такіх верных сяброў, як мае наша «Астравецкая праўда»!
