"Среда размышления". Исправь свою ошибку

…Сёння дакладна ніхто не ўспомніць, калі з'явілася ў Бабраўніках невялічкая каплічка. Аднак з пакалення ў пакаленне ў вёсцы перадаецца легенда, што тут хадзіла страшная хвароба, ад якой паміралі людзі. І тады святар параіў вяскоўцам пабудаваць у цэнтры вёскі капліцу. Тую параду святара жыхары выканалі – з таго часу і стаіць на раздарожжы ў Бабраўніках каплічка.

Невялікая, але такая ўтульная і галоўнае – свая, да якой можна ў любы момант падысці і папрасіць у заступніка дапамогі. Каплічку і сёння даглядаюць усёй вёскай. Нядаўна зрабілі невялікі рамонт – і яна нібы памаладзела. А разам з ёй ажылі і жыхары вёскі Бабраўнікі. Вакол каплічкі ўстанавілі новую агароджу – старая ўжо развалілася. І зноў жа ўсё зрабілі самі – і самі ж потым дзякавалі Богу за міласць і любаваліся гэтай прыгажосцю.

Аднак нядаўна здарылася бяда. Нехта з жыхароў заўважыў, што агароджа каля капліцы зламана, а калі і як гэта адбылося – ніхто не бачыў.

Непрыемная навіна з хаты ў хату абышла ўсю вёску. А ў рэдакцыю газеты «Астравецкая праўда» аб гэтым паведаміў жыхар Бабраўнік Уладзіслаў Пралуцкі.

– Дзякуй Богу, што агароджу паставілі. Не было б яе, то, можа, і каплічку нашу знеслі, – дзяліўся мужчына.

Знайсці вадзіцеля, які пашкодзіў агароджу ля бабраўніцкай каплічкі, мы не можам. Ды і жыхары вёскі не чакаюць і не просяць пакарання крыўдзіцеля святыні. Адзінае, чаго яны хочуць, – дастукацца да яго сумлення. Людзі ўпэўнены: чалавек, які разбурыў агароджу ля капліцы, зрабіў гэта незнарок і павінен адумацца: вярнуцца на месца здарэння і аднавіць яе.

Помню, як некалькі гадоў назад, якраз напярэдадні Дня Перамогі, невядомыя вандалы зламалі маладыя ліпкі ў Астраўцы. Параненыя дрэўцы «слёзна» прасілі аб дапамозе – тады іх ратавалі работнікі камунгаса. А нядаўна, ідучы міма гэтых дрэўцаў, я злавіла сябе на думцы, што яны, наперакор сваім крыўдзіцелям, выжылі – і сёння радуюць астраўчан.

Я ўпэўнена, што і каплічка таксама будзе стаяць і, хутчэй за ўсё, дзякуючы руплівасці жыхароў Бабраўнік і тых людзей, для каго захаванне нашай спадчыны – на першым месцы. Будзе адноўлена і агароджа вакол каплічкі.

Толькі вельмі хочацца, каб чалавек, які стаў віноўнікам здарэння каля капліцы ў Бабраўніках і вельмі пакрыўдзіў жыхароў тым, што з'ехаў «уціхую», апомніўся – і ачысціў сваё сумленне. А зрабіць гэта можна вельмі проста – усяго толькі дапамагчы вяскоўцам прывесці да ладу тое, што разбурыў.

Капліца святога Роха для жыхароў Бабраўнік ва ўсе гады была прытулкам для шматлікіх просьбаў, аховай ад хвароб і напасцяў. Зараз ужо ніхто не можа дакладна сказаць, у якім годзе яна пабудавана, але некаторыя жыхары ўзгадваюць шыльду, датаваную 1860 годам. І калі ў ваколіцах вёскі даўным-даўно лютаваў страшны мор, мясцовыя жыхары абралі сваім заступнікам святога Роха, вядомага абаронцу ад чумы.

Па ўспамінах мясцовай жыхаркі пані Рэні, раней у капліцы знаходзіўся абраз святога Роха, які знік дзесьці ў 70-х гадах пасля прыезду студэнтаў на бульбакапанне. Зараз у капліцы знаходзіцца рэпрадукцыя аднаго з абразаў святога Роха.

Упершыню рамонт бабраўніцкай каплічкі быў зроблены дзесьці напачатку 70-х гадоў, дзякуючы Зянону Радзевічу. Гэтага чалавека не спалохаў час атэізму і магчымыя праследаванні. Другі значны рамонт каталіцкай капліцы адбыўся год назад па ініцыятыве мясцовага жыхара, дарэчы, праваслаўнага па веравызванні. Усёй вёскай людзі збіралі грошы, знаходзіліся і спонсары – каменьчык да каменьчыка, рубель да рубля, складваліся для таго, каб каплічка святога Роха па-ранейшаму ахоўвала сваіх жыхароў.

Нашы продкі здаўна асабліва ставіліся да такіх месцаў – магільнікаў, капліц, храмаў... Мы – іх нашчадкі таксама не павінны быць выключэннем…