"Репортёр выходит в свет". А вы пользуетесь почтовыми услугами?

15:00 / 10.10.2015

Учора ва ўсім свеце адзначаўся Сусветны дзень пошты. Напярэдадні прафесійнага свята паштовых работнікаў наш карэспандэнт выйшаў на вуліцы горада, каб высветліць, якімі паштовымі паслугамі ў наш час карыстаюцца астраўчане і чаго б яны хацелі пажадаць паштавікам нашага раёна.

Людміла Чыгілейчык, педагог дадатковай адукацыі ЦТДіМ, з унучкай Элеанорай:
– Наша сям’я часта карыстаецца паштовымі перасылкамі: адпраўляем і дасылаем пасылкі бабулі Любе ў Калінкавічы. А таксама выпісваем газеты, часопісы, плацім за “камуналку”.
Нараканняў на працу астравецкага аддзялення пошты няма, толькі чэргі з сябе выводзяць. Спадзяюся, што пасля рэканструкцыі ўсё зменіцца ў лепшы бок і ў нас будзе сапраўды ўтульна і якасна.
А пажадаю я усім работнікам пошты цярпення, багацця і пабольш усмешак.

Ганна Варковіч, повар:
– На пошце я бываю, калі трэба выпісаць нейкі часопіс ці газету, даслаць або атрымаць пасылку. А вось камунальныя плацяжы я аплачваю праз інтэрнэт-банкінг.
Хацела б павіншаваць усіх супрацоўнікаў раённай пошты і асобна нашу паштальёнку Леначку, якая заўсёды своечасова і дакладна прыносіць і газеты, і пенсію для нашай бабулі, за цяжкую працу, з якой яны спраўляюцца на “выдатна”.

Аляксандр Чаховіч, электрагазазваршчык:
– Я ў нашым раённым аддзяленні бываю штомесяц: раблю грашовыя пераводы і плачу за кватэру, святло, ваду і газ. Канешне, часцяком тут бываюць чэргі – і гэта крыху нервуе, аднак нячаста – бо нашы паштовыя работнікі працуюць якасна і хутка.
А пажадаць хачу, каб паслугі, якія прапаноўваюць нашы паштальёны, былі на высокім узроўні. І канешне, шчасця ім, здароўя і вялікіх зарплат!

Еўдакія Трэцінікава, пенсіянерка:
– Усе нашы паштальёны вельмі добрыя і ўсмешлівыя людзі – за гэта ім асабістае дзякуй! Я з Мурманскай вобласці, але ўжо 10 гадоў жыву тут, на Астравеччыне.
На пошце мяне пазнаюць, калі я за пенсіяй прыходжу або плачу за камунальныя паслугі. І мне работа беларускай пошты падабаецца значна больш, чым расійскай.

------------------------------------
Антон Чык, фота аўтара.

Похожие новости