В шестой раз в Островце прошёл благотворительный концерт в поддержку людей с ограниченными возможностями (+видео)

09:00 / 10.12.2015

Дабрачынны канцэрт у дапамогу людзям з абмежаванымі магчымасцямі прайшоў у Астраўцы ў мінулую пятніцу. Шосты год запар ён збірае нераўнадушных да чужой бяды, вучыць спагадзе, дабрыні і міласэрнасці.

А вы чулі калі-небудзь, як крычаць нябёсы і асляпляльнай маланкай, грозным громам, шквалістым ветрам звяртаюцца да чалавецтва: “Пачуй мяне!”?
А вы бачылі хоць аднойчы, як крывавяць аблокі? І балючым патокам мільярдаў слёз навальнічнага дажджу просяць: “Спыніся! Азірніся навокал: ты не адзін!”
…А вы чулі калі-небудзь, як моляцца нябёсы? Мы думаем, што гэта мы – здаровыя, самадастатковыя, упэўненыя – дапамагаем людзям, магчымасці якіх крыху адрозніваюцца ад нашых. На самой жа справе ўсё наадварот – гэта яны дапамагаюць нам і вучаць дабрыні, спагадзе, аптымізму, магчымасці бачыць чужую бяду і працягнуць руку дапамогі. Вучаць нас быць людзьмі… І дзякуючы ім, спадзяюся, мы навучымся чуць нябёсы. І калі-небудзь абавязкова ўбачым, як яны ўсміхнуцца нам у адказ...

У пачатку снежня адзначаецца дзень людзей, магчымасці якіх адрозніваюцца ад іншых, – яны абмежаваны рознымі захворваннямі. І традыцыйна ў гэты дзень у Астраўцы праходзіць дабрачынны канцэрт, які наведваюць не толькі жыхары райцэнтра, але і госці з суседніх раёнаў.
Сёлета гэтае мерапрыемства прайшло ў шосты раз дзякуючы сумесным намаганням аддзела ідэалагічнай работы, культуры і па справах моладзі, Тэрытарыяльнага цэнтра сацыяльнага абслугоўвання насельніцтва і аддзела адукацыі, спорту і турызму райвыканкама. Выручаныя падчас канцэрта грошы пойдуць на дапамогу дзецям і маладым людзям з захворваннямі аўтызм і сіндром Дауна, якіх на Астравеччыне пражывае дзесяць чалавек.

Амаль цалкам запоўненая кінаканцэртная зала “Астравец”: адны ўсаджваліся на свае месцы ў глядацкай зале, другія яшчэ знаходзіліся ў фае, дзе можна было набыць прыгожыя вырабы, якія сваімі рукамі зрабілі наведвальнікі аддзялення дзённага знаходжання для маладых інвалідаў і аддзялення дзённага знаходжання для грамадзян пажылога ўзросту тэрытарыяльнага цэнтра, палюбавацца на выставу Валянціны і Дзмітрыя Віннічкаў і нават паўдзельнічаць у галасаванні на выяўленне лепшага анёла, зробленага сваімі рукамі.

Штогод бываю на дабрачынным канцэрце – і з радасцю адзначаю, што людзей на ім не становіцца менш. Значыць, не змяншаецца колькасць неабыякавых да чужых праблем і бяды бліжняга.
Сёлета дабрачынны канцэрт называўся “Неба крычыць!” – каб засяродзіць увагу на жыцці кожнага з нас і задумацца: а ці не за мае грахі будуць расплачвацца нявінныя дзеці? Падчас мерапрыемства неба звярталася да гледачоў пяшчотнымі і мілымі галасамі юных артыстаў, жыццярадаснымі танцамі дзетак і прыгожымі нумарамі дарослых выканаўцаў Астравеччыны. Іх выступленні нікога не пакінулі раўнадушнымі: то хацелася плакаць – і мароз катарсісу прабягаў дрыжыкамі па скуры, то, быццам праменьчык сонейка, песня сагравала душу – і хацелася ўсміхацца.

Неспадзяваным сюрпрызам для астраўчан стала выступленне падчас дабрачыннага канцэрта вядомага спевака Беларусі Сашы Нэма. Выканаўшы некалькі шчырых і вясёлых песень, артыст падараваў гледачам шмат пазітыўных эмоцый і добры настрой.
Не менш шчырыя апладысменты і ўдзячныя ўсмешкі атрымалі і крэатыўныя артысты творчага калектыву “Смайл” аддзялення дзённага знаходжання для маладых інвалідаў, якія прадставілі гледачам сучасную версію вядомай казкі “Калабок”.

Больш дзвюх гадзін дабрачыннага канцэрта праляцелі непрыкметна, бо ў кожны нумар удзельнікі ўкладвалі шчырасць і цяпло душы. Напрыканцы мерапрыемства былі падведзены вынікі конкурсу на лепшага самаробнага анёла, якія былі выстаўлены ў фае. Больш за ўсё галасоў набралі анёл першакласніка Мальскага дзіцячага сада-пачатковай школы Данііла Агейчыка, калектыўная работа аддзялення дзённага знаходжання для грамадзян пажылога ўзросту тэрытарыяльнага цэнтра і анёл Валянціны Віннічак. Пераможцы былі ўзнагароджаны падарункамі ад раённай арганізацыі РГА “Белая Русь”.

Дабрачыннасць не бывае адзінокай – дзякуючы пералічэнням арганізацый, пакупцы білетаў, купонаў, асабістым ахвяраванням нераўнадушных людзей было сабрана больш за 37 мільёнаў рублёў. Больш таго, на працягу тыдня яшчэ можна ахвяраваць грошы пералічэннем на спецыяльны рахунак.

https://youtu.be/v43DO8oh-CU

---------------------------
Марына МАЦКЕВІЧ.
Фота А. МАЛЬШЭЎСКАГА.

Похожие новости