В Островецком районе провели кардиологическую акцию для детей

Падобнае мерапрыемства праводзіцца ў нашай краіне ў другі раз. Як сведчаць медыцынскія работнікі, вытокі многіх захворванняў  сардэчна-сасудзістай сістэмы дарослых ідуць менавіта з дзяцінства. Менавіта па гэтай прычыне праводзіць асветніцкую работу па прафілактыцы сардэчна-сасудзістых захворванняў неабходна са школьнага ўзросту.

У нашым раёне,  па дадзеных прафілактычных  медыцынскіх аглядаў,   7,6 працэнтаў дзяцей школьнага ўзросту і 4,5 працэнты выхаванцаў дашкольных устаноў маюць лішак масы цела, у 36 дзяцей выяўлены прыроджаныя парокі сэрца. З 870 дзяцей у 22 выяўлена вегетатыўная дысфункцыя, у 6 школьнікаў –  артэрыяльная гіпертэнзія, у 10 – атлушчэнне.

–  У апошнія гады ўзрастае колькасць дзяцей з вегетатыўнай дысфункцыяй і з артэрыяльнай гіпертэнзіяй, –  расказвае раённы ўрач-педыятр Галіна Мікалаеўна Зубель. – Усё гэта звязана з нерацыянальным харчаваннем, нізкім узроўнем фізічнай культуры ў сям'і,  камп'ютарызацыяй і невыкананнем распарадку дня. Прычым часцей за ўсё павышэнне артэрыяльнага ціску адзначаецца ў дзяцей і падлеткаў, якія пакутуюць ад лішку масы цела і атлушчэння, якія з'яўляюцца фактарамі развіцця цукровага  дыябету другога тыпу і  ранніх формаў атэрасклярозу.

Раённы ўрач-педыятр Г.М. Зубель і падлеткавы ўрач-педыятр А.В. Хаменка адправіліся ва ўстановы адукацыі, каб расказаць школьнікам пра здаровы лад жыцця і тое, як пазбегнуць захворванняў сэрца.

Школьнікі з Гудагайскай сярэдняй школы і СШ №1 Астраўца прайшлі абследаванне на апараце «Аналізатар цела Таніта», які дазваляе вызначыць вагу, індэкс масы цела, агульнае ўтрыманне вады ў арганізме, утрыманне цялеснага тлушчу ў працэнтах і масу цела без тлушчу.

Спецыялісты памералі артэрыяльны ціск у школьнікаў і правялі практычныя заняткі з адпрацоўкай навыкаў па правядзенні сардэчна-лёгачнай рэанімацыі. Жадаючых рэанімаваць «Максіма» –  менавіта такую назву носіць трэнажор для правядзення лёгачна-сардэчнай рэанімацыі –  было шмат. Школьнікі з задавальненнем адпрацоўвалі веды, якія атрымалі падчас лекцыі і падчас заняткаў па асновах бяспекі жыццядзейнасці.