В "Ласточке" прошёл конкурс "Академия звёзд"

Хто хоць аднойчы быў у летніку, ведае, што сумаваць там немагчыма. Кожны дзень у “Ластаўцы” праходзіў па-свойму асабліва, насычана і быў прысвечаны пэўнай тэматыцы: “Дзень бізнесу”, “Дзень смеху”, “Дзень пажаданняў”, “Іван Купала”, “Зоркі роднай Беларусі” і многія іншыя – дзеці з радасцю ўдзельнічалі ў мерапрыемствах і рыхтаваліся на наступнага, не менш цікавага дня.

Асаблівай папулярнасцю ў адпачываючых карысталася “Акадэмія зорак” – спецыяльны конкурс, у якім кожны мог прадэманстраваць свае таленты. А хто ж не хоча адчуць сябе сапраўднай зоркай? Пагэтаму ў кожным з чатырох атрадаў прадумвалі чарговае выступленне і старанна да яго рыхтаваліся. Тут было ўсё: песні, танцы, гумар, пастаноўкі – і непасрэдны дзіцячы артыстызм. Журы ж трэба было выбраць лепшы з чатырох атрадаў. Не абышлося і без інтрыгі – другі і чацвёрты атрады набралі аднолькавую колькасць балаў. Лёс пераможцы вызначалі выбары: дзеці з астатніх атрадаў аддавалі свой голас за тых, хто ім найбольш спадабаўся. У выніку пераможцам “Акадэміі зорак” стаў другі атрад пад назвай “Сусвет”.

– Конкурс прайшоў цікава, – дзеліцца ўражаннямі старшы выхавацель змены і арганізатар “Акадэміі зорак” Павел Букель. – Дзеці ў літаральным сэнсе “гарэлі”, творча падыходзілі да кожнага нумара. Хтосьці спрабаваў свае сілы ўпершыню – магчыма, гэты дэбют адкрые для іх і выхад на сапраўдную сцэну.

На ўрачыстым закрыцці летніка адзначылі актывістаў змены –  спонсарам узнагароджвання выступіла ПВГУП “ДзяткоБуд”. Дванаццаць актывістаў атрымалі сертыфікаты на 500 тысяч рублёў кожны на набыццё канцылярскіх тавараў у магазіне “Карандаш”.