Специалисты Центра творчества детей и молодёжи помогут каждому школьнику найти занятие по душе

12:18 / 08.09.2016

З 5 верасня ва ўсіх навучальных установах нашай краіны стартаваў тыдзень пазашкольнай работы – падчас яго правядзення кожны школьнік зможа выбраць сабе занятак па душы. А дапамогуць у гэтым спецыялісты Цэнтра творчасці дзяцей і моладзі.

Што сабой уяўляе цэнтр творчасці, чым тут можна заняцца і чаму навучыцца – пра ўсё гэта мы папрасілі расказаць яго дырэктара Вераніку Мар'янаўну Кумішча.

– Падчас летніх канікул педагогі Цэнтра творчасці дзяцей і моладзі праводзілі акцыю «Лета на карысць». Як яна прайшла і што найбольш запомнілася дзецям і педагогам?

– Так, сёлета ўпершыню мы сталі арганізатарамі такой цікавай акцыі. Раней летам мы таксама выязджалі ў аздараўленчыя летнікі раёна. А сёлета вырашылі арганізаваць адпачынак тым школьнікам, якія засталіся дома. У нас працавалі так званыя дваровыя пляцоўкі, на якіх дзеці вучыліся рабіць прыгожыя рэчы, удзельнічалі ў спартыўных спаборніцтвах ці гульнявых праграмах. Акрамя таго, у цэнтры творчасці педагогі праводзілі майстар-класы па розных накірунках. Вынікі анкетавання сведчаць, што дзецям спадабалася такое баўленне часу.

%d0%b2-%d1%86%d0%b5%d0%bd%d1%82%d1%80%d0%b5-%d1%82%d0%b2%d0%be%d1%80%d1%87%d0%b5%d1%81%d1%82%d0%b2%d0%b01

– Што ўяўляе сабой Цэнтр творчасці дзяцей і моладзі?

– У штаце нашага цэнтра 31 чалавек, 14 з іх – педагогі дадатковай адукацыі. Мы не толькі праводзім заняткі па інтарэсах, але і аказваем метадычную дапамогу кіраўнікам аб'яднанняў па інтарэсах школ раёна. Наш цэнтр – каардынатар выхаваўчай работы ва ўсім раёне: большасць творчых, навуковых, даследчых мерапрыемстваў і конкурсаў праходзіць менавіта праз нашу ўстанову. Мы курыруем работу аздараўлненчых летнікаў, дзіцячых грамадскіх аб'яднанняў, праводзім прафілактычныя акцыі і мерапрыемствы.

Сёлета да ўжо вядомых і папулярных заняткаў дадаліся новыя. Так, Валянціна Вільеўна Віннічак арганізоўвае работу «Папялушкі» і «Скарбніцы» – тут можна будзе навучыцца тэхнікам саломапляцення; Людміла Мікалаеўна Рагавенка запрашае дзяцей на заняткі «МукаСолькі» і «Чароўнай Паперы», дзе яе выхаванцы навучацца ствараць вырабы з салёнага цеста і паперы; Аляксандра Дзмітрыеўна Юрчык будзе весці заняткі па фатаграфіі і графічным дызайне. Застануцца і ранейшыя гурткі, якія карыстаюцца папулярнасцю ў дзяцей і іх бацькоў: Аляксандра Мікалаеўна Букель працягвае развіваць інтэлектуальны рух і творчыя мастацкія здольнасці; Наталля Вацлаваўна Рынковіч прадоўжыць заняткі па дэкаратыўна-прыкладной творчасці на базе Гудагайскай школы, а Людміла Іванаўна Кухарэвіч будзе вучыць малюнку дзяцей Варнянскага НПК; Андрэй Казіміравіч Страцэўскі запрашае школьнікаў на футбол; прадоўжыць работу танцавальны «Нон-стоп» пад кіраўніцтвам Наталлі Валянцінаўны Янкоўскай; Аксана Вацлаваўна Мешкіс і Вікторыя Іванаўна Касцюк будуць вучыць дзяцей вакалу; прадоўжыць работу «Школа ранняга развіцця» Людмілы Іосіфаўны Чыгілейчык; Алена Іванаўна Чарняўская будзе вучыць школьнікаў швейнай справе; Ала Мар'янаўна Зяленская працягне выкладаць для юных мастакоў і рыхтаваць старэйшых школьнікаў да экзамена па акадэмічным малюнку.

Будуць працаваць і іншыя цікавыя і карысныя гурткі. Прадоўжаць работу нашы сумяшчальнікі. Падчас першага працоўнага тыдня праходзіць асноўны набор у нашы групы, хаця дзеці могуць запісацца да нас і на працягу года.

%d0%b2-%d1%86%d0%b5%d0%bd%d1%82%d1%80%d0%b5-%d1%82%d0%b2%d0%be%d1%80%d1%87%d0%b5%d1%81%d1%82%d0%b2%d0%b02

– А якія навінкі чакаюць дзяцей?

– Спадзяемся, што ў будучым адным з папулярных заняткаў па інтарэсах стане навучанне верхавой яздзе на конях. Заняткі ўзялася праводзіць педагог-трэнер Юлія Васільеўна Ліпская ў аграсядзібе «Радзюшы». Наведваць гэтыя «ўрокі» могуць дзеці з сямі гадоў. Яны   будуць бясплатнымі, аднак падвоз дзяцей павінны арганізаваць іх бацькі. Плануем, што займацца тут будуць два разы на тыдзень. Школьнікаў навучаць даглядаць за коньмі і ездзіць на іх.

– Некалькі гадоў назад менавіта Цэнтр творчасці дзяцей і моладзі стаў арганізатарам інтэлектуальных гульняў для школьнікаў. Ці прадоўжыцца гэтая справа ў гэтым навучальным годзе.

– У адрозненні ад дарослага чэмпіянату, мы праводзім гульні для трох узроставых катэгорый – такія патрабаванні прад'яўляе ўпраўленне адукацыі. Таму дзіцячыя каманды гуляюць не штомесяц. У мінулым годзе гульні праходзілі ў актавай зале цэнтра творчасці – гэта выклікала пэўныя нязручнасці для юных інтэлектуалаў, бо зала невялікая. У гэтым навучальным годзе школьны чэмпіянат будзе працягвацца. А вось дзе будуць праходзіць гульні, гаварыць пакуль што рана.

– Астравецкі цэнтр творчасці дзяцей і моладзі вядомы сваім удзелам у міжнародных праектах рознага ўзроўню. Што дае вам такая дзейнасць?

– На працягу многіх гадоў мы рэалізуем адукацыйны праект з Літоўскай Рэспублікай. Дзякуючы яму, многія нашы выхаванцы не раз бывалі ў гасцях ў сваіх аднагодкаў у Літве, а літоўскія школьнікі наведвалі Беларусь.

Апошнія тры гады мы цесна супрацоўнічаем з АТ НІАЭП: тры нашы праекты сталі пераможцамі іх дабрачыннага конкурсу. І калі мінулагоднія праекты, на якія мы атрымлівалі гранты ад НІАЭП, былі скіраваны на турыстычны адпачынак, то сёлета мы сталі пераможцамі ў намінацыі «Культура і спорт». На рэалізацыю праекта «І дзеці, і дарослыя малююць мірны атам» мы атрымалі 200 тысяч расійскіх рублёў. У рамках гэтага праекта нашы выхаванцы наведаюць пляцоўку будаўніцтва Беларускай АЭС – і паспрабуюць намаляваць усё, што ўбачаць. Потым будуць аформлены выставы – мы спадзяёмся, што лепшыя работы нашых выхаванцаў упрыгожаць сцены адміністрацыйных будынкаў Беларускай АЭС.

–   Ведаю, што ў мінулым годзе ўсе заняткі па інтарэсах, якія наведвалі дзеці, былі бясплатнымі. А сёлета?

– Як і раней, усе заняткі для школьнікаў будуць бясплатнымі. У мінулым годзе наш цэнтр наведвалі 1210 дзяцей, заняткі па інтарэсах – іх было 85 – былі адкрыты ва ўсіх школах. У нас працавала 44 педагогі, 32 з іх былі сумяшчальнікамі. Спадзяёмся, што сёлета жадаючых працаваць і вучыцца ў нас будзе не менш. Дарэчы, на платнай аснове мы арганізоўваем і заняткі для дарослых: у гэтым годзе ў нас будуць працаваць фітнэс і танцавальная аэробіка.

–   Ведаю, што педагогі і выхаванцы цэнтра штогод займаюць годнае месца ў рэйтынгу абласных устаноў дадатковай адукацыі. Якімі былі самыя значныя ўзнагароды мінулага года?

– Асабліва нас парадаваў удзел у міжнародным конкурсе творчых работ «Зялёная планета» – па папярэдніх звестках, нашы выхаванцы заваявалі ў ім 13 дыпломаў. Штогод мы атрымліваем узнагароды на рэспубліканскім конкурсе «Выратавальнікі вачыма дзяцей» – і сёлета работа выхаванцаў Валянціны Вільеўны Віннічак узнагароджана Дыпломам ІІ ступені. Дзве ўзнагароды прывезлі нашы педагогі і выхаванцы з рэспубліканскага конкурсу «Калядная зорка», ёсць шэраг значных перамог на абласным ўзроўні. А па выніках рэалізацыі абласной праграмы «Супрацоўніцтва» наш цэнтр заняў другое месца.

Зразумела, што ўсяго гэтага не было б без ініцыятыўных педагогаў і таленавітых дзяцей, якіх мы з радасцю чакаем і сёлета.

– Поспехаў вам і ажыццяўлення ўсіх планаў і мар.

Падрыхтавала Алена ЯРАШЭВІЧ.

Фота з архіва Цэнтра творчасці дзяцей і моладзі.

Похожие новости