Отправляйте детей в "Ласточку" за хорошим настроением

З надыходам летніх канікулаў многія бацькі пачынаюць задумвацца над тым, чым заняць сваё дзіця, каб ад адпачынку ён атрымаў як мага больш карысці.

Адным  з  самых  папулярных  “курортаў”  для  дзяцей з’яўляецца бабуліна хата ў вёсцы – свежае паветра, рэчка, сябры…
Чаго яшчэ жадаць? Але бабулі ёсць не ва ўсіх, ды і не ўсе яны жывуць у вёсцы. Таму альтэрнатывай для многіх хлопчыкаў і дзяўчынак  з’яўляецца адпачынак у летнім лагеры.
У  астравецкіх  школьнікаў выбар  сёлета  быў  вялікі  – аздараўленчыя лагеры на базе школ, летнік для адораных дзяцей “Алімпіёнік”, для турыстаў і аматараў спорту і здаровага ладу жыцця  “Вандроўнік”, актывістаў і лідараў паклікала “Вясёлка”  і, канешне ж, любы жадаючы мог адпачыць у адзіным стацыянарным  лагеры  ў    нашым  раёне “Ластаўка”.  За  чатыры  змены  тут  змогуць  аздаравіцца  і  добра правесці час 420 школьнікаў рознага ўзросту.
Другая змена “Ластаўкі” працавала    пад  дэвізам  “Ні  дня –  без  свята”,  а  гэта  значыць –  кожны  дзень  тут  распісаны літаральна  па  хвілінах  і  на кожны  было  запланавана  нават не адно, а некалькі цікавых мерапрыемстваў.  Між  тым распарадак  дня  ў летніку праходзіць  строга  па  раскладу. Пад’ём, зарадка, снеданне, работа  гурткоў,  спартыўныя мерапрыемствы… Але ўсё гэта рабятам толькі даспадобы.
– Нам тут вельмі падабаецца, –  хорам на маё пытанне адказваюць самыя маленькія выхаванцы з атрада “Востраў свабоды” і працягваюць: – Мы любім “Ластаўку”! І ў наступным годзе таксама сюды прыедзем! Абавязкова!
Занятасць дзяцей у летніку забяспечвае  вялікі  калектыў  пад кіраўніцтвам  дырэктара  Арцёма Уладзіміравіча Шатраўскага і  старшай выхавальніцы Марыны Генрыхаўны Шаблоўскай. Дапамагаюць ім педагог-арганізатар Алена  Віктараўна  Урбановіч, псіхолаг  Галіна  Рамуальдаўна Сярогіна,  культработнік  Павел Генадзьевіч  Букель,  інструктар па  фізічнай  культуры  Вадзім Ігаравіч Усціменка, цэлы дэсант педагогаў-выхавальнікаў з розных школ раёна, работнікі кухні і тэхнічны персанал.
Падчас другой змены ў летніку адпачывалі 110 дзетак, усе яны ў адпаведнасці з узростам былі размеркаваны па трох атрадах.
Самыя  маленькія  адпачывалі ў  трэцім атрадзе пад назвай “Востраў свабоды”, другі атрад –  “Тарнада”  –  для  дзяцей  10-13  гадоў,  а  самыя  старэйшыя адпачывалі ў   першым атрадзе “Халі-Галі”.
Акрамя атрадных і лагерных мерапрыемстваў  дзеці  падчас усіх  змен  могуць  наведваць гурткі.  Старэйшыя  зацікавіліся гуртком  “Юны  журналіст”,  які вяла Юлія Анатольеўна Бруйко, малодшым  школьнікам  больш даспадобы  “Музычны  калейдаскоп” Аксаны Іванаўны Пазлевіч, і  ўсе  яны  з  задавальненнем хадзілі  на “Флэш-моб” ад Наталлі Валянцінаўны Янкоўскай.
Жадаючыя,  а  такіх  было  60 чалавек, запісаліся ў бібліятэку, маглі  выбраць кнігу ці часопіс. Два  разы  на  тыдзень  да  дзяцей  прыязджае  бібліятэкар бібліёбуса з Астраўца  Марына Здзіславаўна Пруднічэнкава.
А  яшчэ  –  экскурсія  на пагранічную  заставу,  удзел  у  “Зарніцы”,  сустрэча  з супрацоўнікамі раённага аддзе-ла па надзвычайных сітуацыях, благачынным  цэркваў  Астра-вецкай  благачыннай  акругі, настаяцелем  царквы  святых  апосталаў  Пятра  і  Паўла Георгіем  Савіцкім,  педагогамі цэнтра творчасці і шэраг іншых і цікавых мерапрыемстваў. Словам, час тут можна правесці не толькі весела, але і з карысцю.
– Я прыехаў у лагер першы раз, – дзеліцца ўражаннямі Данік Кавалеўскі з Кямелішак. – Мне тут вельмі спадабалася. Асабліва гульня,калі мы шукалі дыверсанта. Тады наш атрад “Тарнада” выйграў – і мы вельмі радаваліся гэтай падзеі. Тут весела. У наступным годзе таксама папрашу бацькоў, каб прывезлі мяне сюды.
На  жаль,  адпачыць  на  вадзе ў  дзяцей  атрымлівалася  нечаста – іх, канешне,  вывозілі на Янаўскае  вадасховішча,  але рабілася гэта адзін-два разы за змену. А  ў мінулым годзе аддзел адукацыі набыў для “Ластаўкі” пяць  басейнаў. Сёлета тры з іх устаноўлены каля карпусоў – і ў гарачае надвор’е, а менавіта такое выпала на другую змену, у дзяцей была  магчымасць пад наглядам  дарослых  “прыняць водныя працэдуры”.
Усё ў летніку арганізавана так, як належыць. Дзяжурны ўрач Інэса Раманаўна Кардзіс і медыцынская сястра Лілія Даніілаўна  Вакулік  сочаць за  здароўем  пацыентаў, дзяжурныя  педагогі  арганізоўваюць цікавыя мерапрыемствы,  забаўляльныя  праграмы і ахоўваюць іх спакой і сон, а работнікі кухні робяць усё, каб дзеці былі не толькі  добра  накормлены, але  і  атрымалі  неабходныя вітаміны.
– За гэты год мы адрамантавалі чацвёрты корпус: тут былі заменены столь і падлога, устаўлены новыя дзверы, на вокнах з’явіліся жалюзі, набылі новую мэблю. Зроблены рамонт у сталовай, сюды набылі  новае тэхналагічнае абсталяванне для харчблока, сучасныя халадзільнікі і пасудамыечную машына, – расказвае  дырэктар летніка Арцём Уладзіміравіч Шатраўскі.
– Дарэчы, жадаючыя адпачыць у “Ластаўцы” ёсць. Пра гэта сведчыць той факт, што ўсе пуцёўкі на трэцюю змену ўжо раскуплены, а вось на чацвёртую яшчэ засталіся – таму кожны можа прыехаць сюды і правесці апошні летні месяц весела і з карысцю, – сцвярджае Арцём Уладзіміравіч.
Словам,    прыязджайце  ў “Ластаўку” – не пашкадуеце!

________________________

Алена ЯРАШЭВІЧ,
фота аўтара.