Чтобы велосипед не украли...

Нягледзячы на тое што гэты двухколавы від транспарту не патрабуе паліва і “харчуецца” выключна сілай і энергіяй чалавека, веласіпед – задавальненне не зусім таннае. Тым не менш, як гэта ні парадаксальна, уладальнікі веласіпеда коштам каля 500 долараў могуць з лёгкасцю пакінуць яго без нагляду ці прымацоўваюць замком, які адкрываецца голымі рукамі. Гэтым, вядома ж, карыстаюцца злодзеі: крадуць “велікі”, каб перапрадаць ці каб проста пахуліганіць. А ўладальнікі затым у роспачы прыходзяць у міліцыю: дапамажыце!

А некаторыя нават не ставяць яго ў пад’езд, а пакідаюць на вуліцы, нібыта наўмысна прапаноўваючы злодзеям “паспытаць шчасця”.

Рэдка хто з уладальнікаў захоўвае пашпарт веласіпеда, многія з іх не могуць даказаць факт яго набыцця, не ведаюць нумар рамы – усё гэта змяншае шансы вярнуць украдзенае.

Хочацца папярэдзіць і тых грамадзян, што імкнуцца сэканоміць і набываюць тавар “з рук”, – вы рызыкуеце купіць украдзеную рэч і трапіць у двайную пастку: пазбавіцеся і тавару, і грошай, патрачаных на яго набыццё. Акрамя таго, супраць вас можа быць узбуджана крымінальная справа.

Захоўвайце дакументы на веласіпед. Калі іх няма, сфатаграфуйце серыйны нумар рамы, запомніце асаблівыя прыкметы: аксесуары, наклейкі, драпіны – усё, што дапаможа яго знайсці і апазнаць.

- Самы надзейны спосаб – не пакідаць веласіпед без нагляду і прымацоўваць яго за кола і раму тоўстым трывалым тросам на замок. Добрым дапаўненнем будзе веласігналізацыя;

- памятайце, што лесвічная пляцоўка, нават закрытая, – не лепшае месца для захоўвання вашай двухколавай “ластаўкі”;

- нават калі ненадоўга зайшлі ў будынак, пакідайце веласіпед у бачным для вас месцы;

- пакідаючы транспарт, забірайце з сабой усё, што можна зняць: велакамп’ютар, помпу, ліхтар, калі можна, то сядзенне – у такім выглядзе веласіпед для злодзеяў будзе непрывабным.

Што рабіць, калі веласіпед укралі?

- Адразу тэлефануйце ў міліцыю, пастарайцеся знайсці сведак, запішыце іх даныя, нумары тэлефонаў;

- размясціце інфармацыю аб крадзяжы ў інтэрнэце на адпаведных форумах;

- праглядзіце аб’явы аб продажы веласіпедаў – магчыма, знойдзеце там штосьці знаёмае.

І галоўнае – надзейна ахоўвайце свае веласіпеды.