Брендом системы образования области стал Островецкий центр творчества детей и молодежи

Перамогу ў абласным аглядзе-конкурсе ўстаноў адукацыі за права з’яўляцца Брэндам сістэмы адукацыі вобласці атрымаў Астравецкі цэнтр творчасці дзяцей і моладзі.

Абласны  агляд-конкурс  устаноў адукацыі праводзіўся ў другі раз – пачатак яму быў пакладзены ў 2011 годзе. Тады Астравецкі цэнтр творчасці стаў другім. А да гэтага ён быў прызнаны трэцім у  абласным конкурсе на лепшую ўстанову адукацыі. Значыць, усё  заканамерна. Але… Сёлета ўмовы  конкурсу,  у  адрозненне  ад  мінулых гадоў,    былі больш  складаныя:  выбіраўся толькі адзін пераможца ў кожнай намінацыі.
Удзел  ва ўсемагчымых конкурсах  рознага  ўзроўню і  перамогі  ў іх  вось  ужо некалькі  гадоў –  прэрагатыва Астравецкага цэнтра творчасці дзяцей і моладзі. Толькі за мінулы год  педагогі  і выхаванцы  цэнтра  атрымалі  68  прызавых  месцаў  у  розных  абласных, рэспубліканскіх  і  міжнародных  конкурсах  –  а  гэта  ў  два  разы  больш  у параўнанні з мінулым годам. Дзевяць дыпломаў і грамат былі атрыманы на міжнародных конкурсах –пагадзіцеся, значныя дасягненні!
Імёны  Дзіяны  Гейба,  Наталлі Арлоўскай,  Кацярыны  Дыско,  Лізы Дрэма, Арыны Букель, Дзіяны Мілаш, Анжалікі Гурштын, Расціслава Гудойця, Дзмітрыя Буйко, калектыву “Эдэльвейс”  і  многіх-многіх  іншых  – пералічыць  усіх  проста  немагчыма  –  вядомы не толькі ў нашым раёне, але і за яго межамі. Іх вырабы, творчыя і музычныя здольнасці не раз пакаралі членаў  абласнога  і  рэспубліканскага журы – і дзеці па праву атрымлівалі заслужаныя ўзнагароды.
Усё гэта адбывалася дзякуючы таму, што  яны  з  задавальненнем  наведвалі заняткі  гурткоў  Астравецкага  цэнтра творчасці дзяцей і моладзі,  якімі сёння  ахоплена амаль палова вучняў з усяго раёна.
Зразумела,  што  вялікі  ўклад  ва  ўсе перамогі  і  дасягненні  вучняў  унеслі педагогі.  Сёння  ў  Астравецкім  цэнтры творчасці на чале дырэктарам Наталляй Уладзіміраўнай  Сянюць  працуюць  восем асноўных педагагічных работнікаў – намеснікі дырэктара Вераніка Мар’янаўна Малышка і Рыта Эдмонтаўна Дрэма, метадыст па турызму і краязнаўству Вольга Валянцінаўна Сідлярэвіч, метадыст па рабоце гурткоў  Вольга Валянцінаўна Сцефановіч  і педагогі  дадатковай  адукацыі Аляксандра Мікалаеўна  Букель, якая вучыць дзяцей  ствараць непаўторныя малюнкі.  Наталля  Вацлаваўна Рынковіч,  без яе цудоўных  работ з  бісеру  і  самаробных лялек немагчыма  ўявіць ні  адну  выставу. Заўзяты  аматар футболу  Андрэй  Казіміравіч Страцэўскі  і  народны  майстар  саломапляцення  Валянціна  Вільеўна  Віннічак.
Астатнія  педагогі працуюць у цэнтры па сумяшчальніцтву, але  тым не менш таксама прынеслі цэнтру некалькі прызавых месцаў.
Мінулы  год  быў  багатым  і на  калектыўныя  перамогі  –   Астравецкі  цэнтр  творчасці заняў ІІІ месца ў абласным конкурсе па добраўпарадкаванні “Квітней,  мой  край”,  стаў лепшым  у  абласным  конкурсе па рэалізацыі  праграмы  “Супрацоўніцтва”, а сайт установы прызнаны ўзорным.
І зразумела, што ўсё гэта паспрыяла таму, што цэнтр быў прызнаны  Брэндам  года  сярод устаноў адукацыі. Цалкам заслужаная ўзнагарода!
Конкурс  быў  аб’яўлены  ў пачатку  мая  –  якраз  заканчэнне навучальнага года, калі змяніць сітуацыю ўжо амаль нельга.  Але  таму  і  перама гаюць  самыя  працавітыя  і актыўныя, што працуюць яны на працягу года, а не ў апошні месяц. Так атрымалася і з Астравецкім  цэнтрам творчасці.
–  У  нашым  цэнтры  працуюць сапраўдныя прафесіяналы,  кожны з іх  – лепшы ў сваім  накірунку, –  расказвае  дырэктар  цэнтра  Наталля Уладзіміраўна  Сянюць. – Але гэта не азначае,  што  педагог “варыцца” толькі ў  сваім  гуртку.  Усе мы  працуем  разам дзеля агульнай мэты –  дапамагчы  дзецям  раскрыць  свае здольнасці.  Часам можна  пачуць,  што галоўнае  ў  жыцці –  матэрыяльныя каштоўнасці. Але  памыляюцца  тыя,  хто так разважае. Сёння я з упэўненасцю магу сказаць, што ўсе, хто працуе ў цэнтры творчасці, – а гэта людзі рознага ўзросту і прафесій –  займаюцца з дзецьмі  па закліку душы, яны гатовы аддаваць сябе і сваю творчасць выхаванцам, навучыць іх усяму, што ўмеюць самі, абудзіць у кожным дзіцяці іскрынку таленту.
Прыходзяць на працу ў цэнтр і маладыя спецыялісты – у іх ёсць на каго раўняцца, і праца для кожнага ў  радасць.
Кажуць, што  адзін у полі не воін. Менавіта па гэтым прынцыпе і жывуць педагогі і адміністрацыя цэнтра. І таму шматлікія конкурсы рознага ўзроўню, добраўпарадкаванне  кабінетаў  і тэрыторыі цэнтра  яны рыхтуюць і робяць  сумеснымі    намаганнямі.  Сёння звычайнымі радавымі работамі абласное,  а  тым  больш  рэспубліканскае журы не здзівіш, і педагогі штораз выдумваюць  нешта  незвычайнае  і  абавязкова  аўтарскае,  таму  іх  работы атрымліваюцца жывымі і прыгожымі.
Але  не  толькі  конкурсамі  жывуць педагогі і выхаванцы цэнтра творчасці. Яны робяць усё, каб зацікавіць дзяцей справамі.  Штогод  у  цэнтры  адкрываюцца новыя гурткі, якія адразу ж знаходзяць  аматараў.  Толькі  ў  мінулым годзе тут пачалі працаваць 19 новых гурткоў  –  “Школа  ранняга  развіцця”, “Камп’ютарная  графіка”,  “Займальная інфарматыка”, “Тэатральны”, “Юны карэспандэнт”,  “Турысцка-краязнаўчы” і шэраг іншых.
Шмат  гадоў  па  ініцыятыве  цэнтра творчасці  і  пры  падтрымцы  аддзела  адукацыі  ў  раёне  працуе  летнік піянерскага  актыву  і  вучнёўскага самакіравання “Вясёлка”, які размяшчаецца на базе Рымдзюнскай школы з літоўскай  мовай  навучання. А ў мінулым годзе па выніках абласнога  конкурсу  “Лета-2012”    рымдзюнская “Вясёлка”  была  прызнана лепшым летнікам вобласці  –  дзякуючы адміністрацыі,  педагогам  і,  канешне  ж, таленавітым  дзецям, якія тут адпачывалі.
Педагогі  цэнтра творчасці працуюць і летам, яны пастаянна наведваюць прышкольныя пляцоўкі  і  стацыянарныя  летнікі  і  дзеляцца сваім  майстэрствам  са школьнікамі  з  розных куткоў раёна, займаюцца добраўпарадкаваннем цэнтра  і  падрыхтоўкай выставачных работ.
І  толькі  дзякуючы штодзённай працы і стараннасці дасягаюць перамог!

________________

Алена ЯРАШЭВІЧ.