Натарыус: дзіця збіраецца на адпачынак за мяжу

Штогод непаўналетнія грамадзяне Беларусі адпачываюць не толькі ў нашай краіне, але і за яе межамі. І ў сувязі з надыходам летняга перыяду да натарыуса ўсё часцей звяртаюцца законныя прадстаўнікі – бацькі ці апекуны непаўналетніх з пытаннем: “Які дакумент неабходна аформіць, калі малыш адпраўляецца адпачываць за межы Беларусі без бацькоў, напрыклад, у лагер?”, “Згода аднаго ці дваіх бацькоў патрабуецца для таго, каб дзіця паехала адпачываць за мяжу?”, “Ці трэба афармляць згоду бацькі, калі сын ці дачка паедзе адпачываць з маці?” і іншае.

У адпаведнасці з Законам “Аб парадку выезду з Рэспублікі Беларусь і ўезду ў Рэспубліку Беларусь грамадзян Беларусі”, які пачаў дзейнічаць з 30 сакавіка 2010 года, калі дзіця едзе за мяжу без бацькоў (або яго іншых законных прадстаўнікоў), пры сабе трэба мець пісьмовую згоду абодвух законных прадстаўнікоў.
Адным з галоўных новаўвядзенняў, устаноўленых гэтым Законам, з’яўляецца магчымасць непаўналетніх выязджаць з нашай краіны па сваіх дакументах у суправаджэнні аднаго з законных прадстаўнікоў пры прад’яўленні імі супрацоўніку органа пагранічнай службы дакументаў, якія пацвярджаюць статус законнага прадстаўніка – пасведчанне аб нараджэнні дзіцяці, пашпарт з адзнакай аб дзіцяці і іншае. Акрамя гэтага, дзеці могуць выязджаць за межы Беларусі без суправаджэння законных прадстаўнікоў, але з пісьмовай згоды аднаго з іх для аздараўлення, лячэння, кансультацый пры прад’яўленні асобай, што іх суправаджае, спісу дзяцей, якія выязджаюць на аздараўленне за мяжу ў складзе агульнай ці спецыяльнай групы.
Пісьмовая згода законнага прадстаўніка на выезд з Беларусі непаўналетняга павінна быць зацверджана натарыусам або іншай абавязанай асобай, якая мае на гэта права, або супрацоўнікам падраздзялення па грамадзянству і міграцыі органа ўнутраных спраў па месцы жыхарства законнага прадстаўніка ці непаўналетняга, або кампетэнтным органам ці абавязанай асобай замежнай дзяржавы.
Натарыусам пры зацвярджэнні згоды законнага прадстаўніка ў адносінах да непаўналетняга правяраюцца дакументы, якія пацвярджаюць роднасныя адносіны ці ўстанаўленне апекі. Гэта могуць быць пасведчанне аб нараджэнні; дакумент, які пацвярджае асобу законнага прадстаўніка, у якім ёсць адзнака аб непаўналетнім; копіі запісаў актаў грамадзянскага стану; рашэнне органа апекі аб устанаўленні і прызначэнні апекуна і іншыя.
Неабходна таксама адзначыць, што ў адпаведнасці з п.п. 2.4 п.2 арт.257 Падатковага кодэкса законныя прадстаўнікі непаўналетніх грамадзян вызваляюцца ад выплаты дзяржаўнай пошліны за натарыяльнае пасведчанне згоды на выезд з Беларусі непаўналетняга. 

Т. БАГУШЭВІЧ, дзяржаўны натарыус.