Эта весна для ветерана Великой Отечественной войны Егора Михайловича Александровича выдалась богатой на праздники

09:38 / 07.05.2016

Багатай на святы выдалася сёлетняя вясна для ветэрана Вялікай Айчыннай вайны Ягора Міхайлавіча Александровіча.

Праз некалькі дзён ён разам з усёй краінай адзначыць галоўнае ў сваім жыцці свята – Дзень Перамогі.

А напрыканцы красавіка на падворку і ў хаце ветэрана ў вёсцы Фальваркі было цесна ад гасцей. Павіншаваць Ягора Міхайлавіча з 90-гадовым юбілеем сабралася ўся яго вялікая сям’я – дзеці, унукі, праўнукі, прыйшлі сябры і суседзі. Завіталі і госці з раёна: старшыня раённага Савета дэпутатаў Ірына Эдуардаўна Тальчук, старшыня раённага савета ветэранаў Расціслаў Арсенцьевіч Герт, начальнік аддзела ідэалагічнай работы, культуры і па справах моладзі Наталля Уладзіміраўна Сянюць, старшыня раённай арганізацыі РГА “Белая Русь” Ірына Фёдараўна Раткевіч, першы сакратар райкама БРСМ Аксана Паўлаўна Лазарава, а таксама старшыня Варнянскага сельскага Савета Аляксандр Часлававіч Вярбовіч, артысты народнага ансамбля “Світанак”, якія свае пажаданні ветэрану выказалі ў песнях “Кацюша” і “Сто лят” разам з імі спявалі ўсе госці і сам юбіляр. Крыху раней Ягора Міхайлавіча павіншавала праўленне СВК “Варняны” і ўпраўленне па працы, занятасці і сацыяльнай абароне.

Ветэран быў расчулены да слёз такой увагай. Ён расказаў гасцям, большасць з якіх па ўзросту – яго дзеці ці нават унукі, пра сваё франтавое юнацтва – на вайну Ягор Міхайлавіч пайшоў васемнаццацігадовым юнаком-добраахвотнікам, а таксама пра сваё сённяшняе жыццё. Выпіў бакал шампанскага за здароўе ўсіх прысутных і за галоўную каштоўнасць света – мір. І нават паказаў майстар-клас у полечцы!

А новенькі веласіпед, які падарыў юбіляру райвыканкам па яго просьбе, стаў для Ягора Міхайлавіча найлепшым і самым жаданым падарункам.

Ніна РЫБІК, фота аўтара.

Похожие новости