“Сваё, астравецкае”: новы конкурс “Астравецкай праўды”
Што?
Калі мы ўшаноўвалі ўдзельнікаў і пераможцаў конкурсу «Дзедаўская прылада», многія гаварылі: шкада, што ён так хутка закончыўся… На гарышчы яшчэ столькі прылад, а ў памяці – столькі гісторый, з імі звязаных.Нам таксама было шкада – таго імпэту, з якім адгукаліся на заданні пастаянныя і новыя ўдзельнікі, шчырых расповедаў пра дарагія сэрцу рэчы, новых звестак пра іх эвалюцыю.
Хацелася паўтарыць – і пры тым не паўтарацца. І тут так дарэчы, у тэму аб’явілі акцыю «Кожную пятніцу – роднае, сваё».
Крыху перайначыўшы назву, вырашылі: хай у нас кожную пятніцу будзе сваё, астравецкае… Чым не нагода ўспомніць знакамітых людзей, чые імёны звязаны з нашым краем, адметныя мясціны, гісторыю і сучаснасць ва ўсёй яе шматаблічнасці, мнагавектарнасці, разнастайнасці.
Дзе?
Конкурс «Сваё, астравецкае» праводзіцца ў газеце «Астравецкая праўда». Старт яго прымеркаваны да Дня роднай мовы.Калі падвядзём вынікі, яшчэ не вырашылі. Плануецца, што ён стане шматэтапным, а колькасць этапаў вызначыць актыўнасць удзельнікаў.
Падказка-парада:
першае заданне, на наш погляд, даволі лёгкае, наступныя будуць больш складаныя. Зрэшты, як паказвае вопыт, як для каго…
Калі?
Раз у два тыдні, па пятніцах, мы будзем даваць новае заданне – «зашыфраваны» аб’ект ці асобу, якія маюць тое ці іншае дачыненне да нашага краю. Чытачам прапануецца не толькі адгадаць, хто ці што гэта, але і як мага больш поўна расказаць пра адгадку і яе сувязь з Астравеччынай.Падказка-парада:
пажадана звесткі чэрпаць не з агульнадаступных інтэрнэт-крыніц. Паверце, супрацоўнікі рэдакцыі таксама сябруюць і з «дзядзькам Гуглам», і са штучным інтэлектам і пазнаюць такія адказы «на раз». Гэта не забарона, аднак, калі ўжо лезеце ў інтэрнэт, то шукайце малавядомыя факты. А найлепш – пашукайце іх у блізкім акружэнні.
Як?
Адказы на кожнае заданне конкурсу прымаюцца на працягу пяці дзён (да серады ўключна) на звычайную (г. Астравец, вул. Энгельса, 2А) ці электронную ostrov_red@ostrovets.by пошты рэдакцыі.Кожны адказ рэдакцыйнае журы ацэньвае пэўнай колькасцю балаў у залежнасці ад яго дакладнасці, падрабязнасці, арыгінальнасці падачы, наяўнасці мясцовага матэрыялу, малавядомых звестак і г.д. Цудоўна, калі вы зможаце праілюстраваць свой адказ – гэта будзе заахвочвацца дадатковымі баламі.
Падказка-парада:
па выніках усіх этапаў набраныя балы суміруюцца, таму падключыцца да конкурсу можна на любым з іх.
Хто?
У конкурсе могуць удзельнічаць усе жадаючыя, як дарослыя, так і вучні, і студэнты: для іх, нам здаецца, гэта будзе найбольш цікава і карысна.Пераможцаў, якія набяруць найбольшую колькасць балаў, пасля заканчэння конкурсу адзначым дыпломамі і памятнымі падарункамі.
Падказка-парада: тым, хто марыць пра перамогу, не варта прапускаць заданні. У папярэдніх конкурсах канкурэнцыя зашкальвала і нагнаць лідараў было складана.
Першае заданне
Адзін з класікаў беларускай літаратуры напісаў верш, у якім ёсць радкі:«…не ведаю, што можа звацца раем?
Хіба мароз і піва ў Гудагаі,
І галасы далёкіх цягнікоў?»
Каму належаць гэтыя радкі? Што звязвае аўтара з Астравеччынай? Якія яшчэ яго творы прысвечаны астравецкім мясцінам? Што ўвогуле вы можаце расказаць пра гэтага пісьменніка?
Чакаем вашых адказаў. І спадзяёмся, што конкурс «Сваё, астравецкае» стане для нашых чытачоў такім жа прыцягальным, як і папярэднія.
