Што пісала “Сталінская праўда” пра ўз’яднанне Беларусі ў 1947 і 1948 гадах
Пра што пісала папярэдніца нашай газеты «Сталінская праўда» да дня 17 верасня ў 1947 годзе, даведаліся, пагартаўшы падшыўкі.
«Сталінская праўда», 17 верасня 1947 года.
Першая старонка газеты анансуе:
«Сёння, 17 верасня 1947 года, працоўныя раёна, як і ўвесь беларускі народ, адзначаюць вялікае гістарычнае свята – 8-ю гадавіну з дня ўз’еднання беларускага народа ў адзінай совецкай дзяржаве.
Слава правадыру совецкага народа – вялікаму СТАЛІНУ!»
Старшыня калгаса імя Варашылава В. Шыманец распавядае пра «Шлях да заможнага жыцця»:
«Сенняшняе свята, якое мы ўрачыста адзначаем у сваім калгасе, для нас, былых парабкаў памешчыка Камінскага, з’яўляецца самым найвялікшым і радасным. Іменна з дня 17 верасня 1939 года кончыўся панскі прымус і здзекі. Мы сталі самі будаваць для сябе багатае і культурнае жыццё ў арганізаванай намі калектыўнай гаспадарцы».
Шыманец расказвае, што калгас з кожным днём расце і мацнее. У ім ёсць новая савецкая агратэхніка, павышаецца ўраджайнасць, выконваецца ўзятае абавязацельства па атрыманні сярэдняй ураджайнасці. Калгаснікі на два тыдні раней завяршылі ўборку і разлічыліся па хлебапастаўках.
«Вялікае свята члены арцелі сустрэлі новымі дасягненнямі. Паспяхова закончыўшы сяўбу азімых з перавыкананнем плана, калгаснікі цяпер дружна праводзяць уборку бульбы».
Іосіф Матулойць у артыкуле «Мой сын – настаўнік» распавядае пра атрыманне адукацыі:
«Раней у нашай вёсцы Сакалойці, Швейлянскага сельсовета, не знаходзілася людзей, якія мелі б сярэднюю і вышэйшую адукацыю.
Зусім іншае становішча стала з прыходам Совецкай улады. Працоўнаму сялянству нараўне з усімі шырока адчынены дзверы да асветы».
Селянін расказвае, што яго старэйшы сын скончыў Ашмянскае педагагічнае вучылішча і працуе настаўнікам Вяліка-Яцынскай пачатковай школы. У артыкуле мужчына дзякуе за гэта «роднаму бацьку Сталіну».
